ലണ്ടന്‍: ശനിയാഴ്ച ആര്‍നെ സ്ലോട്ടിനെ ലിവര്‍പൂള്‍ മുഖ്യ പരിശീലക സ്ഥാനത്ത് നിന്ന് അപ്രതീക്ഷിതമായി പുറത്താക്കിയതിന് പിന്നാലെ, ക്ലബ്ബിന്റെ അടുത്ത കോച്ചാകാന്‍ സ്പാനിഷ് താരം ആന്‍ഡോണി ഇരയോളയ്‌ക്ക് വലിയ സാധ്യതയെന്ന് റിപ്പോര്‍ട്ടുകള്‍. ലിവര്‍പൂള്‍ സ്പോര്‍ട്ടിംഗ് ഡയറക്ടര്‍ റിച്ചാര്‍ഡ് ഹ്യൂസുമായി ബോണ്‍മൗത്തില്‍ മുന്‍പ് ഒന്നിച്ച് പ്രവര്‍ത്തിച്ചിട്ടുള്ള പരിചയസമ്പന്നനാണ് ഇരയോള. ഇരയോളയുടെ കീഴില്‍ തകര്‍പ്പന്‍ അറ്റാക്കിങ് ഫുട്ബോള്‍ പുറത്തെടുത്ത ബോണ്‍മൗത്ത് പ്രീമിയര്‍ ലീഗില്‍ ആറാം സ്ഥാനത്ത് ഫിനിഷ് ചെയ്യുകയും, ക്ലബ്ബിന്റെ ചരിത്രത്തിലാദ്യമായി യൂറോപ്പ ലീഗ് യോഗ്യത സ്വന്തമാക്കുകയും ചെയ്തിരുന്നു.
കഴിഞ്ഞ സീസണിന്റെ അവസാനത്തില്‍ തുടര്‍ച്ചയായ 18 മത്സരങ്ങളില്‍ അപരാജിത കുതിപ്പ് നടത്തിയാണ് ഇരയോളയുടെ ബോണ്‍മൗത്ത് കളി അവസാനിപ്പിച്ചത്. അദ്ദേഹം ടീമില്‍ നടപ്പിലാക്കിയ ‘അഗ്രസീവ് പ്രസ്സിങ് ശൈലി’ പ്രീമിയര്‍ ലീഗില്‍ വലിയ ശ്രദ്ധ നേടിയിരുന്നു. ലിവര്‍പൂള്‍ മാനേജ്‌മെന്റ് നിലവില്‍ സ്റ്റുട്ട്ഗാര്‍ട്ടിന്റെ സെബാസ്റ്റ്യന്‍ ഹോനസ്, ലെന്‍സിന്റെ പിയറി സേജ് എന്നിവരെയും പരിശീലക സ്ഥാനത്തേക്ക് പരിഗണിക്കുന്നുണ്ടെങ്കിലും, റിച്ചാര്‍ഡ് ഹ്യൂസുമായുള്ള അടുത്ത ബന്ധവും പ്രീമിയര്‍ ലീഗിലെ മികച്ച ട്രാക്ക് റെക്കോര്‍ഡും ഇരയോളയ്‌ക്ക് മുന്‍ഗണന നല്‍കുന്നു.
മുന്‍പ് ചെല്‍സിയും മാഞ്ചസ്റ്റര്‍ യുണൈറ്റഡും ഇരയോളയെ ടീമിലെത്തിക്കാന്‍ താല്പര്യം കാണിച്ചിരുന്നുവെങ്കിലും, അവര്‍ യഥാക്രമം സാബി അലോണ്‍സോ, മൈക്കല്‍ കാരിക് എന്നിവരെ തങ്ങളുടെ പുതിയ പരിശീലകരായി നിയമിക്കുകയായിരുന്നു. ആര്‍നെ സ്ലോട്ടിന്റെ അപ്രതീക്ഷിത പുറത്താകലിന് ശേഷം ആല്‍ഫീല്‍ഡില്‍ ഒരു പുതിയ യുഗത്തിന് തുടക്കം കുറിക്കാന്‍ ഇരയോള എത്തുമോ എന്നാണ് ലിവര്‍പൂള്‍ ആരാധകര്‍ ഇപ്പോള്‍ ഉറ്റുനോക്കുന്നത്.
