ശ്രീനഗര്‍: ജമ്മു കശ്മീരിലെ ബാരാമുള്ള ജില്ലയിലുള്ള ഉറി സെക്ടറില്‍ അതിര്‍ത്തി കടന്ന് പോകാനുള്ള ശ്രമം തടഞ്ഞ് സുരക്ഷാ സേന. ഇന്ത്യന്‍ സൈന്യവും ജമ്മു കശ്മീര്‍ പൊലീസും സംയുക്തമായി നടത്തിയ ഓപ്പറേഷനിലാണ് മൂന്ന് പേരെ പിടികൂടിയത്.
കൃത്യമായ രഹസ്യവിവരത്തിന്റെ അടിസ്ഥാനത്തിലാണ് ഉറി മേഖലയില്‍ സുരക്ഷാ സേന തിരച്ചില്‍ ആരംഭിച്ചതെന്ന് ഇന്ത്യന്‍ ആര്‍മിയുടെ ചിനാര്‍ കോര്‍പ്‌സ് വ്യക്തമാക്കി. തിരച്ചിലിനിടെ, ശത്രുതാപരമായ ലക്ഷ്യങ്ങളോടെ പ്രദേശം വിട്ടുപോകാന്‍ ശ്രമിച്ച സോപോര്‍ സ്വദേശികളായ രണ്ട് യുവാക്കളെ സുരക്ഷാ ഉദ്യോഗസ്ഥര്‍ തടഞ്ഞുനിര്‍ത്തി പിടികൂടുകയായിരുന്നു.
ഇവര്‍ക്കൊപ്പം പ്രാദേശിക ഗൈഡും പിടിയിലായിട്ടുണ്ട്. രഹസ്യവിവരത്തെ തുടര്‍ന്ന് ജാഗ്രത പുലര്‍ത്തിയ സൈനികരാണ് സംശയസ്പദമായ സാഹചര്യത്തില്‍ ഇവരെ കസ്റ്റഡിയിലെടുത്തതെന്ന് ചിനാര്‍ കോര്‍പ്‌സ് എക്‌സ് പ്ലാറ്റ്ഫോമിലൂടെ അറിയിച്ചു. സംഭവത്തില്‍ കൂടുതല്‍ അന്വേഷണം പുരോഗമിക്കുകയാണെന്ന് സൈന്യം വ്യക്തമാക്കി.
