ന്യൂഡല്ഹി: പതിനയ്യായിരത്തിലേറെ ഭിന്നശേഷിക്കാരെ സൗജന്യമായി നീന്തല് പഠിപ്പിച്ച ആലുവ സ്വദേശി സജി വാലശേരിയുടെ ജീവകാരുണ്യ പ്രവര്ത്തനത്തെ രാജ്യത്തിന് മുന്നില് പ്രശംസിച്ച് പ്രധാനമന്ത്രി നരേന്ദ്ര മോദി. തന്റെ പ്രതിമാസ റേഡിയോ പരിപാടിയായ ‘മന് കി ബാത്തിലാണ്’ സജി വാലശേരിയുടെ നേതൃത്വത്തിലുള്ള നീന്തല് ക്ലബിന്റെ സേവനങ്ങളെ പ്രധാനമന്ത്രി പ്രത്യേകം എടുത്തുപറഞ്ഞ് അഭിനന്ദിച്ചത്.
ദേശീയ റെക്കോര്ഡുകള് തകര്ത്ത പ്രമുഖ സ്പ്രിന്റര്മാരായ ഗുരീന്ദര്വീര് സിങ്, അനിമേഷ് കുജുര് എന്നിവരുമായി നടത്തിയ സംഭാഷണത്തിനിടയിലാണ് സജി വാലശേരിയുടെ മാതൃകാപരമായ പ്രവര്ത്തനത്തെക്കുറിച്ച് പ്രധാനമന്ത്രി പരാമര്ശിച്ചത്. വര്ഷങ്ങള്ക്ക് മുന്പ് നിരവധി വിദ്യാര്ത്ഥികളുടെ ജീവന് നഷ്ടമായ ഒരു ബോട്ട് അപകടമാണ് സജിയെ ഈയൊരു ദൗത്യത്തിലേക്ക് നയിച്ചതെന്ന് പ്രധാനമന്ത്രി അനുസ്മരിച്ചു. ആ ദുരന്തം സജിയുടെ മനസ്സിനെ വല്ലാതെ ഉലച്ചിരുന്നു.
അപകടത്തില്പ്പെട്ട കുട്ടികള്ക്ക് നീന്തല് അറിയാമായിരുന്നെങ്കില് ഒരുപക്ഷേ ആ ജീവനുകള് രക്ഷിക്കാമായിരുന്നു എന്ന ചിന്തയില് നിന്നാണ് എല്ലാവരെയും നീന്തല് പഠിപ്പിക്കാനായി അദ്ദേഹം ഒരു ക്ലബ് ആരംഭിക്കാന് തീരുമാനിച്ചതെന്ന് മോദി കൂട്ടിച്ചേര്ത്തു. വലിയ വിഭവങ്ങളോ സൗകര്യങ്ങളോ ഇല്ലെങ്കിലും നല്ലൊരു ലക്ഷ്യമുണ്ടെങ്കില് സമൂഹത്തില് മാറ്റങ്ങള് കൊണ്ടുവരാന് സാധിക്കുമെന്നതിന്റെ തെളിവാണ് സജിയുടെ ജീവിതമെന്ന് പ്രധാനമന്ത്രി പറഞ്ഞു.
‘സുഹൃത്തുക്കളേ, ഇതൊരു കെട്ടുകഥയല്ല, തികച്ചും യാഥാര്ത്ഥ്യമായ ഒരു സംരംഭമാണ്. ഇവിടെ ആരില് നിന്നും ഫീസ് ഈടാക്കുന്നില്ല, വലിയ കെട്ടിടങ്ങളോ ആഡംബരങ്ങളോ ഇല്ല. കുട്ടികളും പ്രായമായവരും ഒരുപോലെ ഇവിടെ വന്ന് നീന്തല് പഠിക്കുന്നു. സേവനം ചെയ്യാന് വലിയ സാമ്പത്തികത്തിന്റെ ആവശ്യമില്ലെന്നും, നല്ല ഉദ്ദേശ്യവും ആത്മാര്ത്ഥമായ പരിശ്രമവും മാത്രം മതിയെന്നുമാണ് സജി വാലശേരിയുടെ ജീവിതം നമ്മെ പഠിപ്പിക്കുന്നത്,’ പ്രധാനമന്ത്രി വ്യക്തമാക്കി.
