അഹമ്മദാബാദ്: ഐപിഎല്‍ കലാശപ്പോരാട്ടത്തില്‍ റോയല്‍ ചലഞ്ചേഴ്‌സ് ബെംഗളൂരുവിന് ഭേദപ്പെട്ട വിജയലക്ഷ്യം. അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ നടക്കുന്ന ഫൈനലില്‍ ടോസ് നഷ്ടപ്പെട്ട് ആദ്യം ബാറ്റ് ചെയ്ത ഗുജറാത്ത് ടൈറ്റന്‍സിനെ ആര്‍സിബി ബോളര്‍മാര്‍ നിശ്ചിത 20 ഓവറില്‍ 8 വിക്കറ്റിന് 155 റണ്‍സിലൊതുക്കി. മൂന്ന് വിക്കറ്റ് വീഴ്‌ത്തിയ റാസിക് സലാം ദറും രണ്ട് വിക്കറ്റ് വീതം വീഴ്‌ത്തിയ ഭുവനേശ്വര്‍ കുമാറും ജോഷ് ഹേസല്‍വുഡുമാണ് ഗുജറാത്തിന്റെ ബാറ്റിങ് തകര്‍ത്തത്. 37 പന്തില്‍ പുറത്താവാതെ 50 റണ്‍സെടുത്ത വാഷിംഗ്ടണ്‍ സുന്ദറാണ് ഗുജറാത്തിന്റെ ടോപ് സ്‌കോറര്‍.
മത്സരത്തില്‍ ഗുജറാത്തിന്റെ തുടക്കം പാളുന്ന കാഴ്ചയാണ് കാണാനായത്. സ്‌കോര്‍ ബോര്‍ഡില്‍ 26 റണ്‍സ് എത്തുന്നതിനിടെ തന്നെ ഓപ്പണര്‍മാരായ സായ് സുദര്‍ശന്‍ (12), ക്യാപ്റ്റന്‍ ശുഭ്മന്‍ ഗില്‍ (10) എന്നിവര്‍ പുറത്തായി. തുടര്‍ന്ന് ഒത്തുചേര്‍ന്ന നിശാന്ത് സിന്ധു (20) ജോസ് ബട്ലര്‍ (19) സഖ്യം 29 റണ്‍സ് കൂട്ടിച്ചേര്‍ത്ത് ടീമിനെ തിരികെ കൊണ്ടുവരാന്‍ ശ്രമിച്ചെങ്കിലും സിന്ധുവിനെ പുറത്താക്കി റാസിക് സലാം ആര്‍സിബിക്ക് ബ്രേക്ക് ത്രൂ നല്‍കി. തൊട്ടുപിന്നാലെ ബട്ലറെ ക്രുനാല്‍ പാണ്ഡ്യയും മടക്കിയതോടെ ഗുജറാത്ത് പ്രതിരോധത്തിലായി.
പിന്നീടെത്തിയ അര്‍ഷദ് ഖാന്‍ (15), രാഹുല്‍ തെവാട്ടിയ (7), ജേസണ്‍ ഹോള്‍ഡര്‍ (7), റാഷിദ് ഖാന്‍ (7) എന്നിവര്‍ക്ക് കാര്യമായ സംഭാവന നല്‍കാന്‍ കഴിഞ്ഞില്ല. എന്നാല്‍ ഒരറ്റത്ത് വിക്കറ്റുകള്‍ വീഴുമ്പോഴും ഉറച്ചുനിന്ന വാഷിംഗ്ടണ്‍ സുന്ദര്‍ അഞ്ച് ബൗണ്ടറികളോടെ അര്‍ധസെഞ്ച്വറി പൂര്‍ത്തിയാക്കി ടീമിനെ 150 കടത്തുകയായിരുന്നു. 3 റണ്‍സുമായി കഗിസോ റബാദ സുന്ദറിനൊപ്പം പുറത്താവാതെ നിന്നു.
കഴിഞ്ഞ മത്സരത്തിലെ അതേ ടീമുമായാണ് ആര്‍സിബി ഇന്ന് കലാശപ്പോരാട്ടത്തിന് ഇറങ്ങിയത്. മറുഭാഗത്ത് ഗുജറാത്ത് നിരയില്‍ സായ് കിഷോറിന് പകരം അര്‍ഷദ് ഖാന്‍ ഇടംനേടി. 156 റണ്‍സ് വിജയലക്ഷ്യം പിന്തുടരുന്ന ആര്‍സിബിയെ തുടക്കത്തിലേ പൂട്ടാമെന്ന പ്രതീക്ഷയിലാണ് ടൈറ്റന്‍സ്. സീസണിലാകെ 46 വിക്കറ്റുകള്‍ പിഴുത സിറാജ് – റബാദ സഖ്യത്തിന്റെ ഓപ്പണിങ് സ്‌പെല്ലും തുടര്‍ന്നെത്തുന്ന ഹോള്‍ഡര്‍, പ്രസിദ്ധ് കൃഷ്ണ, റാഷിദ് ഖാന്‍ എന്നിവരുടെ ബോളിങ്ങും ആര്‍സിബി ബാറ്റിങ് നിരയ്‌ക്ക് കടുത്ത വെല്ലുവിളിയാകും.
ഈ സീസണില്‍ ഇരു ടീമുകളും നേര്‍ക്കുനേര്‍ വന്നപ്പോള്‍ ഓരോ ജയവുമായി തുല്യത പാലിക്കുകയാണ്. എന്നാല്‍ ആദ്യ ക്വാളിഫയറില്‍ 33 പന്തില്‍ 93 റണ്‍സ് അടിച്ചുകൂട്ടിയ ക്യാപ്റ്റന്‍ രജത് പടിധാറിന്റെ തകര്‍പ്പന്‍ പ്രകടനത്തിന്റെ കരുത്തില്‍ ഗുജറാത്തിനെ ആര്‍സിബി കീഴടക്കിയിരുന്നു. ആ ആത്മവിശ്വാസത്തിലാണ് ബെംഗളൂരു ഇപ്പോള്‍ മറുപടി ബാറ്റിങ്ങിന് ഒരുങ്ങുന്നത്.
