ഓസ്ലോ: നോര്‍വേ ചെസ്സ് ടൂര്‍ണമെന്റില്‍ ഇന്ത്യന്‍ താരങ്ങള്‍ക്ക് മിന്നും പ്രകടനം. വനിതാ വിഭാഗത്തില്‍ ചൈനയുടെ സു ജിനേറെ കടുത്ത പോരാട്ടത്തിനൊടുവില്‍ പരാജയപ്പെടുത്തി ഇന്ത്യയുടെ ദിവ്യ ദേഷ്മുഖ് ടൂര്‍ണമെന്റില്‍ ആദ്യമായി ഒറ്റയ്‌ക്ക് മുന്നിലെത്തി. 84 നീക്കങ്ങള്‍ നീണ്ടുനിന്ന തന്ത്രപരമായ മത്സരത്തിനൊടുവിലാണ് ദിവ്യ വിജയം പിടിച്ചെടുത്തത്. നിലവില്‍ 8.5 പോയിന്റുമായി ദിവ്യ പട്ടികയില്‍ ഒന്നാം സ്ഥാനത്താണ്.
മറ്റൊരു പ്രധാന മത്സരത്തില്‍ ഇന്ത്യയുടെ കോനേരു ഹംപി വനിതാ ലോക ചാമ്പ്യന്‍ ജു വെന്‍ജൂനെ പരാജയപ്പെടുത്തി സുപ്രധാന വിജയം സ്വന്തമാക്കി. ഇതോടെ നോര്‍വേ ചെസ്സില്‍ ഇന്ത്യന്‍ വനിതകളുടെ വെല്ലുവിളി കൂടുതല്‍ ശക്തമായിരിക്കുകയാണ്. അതേസമയം, പുരുഷന്മാരുടെ വിഭാഗത്തില്‍ ലോക ചാമ്പ്യന്‍ഷിപ്പ് ഫൈനലിസ്റ്റ് ഡി. ഗുകേഷ് ടൂര്‍ണമെന്റിലേക്ക് ശക്തമായി തിരിച്ചുവന്നു. അഞ്ചാം റൗണ്ടിലെ ക്ലാസിക്കല്‍ മത്സരത്തില്‍ സ്വന്തം നാട്ടുകാരനായ ആര്‍. പ്രഗ്‌നനന്ദയെയാണ് ഗുകേഷ് പരാജയപ്പെടുത്തിയത്.
ഇരുപതാം ജന്മദിനം ആഘോഷിച്ചതിന്റെ തൊട്ടുപിറ്റേന്ന് നടന്ന മത്സരത്തില്‍ മുഴുവന്‍ പോയിന്റും (3 പോയിന്റ്) സ്വന്തമാക്കിയ ഗുകേഷ്, ആകെ 6.5 പോയിന്റുമായി മൂന്നാം സ്ഥാനത്തേക്ക് ഉയര്‍ന്നു. ഇതോടെ താരം കിരീടപ്പോരാട്ടത്തില്‍ സജീവമായി തുടരുകയാണ്. ‘റാഗോസിന്‍ ഡിഫന്‍സ്’ ശൈലിയില്‍ ആരംഭിച്ച ഗുകേഷ് – പ്രഗ്‌നനന്ദ മത്സരം ഏറെ നാടകീയത നിറഞ്ഞതായിരുന്നു. ഇരുതാരങ്ങള്‍ക്കും ജയസാധ്യതകള്‍ മാറിമറിഞ്ഞു വന്നെങ്കിലും, അവസാന ഘട്ടത്തില്‍ സമയസമര്‍ദ്ദത്തിന് അടിപ്പെട്ട പ്രഗ്‌നനന്ദയ്‌ക്ക് വന്ന ഗുരുതരമായ ഒരു പിഴവ് മത്സരത്തില്‍ നിര്‍ണ്ണായകമായി. ഈ അവസരം കൃത്യമായി വിനിയോഗിച്ച ഗുകേഷ് ചെക്ക്‌മേറ്റിലൂടെ മത്സരം സ്വന്തമാക്കുകയായിരുന്നു.
അതേസമയം, നിലവിലെ ചാമ്പ്യനും ലോക ഒന്നാം നമ്പര്‍ താരവുമായ മാഗ്‌നസ് കാള്സണ് അപ്രതീക്ഷിത തിരിച്ചടി നേരിട്ടു. അമേരിക്കന്‍ ഗ്രാന്‍ഡ്മാസ്റ്റര്‍ വെസ്ലി സോയോടാണ് കാള്സണ് പരാജയപ്പെട്ടത്. അഞ്ച് റൗണ്ടുകള്‍ പൂര്‍ത്തിയാകുമ്പോള്‍ 4.5 പോയിന്റ് മാത്രമുള്ള കാള്സണ് അവസാന സ്ഥാനത്താണ്. എന്നാല്‍ 10 പോയിന്റോടെ അലിറേസ ഫിറൂസ്ജ പട്ടികയില്‍ ഒന്നാം സ്ഥാനത്ത് തുടരുന്നു.
