ന്യൂഡല്ഹി: വെനിസ്വേലന് ആക്ടിങ് പ്രസിഡന്റ് ഡെല്സി റോഡ്രിഗസ് അഞ്ച് ദിവസത്തെ ഔദ്യോഗിക സന്ദര്ശനത്തിനായി നാളെ ഇന്ത്യയിലെത്തും. ജൂണ് 3 മുതല് 7 വരെ നീണ്ടുനില്ക്കുന്ന സന്ദര്ശനത്തില് ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ശക്തമാക്കുന്നതിനുള്ള ചര്ച്ചകള് നടക്കുമെന്ന് ഇന്ത്യന് വിദേശകാര്യ മന്ത്രാലയം അറിയിച്ചു. ജൂണ് ഒന്നിന് നടക്കേണ്ടിയിരുന്ന ‘ഇന്റര്നാഷണല് ബിഗ് ക്യാറ്റ്സ് അലയന്സ്’ ഉച്ചകോടിയില് പങ്കെടുക്കാനായിരുന്നു ഡെല്സി റോഡ്രിഗസ് ആദ്യം ഇന്ത്യയിലെത്താന് നിശ്ചയിച്ചിരുന്നത്.
എന്നാല് ഈ ഉച്ചകോടി മാറ്റിവെച്ചതിനെത്തുടര്ന്നാണ് അവരുടെ സന്ദര്ശന തീയതികളില് മാറ്റം വരുത്തിയത്. വിദേശകാര്യം, സാമ്പത്തികം, ശാസ്ത്ര-സാങ്കേതികവിദ്യ, വാര്ത്താവിനിമയം, ഗതാഗതം എന്നീ വകുപ്പുകളിലെ മന്ത്രിമാര് ഉള്പ്പെടുന്ന ഉയര്ന്ന തലത്തിലുള്ള പ്രതിനിധി സംഘവും ആക്ടിങ് പ്രസിഡന്റിനൊപ്പമുണ്ടാകുമെന്ന് വിദേശകാര്യ മന്ത്രാലയ വക്താവ് രണ്ധീര് ജയ്സ്വാള് വാര്ത്താ സമ്മേളനത്തില് വ്യക്തമാക്കി. ഡെല്സി റോഡ്രിഗസിന്റെ ആറാമത്തെ ഇന്ത്യന് സന്ദര്ശനമാണിത്.
മുന്പ് വെനിസ്വേലയുടെ വിദേശകാര്യ മന്ത്രിയായും വൈസ് പ്രസിഡന്റായും അവര് ഇന്ത്യ സന്ദര്ശിച്ചിട്ടുണ്ട്. 2015-ല് വിദേശകാര്യ മന്ത്രിയായും, പിന്നീട് 2019, 2023, 2024, 2025 വര്ഷങ്ങളില് വൈസ് പ്രസിഡന്റായും അവര് ഇന്ത്യയിലെത്തിയിരുന്നു. ഇന്ത്യയുമായി ദീര്ഘകാലത്തെ അടുത്ത സൗഹൃദമുള്ള നേതാവാണ് അവരെന്നും സന്ദര്ശന വേളയില് അവര് പ്രധാനമന്ത്രി നരേന്ദ്ര മോദിയുമായി ഉഭയകക്ഷി ചര്ച്ചകള് നടത്തുമെന്നും ജയ്സ്വാള് കൂട്ടിച്ചേര്ത്തു.
ഊര്ജ്ജം, വ്യാപാരം, നിക്ഷേപം, ഫാര്മസ്യൂട്ടിക്കല്സ്, ആരോഗ്യ സംരക്ഷണം, ഗതാഗതം, പുനരുപയോഗ ഊര്ജ്ജം തുടങ്ങിയ മേഖലകളിലെ സഹകരണം വിപുലമാക്കുന്നതിനെക്കുറിച്ച് ഇരുരാജ്യങ്ങളും ചര്ച്ച ചെയ്യും. ഇന്ത്യയിലെ പ്രധാനപ്പെട്ട ചില കേന്ദ്രങ്ങളും വെനിസ്വേലന് സംഘം സന്ദര്ശിക്കും. വെനിസ്വേലയുടെ ഊര്ജ്ജ-നിക്ഷേപ മേഖലകളില് ഇന്ത്യ ഒരു പ്രധാന പങ്കാളിയാണ്. ഇന്ത്യയുടെ പൊതുമേഖലാ സ്ഥാപനങ്ങള് വെനിസ്വേലയിലെ ഊര്ജ്ജ മേഖലയില് വലിയ നിക്ഷേപങ്ങള് നടത്തിയിട്ടുണ്ടെന്നും ഈ പങ്കാളിത്തം കൂടുതല് ഉയരങ്ങളിലേക്ക് എത്തിക്കാന് ഇരുരാജ്യങ്ങളും ആഗ്രഹിക്കുന്നുണ്ടെന്നും വിദേശകാര്യ വക്താവ് പറഞ്ഞു.
ദീര്ഘകാലത്തെ ഊഷ്മളമായ നയതന്ത്ര സൗഹൃദമാണ് ഇന്ത്യയും വെനിസ്വേലയും തമ്മിലുള്ളത്. പ്രധാനപ്പെട്ട അന്താരാഷ്ട്ര, രാഷ്ട്രീയ, സാമ്പത്തിക വിഷയങ്ങളില് ഇരുരാജ്യങ്ങള്ക്കും സമാനമായ കാഴ്ചപ്പാടുകളാണുള്ളത്. 2024-ല് ഇരുരാജ്യങ്ങളും തമ്മിലുള്ള നയതന്ത്ര ബന്ധത്തിന്റെ 65-ാം വാര്ഷികം ആഘോഷിച്ചിരുന്നു. ഇരുരാജ്യങ്ങളുടെയും എംബസികള് കഴിഞ്ഞ നാല് പതിറ്റാണ്ടിലേറെയായി കാരക്കാസിലും ന്യൂഡല്ഹിയിലുമായി സജീവമായി പ്രവര്ത്തിക്കുന്നുണ്ട്.
