പാരീസ്: ഫ്രഞ്ച് ഓപ്പണ് വനിതാ സിംഗിള്സ് സെമി ഫൈനല് മത്സരത്തിന് ശേഷം റഷ്യന് താരം മിറ ആന്ഡ്രീവയും യുക്രെയ്ന് താരം മാര്ത്താ കോസ്റ്റിയൂക്കും തമ്മില് പരമ്പരാഗതമായ ഹാന്ഡ്ഷെയ്ക്ക് (കൈകൊടുക്കല്) ഒഴിവാക്കി. 2022-ല് റഷ്യ യുക്രെയ്ന് അധിനിവേശം ആരംഭിച്ചതു മുതല്, റഷ്യന്-ബെലാറഷ്യന് താരങ്ങള്ക്ക് മത്സരശേഷം കൈകൊടുക്കില്ലെന്ന ശക്തമായ നിലപാടിലാണ് മാര്ത്താ കോസ്റ്റിയൂക്ക്. അതുകൊണ്ടുതന്നെ പാരീസിലെ കോര്ട്ടിലും ഇത് പ്രതീക്ഷിക്കപ്പെട്ടിരുന്ന ഒന്നായിരുന്നു.
മത്സരമവസാനിച്ചതിന് ശേഷം നെറ്റിനടുത്തേക്ക് വരാതെ, അകലെ നിന്നുതന്നെ ഇരുതാരങ്ങളും പരസ്പരം ജയം/തോല്വി അംഗീകരിക്കുകയായിരുന്നു. നിലവിലുള്ള യുദ്ധസാഹചര്യത്തില് സ്വന്തം രാജ്യത്തിന് പിന്തുണ പ്രഖ്യാപിക്കുന്നതിനുള്ള ഒരു പ്രതീകാത്മക പ്രതിഷേധമായാണ് കോസ്റ്റിയൂക്ക് ഈ നിലപാടിനെ കാണുന്നത്. വനിതാ ടെന്നീസ് ടൂറുകളില് യുദ്ധത്തിനെതിരെ ഏറ്റവും കൂടുതല് ശബ്ദമുയര്ത്തുന്ന യുക്രെയ്ന് താരങ്ങളില് ഒരാളാണ് കോസ്റ്റിയൂക്ക്. സഹതാരങ്ങളായ എലിന സ്വിറ്റോലിന, ഡയാന യാസ്ട്രെംസ്ക എന്നിവരെപ്പോലെ മാര്ത്തയും റഷ്യന്, ബെലാറഷ്യന് എതിരാളികളുമായുള്ള മത്സരങ്ങള്ക്ക് ശേഷം കൈകൊടുക്കാന് വിസമ്മതിക്കാറുണ്ട്.
ടൂര്ണമെന്റുകളുടെ പ്രാധാന്യമോ മത്സരത്തിന്റെ വലിപ്പമോ നോക്കാതെ കരിയറിലുടനീളം താരം ഈ നിലപാട് കര്ശനമായി പിന്തുടരുന്നു. ഇക്കഴിഞ്ഞ മാഡ്രിഡ് ഓപ്പണ് ഫൈനലില് മിറ ആന്ഡ്രീവയെ പരാജയപ്പെടുത്തിയപ്പോഴും കോസ്റ്റിയൂക്ക് പരമ്പരാഗത ഹാന്ഡ്ഷെയ്ക്ക് ഒഴിവാക്കി കോര്ട്ട് വിട്ടിരുന്നു. കളിക്കളത്തിലെ പ്രകടനങ്ങള്ക്കപ്പുറം, യുദ്ധം യുക്രെയ്നിലെ ജനങ്ങളില് ഉണ്ടാക്കുന്ന ആഘാതത്തെക്കുറിച്ച് കോസ്റ്റിയൂക്ക് നിരന്തരം സംസാരിക്കാറുണ്ട്. ഫ്രഞ്ച് ഓപ്പണിന്റെ സെമി ഫൈനലില് പ്രവേശിച്ചതിന് പിന്നാലെ, ഈ നേട്ടം താന് യുക്രെയ്ന് ജനതയ്ക്കായി സമര്പ്പിക്കുകയാണെന്ന് താരം വ്യക്തമാക്കിയിരുന്നു.
മാതൃരാജ്യത്തുണ്ടാകുന്ന പുതിയ സംഭവവികാസങ്ങള് അറിയുമ്പോള് നാട്ടിലുള്ള തന്റെ കുടുംബത്തിന്റെ സുരക്ഷ ഉറപ്പാക്കുകയാണ് താന് ആദ്യം ചെയ്യുന്നതെന്നും കോസ്റ്റിയൂക്ക് വെളിപ്പെടുത്തി. കായികതാരങ്ങള് ഈ യുദ്ധത്തെക്കുറിച്ച് നിരന്തരം സംസാരിക്കേണ്ടത് അത്യാവശ്യമാണെന്നും, എങ്കില് മാത്രമേ യുദ്ധത്തിന്റെ മാനുഷിക പ്രത്യാഘാതങ്ങളിലേക്ക് ലോകശ്രദ്ധ എപ്പോഴും നിലനിര്ത്താന് സാധിക്കൂ എന്നും ലോക പതിനഞ്ചാം നമ്പര് താരമായ കോസ്റ്റിയൂക്ക് ഊന്നിപ്പറയുന്നു. ടെന്നീസില് ഹാന്ഡ്ഷെയ്ക്ക് എന്നത് സ്പോര്ട്സ്മാന് സ്പിരിറ്റിന്റെ ഭാഗമായാണ് കാണാറുള്ളതെങ്കിലും, തന്റെ നിലപാടില് ഉറച്ചുനില്ക്കുകയാണ് ഈ യുക്രെയ്ന് താരം.