തിരുവനന്തപുരം: കാര്യവട്ടം പേരൂരില്‍ നിര്‍ത്തിയിട്ടിരുന്ന കാറിനുള്ളില്‍ മധ്യവയസ്‌കനെ ജീവനില്ലാത്ത നിലയില്‍ കണ്ടെത്തി. ചെമ്പഴന്തി അണിയൂര്‍ സ്വദേശിയായ രാജീവ് (50) ആണ് മരിച്ചത്. ഗ്രൗണ്ടില്‍ കളിക്കാനായെത്തിയ കുട്ടികളാണ് കാറിനുള്ളില്‍ അബോധാവസ്ഥയില്‍ ഒരാളെ ആദ്യം കണ്ടത്. കുട്ടികള്‍ വിവരമറിയിച്ചതിനെ തുടര്‍ന്ന് കഴക്കൂട്ടം പൊലീസ് സ്ഥലത്തെത്തി.
പൊലീസുകാര്‍ കാറിന്റെ ഗ്ലാസ് തകര്‍ത്താണ് അകത്തുണ്ടായിരുന്ന രാജീവിനെ പുറത്തെടുത്തതെങ്കിലും അപ്പോഴേക്കും മരണം സംഭവിച്ചിരുന്നു. ഇന്നലെയാണ് രാജീവ് ഈ ഗ്രൗണ്ടിന് സമീപം കാര്‍ പാര്‍ക്ക് ചെയ്തത്. ഇന്നലെ കളിക്കാനെത്തിയ കുട്ടികളോട് ഇയാള്‍ സംസാരിച്ചിരുന്നതായും വിവരമുണ്ട്. കാറിനുള്ളില്‍ എസി ഓണ്‍ ചെയ്ത് കിടന്നുറങ്ങിയതാകാം മരണത്തിലേക്ക് നയിച്ചതെന്നാണ് പൊലീസിന്റെ പ്രാഥമിക നിഗമനം.
