തിരുവനന്തപുരം: തലസ്ഥാന നഗരിയില് വീണ്ടും ഷിഗെല്ല രോഗബാധ സ്ഥിരീകരിച്ചു. കാട്ടാക്കട സ്വദേശിയായ ഒരാള്ക്കാണ് രോഗം ബാധിച്ചതായി കണ്ടെത്തിയത്. ഇതിന് പിന്നാലെ പ്രദേശത്തെ ഒരു ബേക്കറിയില് നിന്ന് ശേഖരിച്ച ജ്യൂസില് ഷിഗെല്ല ബാക്ടീരിയയുടെ സാന്നിധ്യമുണ്ടെന്ന സംശയത്തെ തുടര്ന്ന് ഭക്ഷ്യസുരക്ഷാ വകുപ്പ് ബേക്കറി അടിയന്തരമായി അടപ്പിച്ചു.
സംശയമുള്ള ബേക്കറിയില് നിന്നും ഉദ്യോഗസ്ഥര് ശേഖരിച്ച ഓറഞ്ച് നിറത്തിലുള്ള പാനീയത്തിന്റെ സാമ്പിള് വഞ്ചിയൂരിലെ സര്ക്കാര് ലബോറട്ടറിയിലാണ് പരിശോധനയ്ക്ക് വിധേയമാക്കിയത്. ഈ പരിശോധനയിലാണ് പാനീയത്തില് ഷിഗെല്ല ബാക്ടീരിയയുടെ സാന്നിധ്യം വ്യക്തമായത്. ബേക്കറിയില് തന്നെ നേരിട്ട് തയ്യാറാക്കുന്ന കാര്ബണേറ്റഡ് പാനീയമാണിത്.
പ്രാദേശികമായി മാത്രം വില്പന നടത്തിയിരുന്ന ഒന്നായതിനാല് ഇത് വലിയ തോതില് ജനങ്ങളിലേക്ക് എത്തിയിട്ടില്ലെന്നാണ് പ്രാഥമിക നിഗമനം. പ്രദേശവാസിയായ വ്യക്തിക്ക് രോഗം സ്ഥിരീകരിച്ചതോടെയാണ് ഭക്ഷ്യസുരക്ഷാ വകുപ്പ് കാട്ടാക്കടയിലും പരിസര പ്രദേശങ്ങളിലും പരിശോധനകള് ഊര്ജ്ജിതമാക്കിയത്. ലബോറട്ടറി ഫലം പോസിറ്റീവ് ആയ ഉടന് തന്നെ ഉദ്യോഗസ്ഥര് സ്ഥലത്തെത്തി ബേക്കറിയുടെ പ്രവര്ത്തനം താല്ക്കാലികമായി നിര്ത്തിവെപ്പിച്ചു.
ശുചിത്വ മാനദണ്ഡങ്ങള് പാലിക്കാത്തതാണ് ബാക്ടീരിയ പടരാന് കാരണമായതെന്നാണ് സൂചന. പ്രദേശത്തെ മറ്റ് വില്പനശാലകളിലും വരും ദിവസങ്ങളില് കര്ശന പരിശോധന തുടരുമെന്ന് അധികൃതര് അറിയിച്ചു.
