ടോക്കിയോ: ഫിഫ ലോകകപ്പിന്റെ ആവേശം ഉയരുന്നതിനിടെ ഏഷ്യന് കരുത്തരായ ജപ്പാന് കനത്ത തിരിച്ചടി. പരിക്കില് നിന്ന് പൂര്ണ്ണമായി മുക്തനാകാത്തതിനെ തുടര്ന്ന് ജാപ്പനീസ് ക്യാപ്റ്റനും ലിവര്പൂള് മിഡ്ഫീല്ഡറുമായ വതാരു എന്ഡോ ലോകകപ്പ് ടീമില് നിന്ന് പുറത്തായി. ഇതിന് തൊട്ടുപിന്നാലെ 33-കാരനായ താരം അന്താരാഷ്ട്ര ഫുട്ബോളില് നിന്നുള്ള തന്റെ വിരമിക്കലും പ്രഖ്യാപിച്ചു. ഗ്രൂപ്പ് എഫില് നെതര്ലന്ഡ്സിനെതിരെയുള്ള ജപ്പാന്റെ ആദ്യ പോരാട്ടത്തിന് ദിവസങ്ങള് മാത്രം ശേഷിക്കെയാണ് ഈ നാടകീയ സംഭവങ്ങള്.
കഴിഞ്ഞ ഫെബ്രുവരിയില് ക്ലബ്ബ് ഫുട്ബോള് കളിക്കുന്നതിനിടയിലാണ് എന്ഡോയുടെ കാലിന് പരിക്കേല്ക്കുന്നത്. പിന്നീട് മെയ് മാസത്തില് നടന്ന സൗഹൃദ മത്സരത്തിലൂടെ തിരിച്ചുവരവിന് ശ്രമിച്ചെങ്കിലും മെക്സിക്കോയിലെ ലോകകപ്പ് പരിശീലന ക്യാമ്പില് വെച്ച് പരിക്ക് വീണ്ടും വില്ലനാവുകയായിരുന്നു. തനിക്ക് പകരം ടീം ഭാവിയില് ലോകകപ്പ് നേടുമെന്ന ശുഭപ്രതീക്ഷ പങ്കുവെച്ച എന്ഡോ, ഇനി ഒരു സാധാരണ ആരാധകനായി ജപ്പാനെ പിന്തുണയ്ക്കുമെന്നും തന്റെ സോഷ്യല് മീഡിയ പേജിലൂടെ വ്യക്തമാക്കി. 2015-ല് ദേശീയ ജേഴ്സിയണിഞ്ഞ എന്ഡോ 73 മത്സരങ്ങളില് നിന്ന് 4 ഗോളുകള് നേടിയിട്ടുണ്ട്. 2018, 2022 ലോകകപ്പുകളിലും അദ്ദേഹം ജപ്പാന്റെ ഭാഗമായിരുന്നു.
എന്ഡോയുടെ അഭാവത്തില് പ്രതിരോധ നിരയിലെ കരുത്തനായ കോ ഇറ്റാകുറയാവും ലോകകപ്പില് ജപ്പാനെ നയിക്കുക. എന്ഡോയ്ക്ക് പകരമായി ബൊറൂസിയ മോണ്ചന്ഗ്ലെഡ്ബാച്ചിന്റെ താരം ഷൂട്ടോ മാചിനോയെ ടീമില് ഉള്പ്പെടുത്തിയിട്ടുണ്ട്. നേരത്തെ തന്നെ പ്രമുഖ താരങ്ങളായ കൗരു മിറ്റോമ (ബ്രൈറ്റന്), താകുമി മിനാമിനോ (മൊണാക്കോ) എന്നിവര് പരിക്കേറ്റ് പുറത്തായ ജാപ്പനീസ് നിരയ്ക്ക് നായകന്റെ അപ്രതീക്ഷിത വിടവാങ്ങല് ഇരട്ടി പ്രഹരമാണ്. ലോകകപ്പില് നെതര്ലന്ഡ്സ്, ടുണീഷ്യ, സ്വീഡന് എന്നിവരടങ്ങുന്ന ശക്തമായ ഗ്രൂപ്പ് എഫിലാണ് ജപ്പാന് മത്സരിക്കുന്നത്.
