ചെന്നൈ: ക്രിക്കറ്റ് മൈതാനത്ത് ആരാധകരെ വിസ്മയിപ്പിച്ച മുന് ഇന്ത്യന് നായകന് എം.എസ്. ധോണി, ഇത്തവണ റേസിങ് ട്രാക്കിലാണ് തന്റെ വേഗതകൊണ്ട് ശ്രദ്ധനേടിയത്. ചെന്നൈയ്ക്ക് സമീപമുള്ള മദ്രാസ് ഇന്റര്നാഷണല് സര്ക്യൂട്ടില് സൂപ്പര്ബൈക്ക് ഓടിക്കുന്ന ധോണിയുടെ ദൃശ്യങ്ങള് സമൂഹമാധ്യമങ്ങളില് വൈറലായിരിക്കുകയാണ്. ഒരു ബ്രാന്ഡ് പ്രമോഷന് പരിപാടിയുടെ ഭാഗമായാണ് ധോണി ഇരുങ്ങാട്ടുകോട്ടൈയിലെ പ്രൊഫഷണല് റേസിങ് ട്രാക്കിലെത്തിയത്.
റേസിങ് സ്യൂട്ടും സുരക്ഷാ ഉപകരണങ്ങളും ധരിച്ച ധോണി നിരവധി ഹൈ-സ്പീഡ് ലാപ്പുകള് പൂര്ത്തിയാക്കി. ട്രാക്കിലെ വളവുകളിലൂടെ അതിവേഗത്തില് ബൈക്ക് നിയന്ത്രിക്കുന്ന ധോണിയുടെ പ്രകടനം കണ്ട ആരാധകരും മോട്ടോര്സ്പോര്ട്സ് പ്രേമികളും കൈയടിയോടെയാണ് സ്വീകരിച്ചത്. പ്രൊഫഷണല് റേസര്മാരെ അനുസ്മരിപ്പിക്കുന്ന ആത്മവിശ്വാസത്തോടെയും കൃത്യതയോടെയും ധോണി ബൈക്ക് കൈകാര്യം ചെയ്തതും ശ്രദ്ധേയമായി.
വിലകൂടിയ കാറുകളോടും സൂപ്പര്ബൈക്കുകളോടുമുള്ള ധോണിയുടെ പ്രിയം ഏറെക്കാലമായി ആരാധകര്ക്കിടയില് ചര്ച്ചാവിഷയമാണ്. റാഞ്ചിയിലെ അദ്ദേഹത്തിന്റെ ഗാരേജിലുള്ള വാഹനശേഖരം ഇതിനകം തന്നെ ശ്രദ്ധ നേടിയിട്ടുണ്ട്. അതേസമയം, ചെന്നൈയിലെ ധോണിയുടെ സാന്നിധ്യം ഐപിഎല് ആരാധകര്ക്കിടയിലും പുതിയ ചര്ച്ചകള്ക്ക് വഴിവെച്ചിരിക്കുകയാണ്. കഴിഞ്ഞ ഐപിഎല് സീസണ് പരിക്ക് കാരണം പൂര്ണമായും നഷ്ടമായ ധോണി, അടുത്ത സീസണില് വീണ്ടും ചെന്നൈ സൂപ്പര് കിങ്സിനായി കളത്തിലിറങ്ങുമോയെന്ന പ്രതീക്ഷയിലാണ് ആരാധകര്.
