ഭീകരധനസഹായത്തിനെതിരായ പോരാട്ടത്തില്‍ ഇന്ത്യയ്‌ക്ക് വന്‍ അംഗീകാരം; എഫ്എടിഎഫിന്റെ വൈസ് പ്രസിഡന്റായി വിവേക് അഗര്‍വാള്‍

ന്യൂഡല്‍ഹി: ആഗോള സാമ്പത്തിക സുരക്ഷാ രംഗത്ത് ഇന്ത്യയുടെ സ്വാധീനം കൂടുതല്‍ ശക്തമാകുന്നതിന്റെ സൂചനയായി ഫിനാന്‍ഷ്യല്‍ ആക്ഷന്‍ ടാസ്‌ക് ഫോഴ്‌സിന്റെ (FATF) വൈസ് പ്രസിഡന്റായി ഇന്ത്യന്‍ ഉദ്യോഗസ്ഥന്‍ വിവേക് അഗര്‍വാള്‍ തിരഞ്ഞെടുക്കപ്പെട്ടു. 2026 ജൂലൈ 1 മുതല്‍ 2027 വരെയുള്ള കാലയളവിലേക്കാണ് അദ്ദേഹത്തിന്റെ നിയമനം. കള്ളപ്പണം വെളുപ്പിക്കലിനും ഭീകരവാദ ധനസഹായ ശൃംഖലകള്‍ക്കും എതിരായ അന്താരാഷ്‌ട്ര പോരാട്ടത്തില്‍ ഇന്ത്യയ്‌ക്ക് നിര്‍ണായക ഉത്തരവാദിത്വം ലഭിച്ചതായാണ് വിലയിരുത്തല്‍.

നിലവില്‍ കേന്ദ്ര സാംസ്‌കാരിക മന്ത്രാലയ സെക്രട്ടറിയായ വിവേക് അഗര്‍വാള്‍ മുമ്പ് ഇന്ത്യയുടെ FATF പ്രതിനിധി സംഘത്തെ നയിക്കുകയും ഫിനാന്‍ഷ്യല്‍ ഇന്റലിജന്‍സ് യൂണിറ്റ്-ഇന്ത്യ (FIU-IND) ഡയറക്ടറായും പ്രവര്‍ത്തിക്കുകയും ചെയ്തിട്ടുണ്ട്. സാമ്പത്തിക കുറ്റകൃത്യങ്ങള്‍ തടയുന്നതിലെ അദ്ദേഹത്തിന്റെ അനുഭവസമ്പത്ത് ആഗോള തലത്തില്‍ അംഗീകരിക്കപ്പെട്ടതിന്റെ തെളിവായാണ് പുതിയ തിരഞ്ഞെടുപ്പ്.

വിദേശകാര്യ മന്ത്രാലയം ഈ തിരഞ്ഞെടുപ്പിനെ ഇന്ത്യയുടെ സുപ്രധാന നേട്ടമായി വിശേഷിപ്പിച്ചു. ഭീകരവാദത്തോട് പൂജ്യ സഹിഷ്ണുത എന്ന നയം പിന്തുടരുന്ന ഇന്ത്യയുടെ നിലപാടിന് ആഗോള വേദിയില്‍ കൂടുതല്‍ കരുത്തേകുന്നതാണ് ഈ നിയമനമെന്നും മന്ത്രാലയം പ്രതികരിച്ചു.

കേന്ദ്ര സാംസ്‌കാരിക മന്ത്രാലയവും നിയമനത്തെ ചരിത്രപരമായ സംഭവമായി വിശേഷിപ്പിച്ചു. കള്ളപ്പണ ഇടപാടുകളും ഭീകരവാദ ഫണ്ടിംഗും നിയന്ത്രിക്കുന്ന ആഗോള മാനദണ്ഡങ്ങള്‍ രൂപപ്പെടുത്തുന്ന പ്രമുഖ അന്താരാഷ്‌ട്ര സ്ഥാപനത്തിന്റെ നേതൃത്വനിരയില്‍ ഇന്ത്യന്‍ ഉദ്യോഗസ്ഥന്‍ എത്തിയത് ലോകസമൂഹം ഇന്ത്യയില്‍ അര്‍പ്പിക്കുന്ന വിശ്വാസത്തിന്റെ പ്രതിഫലനമാണെന്ന് മന്ത്രാലയം ചൂണ്ടിക്കാട്ടി.

പാരിസില്‍ ചേര്‍ന്ന FATF പ്ലീനറി യോഗത്തില്‍ 200-ലധികം രാജ്യങ്ങളിലെയും നിരീക്ഷക സംഘടനകളിലെയും പ്രതിനിധികള്‍ ആഗോള സാമ്പത്തിക സുരക്ഷ നേരിടുന്ന വെല്ലുവിളികള്‍ ചര്‍ച്ച ചെയ്തു. യോഗത്തില്‍ ചില രാജ്യങ്ങളെ നിരീക്ഷണ പട്ടികയില്‍ നിന്ന് ഒഴിവാക്കുകയും ഉയര്‍ന്ന അപകടസാധ്യതയുള്ള മേഖലകളുമായി ബന്ധപ്പെട്ട പുതിയ വിലയിരുത്തലുകളും അംഗീകരിക്കുകയും ചെയ്തു.

മധ്യപ്രദേശ് കേഡറിലെ മുതിര്‍ന്ന ഐഎഎസ് ഉദ്യോഗസ്ഥനായ വിവേക് അഗര്‍വാള്‍ ധനകാര്യ മന്ത്രാലയം, കാര്‍ഷിക വകുപ്പ്, പഞ്ചാബ് സര്‍ക്കാര്‍ തുടങ്ങി വിവിധ മേഖലകളില്‍ സുപ്രധാന ചുമതലകള്‍ വഹിച്ചിട്ടുണ്ട്. 2025-ല്‍ കേന്ദ്ര സാംസ്‌കാരിക മന്ത്രാലയ സെക്രട്ടറിയായി നിയമിതനായ അദ്ദേഹം അതേ വര്‍ഷം തന്നെ ചീഫ് സെക്രട്ടറി ഗ്രേഡിലേക്കും ഉയര്‍ത്തപ്പെട്ടു.

ഡിജിറ്റല്‍ പേയ്മെന്റുകള്‍, വെര്‍ച്വല്‍ ആസ്തികള്‍, രാജ്യാന്തര സാമ്പത്തിക ഇടപാടുകള്‍ എന്നിവയുമായി ബന്ധപ്പെട്ട പുതിയ വെല്ലുവിളികള്‍ ഉയരുന്ന സാഹചര്യത്തില്‍ FATFയുടെ ഉന്നത നേതൃത്വത്തില്‍ ഇന്ത്യയുടെ സാന്നിധ്യം ആഗോള ധനകാര്യ മേഖലയിലെ രാജ്യത്തിന്റെ പ്രാധാന്യം കൂടുതല്‍ ഉയര്‍ത്തുമെന്നാണ് വിലയിരുത്തപ്പെടുന്നത്.