ന്യൂഡല്‍ഹി: ജൂണ്‍ 21-ന് നടക്കുന്ന നീറ്റ് പുനഃപരീക്ഷ കുറ്റമറ്റ രീതിയില്‍ നടത്തുന്നതിനായി ദേശീയ ടെസ്റ്റിംഗ് ഏജന്‍സി (എന്‍ടിഎ) വിപുലമായ സുരക്ഷാ ക്രമീകരണങ്ങള്‍ ഏര്‍പ്പെടുത്തി. പരീക്ഷയ്‌ക്ക് മുന്നോടിയായി ജൂണ്‍ 20-ന് രാജ്യവ്യാപകമായി മോക്ക് ഡ്രിലും സുരക്ഷാ പരിശോധനകളും സംഘടിപ്പിക്കുമെന്ന് അധികൃതര്‍ അറിയിച്ചു.
രാവിലെ 9 മണി മുതല്‍ വൈകുന്നേരം വരെ നടക്കുന്ന മോക്ക് ഡ്രിലില്‍ 2.5 ലക്ഷത്തിലധികം സുരക്ഷാ ഉദ്യോഗസ്ഥര്‍ പങ്കെടുക്കുമെന്നാണ് വിവരം. രാജ്യത്തെ 5,000-ത്തിലധികം പരീക്ഷാകേന്ദ്രങ്ങള്‍ ത്രിതല സുരക്ഷാ സംവിധാനത്തിന്റെ കീഴിലായിരിക്കും പ്രവര്‍ത്തിക്കുക. ചോദ്യപേപ്പറുകളുടെയും ഉത്തരക്കടലാസുകളുടെയും സുരക്ഷ അര്‍ധസൈനിക വിഭാഗങ്ങള്‍ ഉള്‍പ്പെടെയുള്ള സുരക്ഷാ സേനകള്‍ ഉറപ്പാക്കും. എല്ലാ കേന്ദ്രങ്ങളും സിസിടിവി നിരീക്ഷണത്തിലുമുണ്ടാകും.
കഴിഞ്ഞ വര്‍ഷം ഉയര്‍ന്ന ക്രമക്കേട് ആരോപണങ്ങളും ചോദ്യപേപ്പര്‍ ചോര്‍ച്ച വിവാദങ്ങളും പരിഗണിച്ചാണ് ഇത്തവണ കൂടുതല്‍ കര്‍ശനമായ സുരക്ഷാ സംവിധാനങ്ങള്‍ ഏര്‍പ്പെടുത്തിയത്. പരീക്ഷയുടെ വിശ്വാസ്യത ഉറപ്പാക്കാനും വിദ്യാര്‍ഥികള്‍ക്ക് ആശങ്കയില്ലാതെ പരീക്ഷ എഴുതാനുള്ള സാഹചര്യം ഒരുക്കാനുമാണ് എന്‍ടിഎയുടെ ലക്ഷ്യമെന്ന് ബന്ധപ്പെട്ട വൃത്തങ്ങള്‍ വ്യക്തമാക്കി.
അതേസമയം, നീറ്റ് പരീക്ഷയെ ചുറ്റിപ്പറ്റിയുള്ള രാഷ്‌ട്രീയ വിവാദങ്ങള്‍ക്കിടയിലും പരീക്ഷാ നടത്തിപ്പ് സുതാര്യവും സുരക്ഷിതവുമാക്കാന്‍ എല്ലാ മുന്‍കരുതലുകളും സ്വീകരിച്ചിട്ടുണ്ടെന്നാണ് അധികൃതരുടെ നിലപാട്. രാജ്യത്തെ ലക്ഷക്കണക്കിന് വിദ്യാര്‍ഥികളുടെ ഭാവിയെ ബാധിക്കുന്ന പരീക്ഷയായതിനാല്‍ യാതൊരു വീഴ്ചയും അനുവദിക്കില്ലെന്ന സന്ദേശമാണ് എന്‍ടിഎ നല്‍കുന്നത്.
