വിശാഖപട്ടണം: രാജ്യത്തെ സ്വര്ണോല്പാദന രംഗത്ത് വന് മുന്നേറ്റത്തിന് ഒരുങ്ങി ആന്ധ്രപ്രദേശ്. പുതിയ ഖനന മേഖലകള് കണ്ടെത്തിയതും സ്വകാര്യ നിക്ഷേപങ്ങള്ക്ക് സര്ക്കാര് കൂടുതല് പ്രോത്സാഹനം നല്കുന്നതും സംസ്ഥാനത്തെ ഇന്ത്യയിലെ പ്രധാന സ്വര്ണ ഉല്പാദന കേന്ദ്രമാക്കി മാറ്റുമെന്ന പ്രതീക്ഷയിലാണ് അധികൃതര്. ഇതോടെ സ്വര്ണത്തിനായി വിദേശ രാജ്യങ്ങളെ ആശ്രയിക്കുന്ന ഇന്ത്യയുടെ നിലപാടിലും മാറ്റമുണ്ടാകുമെന്നാണ് ഖനന-ഭൂഗര്ഭ വകുപ്പ് പ്രിന്സിപ്പല് സെക്രട്ടറി മുകേഷ് കുമാര് മീണ വ്യക്തമാക്കിയത്.
കര്ണൂല് ജില്ലയിലെ ജോന്നഗിരി ഗ്രാമത്തില് മാത്രം ഏകദേശം 50 ടണ് സ്വര്ണ നിക്ഷേപമുണ്ടെന്നാണ് കണക്കുകള് സൂചിപ്പിക്കുന്നത്. ഇതിന് പുറമെ രാമഗിരി, ജവ്വകുല, ചിഗുരുകുണ്ട എന്നിവയുള്പ്പെടെ നാല് പ്രധാന മേഖലകളിലും സ്വര്ണ ഖനന സാധ്യതകള് കണ്ടെത്തിയിട്ടുണ്ട്. ഈ മേഖലകളിലെ ഖനനാവകാശങ്ങള് ഘട്ടംഘട്ടമായി ലേലം ചെയ്യുന്നതിനൊപ്പം അടിസ്ഥാന സൗകര്യ വികസനത്തിനും സര്ക്കാര് പദ്ധതിയിടുകയാണ്.
2000-ല് കര്ണാടകയിലെ പ്രശസ്തമായ കോലാര് ഗോള്ഡ് ഫീല്ഡ്സ് പ്രവര്ത്തനം അവസാനിപ്പിച്ചതോടെ രാജ്യത്തെ ആഭ്യന്തര സ്വര്ണ ഉല്പാദനത്തിന് വലിയ തിരിച്ചടിയുണ്ടായിരുന്നു. നിലവില് കര്ണാടകയിലെ സര്ക്കാര് ഉടമസ്ഥതയിലുള്ള ഹട്ടി ഗോള്ഡ് മൈന്സ് വര്ഷത്തില് ഏകദേശം 1.5 ടണ് സ്വര്ണം മാത്രമാണ് ഉല്പാദിപ്പിക്കുന്നത്. എന്നാല് ഇന്ത്യയുടെ വാര്ഷിക സ്വര്ണ ഉപഭോഗം 800 ടണ്ണിലധികമായതിനാല് ആഭ്യന്തര ഖനനം ശക്തിപ്പെടുത്തുന്നത് വിദേശനാണ്യ ചെലവ് കുറയ്ക്കാന് സഹായിക്കുമെന്നാണ് വിലയിരുത്തല്.
സ്വാതന്ത്ര്യാനന്തര ഇന്ത്യയിലെ ആദ്യത്തെ വലിയ സ്വകാര്യ സ്വര്ണ ഖനന പദ്ധതിയും ജോന്നഗിരിയിലാണ് പ്രവര്ത്തനം ആരംഭിച്ചിരിക്കുന്നത്. ജിയോമൈസൂര് സര്വീസസ് ഇന്ത്യ പ്രൈവറ്റ് ലിമിറ്റഡ് 400 കോടിയിലധികം രൂപയുടെ നിക്ഷേപത്തോടെയാണ് 598 ഹെക്ടര് വിസ്തൃതിയുള്ള ഓപ്പണ് പിറ്റ് ഖനി വികസിപ്പിച്ചത്. അടുത്ത 15 വര്ഷക്കാലം പ്രതിവര്ഷം ഏകദേശം 1,000 കിലോഗ്രാം ശുദ്ധീകരിച്ച സ്വര്ണം ഇവിടെ നിന്ന് ഉല്പാദിപ്പിക്കാന് കഴിയുമെന്നാണ് പ്രതീക്ഷ.
ആധുനിക ഖനന സാങ്കേതികവിദ്യകള്ക്ക് ഉയര്ന്ന സാങ്കേതിക വൈദഗ്ധ്യം ആവശ്യമായതിനാല് സുതാര്യമായ ലേല നടപടികളിലൂടെയാണ് ഖനനാവകാശങ്ങള് അനുവദിക്കുന്നതെന്ന് അധികൃതര് വ്യക്തമാക്കി. നിലവില് ഒരു ടണ് പാറ സംസ്കരിക്കുമ്പോള് ഒരു ഗ്രാം മുതല് ആറു ഗ്രാം വരെ മാത്രമാണ് സ്വര്ണം ലഭിക്കുന്നത്. എന്നാല് കാര്ബണ്-ഇന്-ലീച്ച് പോലുള്ള നൂതന സാങ്കേതിക വിദ്യകള് ഉപയോഗിച്ച് കടുപ്പമേറിയ പാറകളില് നിന്നും കൂടുതല് കാര്യക്ഷമമായി സ്വര്ണം വേര്തിരിച്ചെടുക്കാന് സാധിച്ചാല്, രാജ്യത്തിന്റെ ധാതു സ്വയംപര്യാപ്തതയില് ആന്ധ്രപ്രദേശ് നിര്ണായക പങ്ക് വഹിക്കുമെന്നാണ് പ്രതീക്ഷ.
