ആലപ്പുഴ: ഓൺലൈൻ ഭക്ഷണവിതരണ സംവിധാനങ്ങളുടെ മറവിൽ ലഹരി വസ്തുക്കൾ വിതരണം ചെയ്യുന്ന സംഭവങ്ങൾ റിപ്പോർട്ട് ചെയ്യപ്പെട്ടതായി ആഭ്യന്തര മന്ത്രി അറിയിച്ചു. വിഷയത്തിൽ ശക്തമായ നടപടി സ്വീകരിക്കുമെന്ന് അദ്ദേഹം മുന്നറിയിപ്പ് നൽകി.
ഓപ്പറേഷൻ തൂഫാനുമായി ബന്ധപ്പെട്ട വാർത്താസമ്മേളനത്തിലാണ് മന്ത്രി ഇക്കാര്യം വ്യക്തമാക്കിയത്. ഓൺലൈൻ ഡെലിവറി സംവിധാനങ്ങളെ ദുരുപയോഗം ചെയ്ത് ലഹരി വിതരണം നടക്കുന്നുവെന്ന പരാതികൾ ലഭിച്ചതായി അദ്ദേഹം പറഞ്ഞു.
ഡെലിവറി ജീവനക്കാർ വഴി ലഹരി കടത്ത് നടക്കുന്നുവെന്ന ആശങ്കയും ഉയരുന്നുണ്ടെന്ന് മന്ത്രി ചൂണ്ടിക്കാട്ടി. ഇത്തരം പ്രവണതകൾ അവസാനിപ്പിക്കണമെന്ന് അദ്ദേഹം കർശനമായി ആവശ്യപ്പെട്ടു.
‘‘ഓൺലൈനിൽ കൂടി വിളിച്ചു പറഞ്ഞാൽ ഫുഡ് കൊണ്ടുവരുന്നവരുണ്ടല്ലോ. അവരെപ്പറ്റിയും പരാതി ഉയർന്നിട്ടുണ്ട്. എനിക്ക് അവരോട് പറയാനുള്ളത്, ഇത് അവസാന മുന്നറിയിപ്പാണ്. ഈ പരിപാടി അവസാനിപ്പിക്കണം. അവരാണ് ലഹരി പലയിടത്തും കൊണ്ടു കൊടുക്കുന്നതെന്ന് വലിയ പരാതി ഉയർന്നു വരുന്നുണ്ട്. കാരണം അവരെ ആരും ചെക്ക് ചെയ്യാറില്ല. നിങ്ങൾ ഇത് അവസാനിപ്പിക്കണം. വെറുതെ നിയമത്തിനു മുന്നിൽ കൊണ്ടുവരേണ്ട അവസ്ഥ ഉണ്ടാക്കരുത്. ഇതുവരെ ചെയ്തതൊക്കെ ചെയ്തു. ഇനി ഇത് അവസാനിപ്പിക്കണം’’ – രമേശ് ചെന്നിത്തല പറഞ്ഞു.
‘‘ഇത് അവസാന മുന്നറിയിപ്പാണ്. നിയമവിരുദ്ധ പ്രവർത്തനങ്ങൾ ഇനി തുടർന്നാൽ ശക്തമായ നിയമനടപടികൾ സ്വീകരിക്കും’’ എന്ന് മന്ത്രി വ്യക്തമാക്കി.
ഓൺലൈൻ ഭക്ഷണവിതരണ മേഖലയിൽ പ്രവർത്തിക്കുന്ന ജീവനക്കാരെ അനാവശ്യമായി ദുരുപയോഗം ചെയ്യുന്നത് തടയാൻ കർശന പരിശോധനകൾ നടത്തുമെന്ന് അദ്ദേഹം അറിയിച്ചു. ആംബുലൻസുകൾ ഉൾപ്പെടെ വിവിധ സേവനങ്ങളെ ലഹരി കടത്തിനായി ഉപയോഗിക്കുന്നുവെന്ന പരാതികളും പരിശോധിക്കുന്നുണ്ടെന്നും മന്ത്രി പറഞ്ഞു.
ഓപ്പറേഷൻ തൂഫാനിന്റെ ഭാഗമായി പൊലീസ് പരിശോധനകൾ ശക്തമാക്കുകയും, ജനങ്ങളുടെ സഹകരണം അനിവാര്യമാണെന്നും മന്ത്രി കൂട്ടിച്ചേർത്തു. ജനങ്ങൾ “തൂഫാൻ വാരിയേഴ്സ്” ആയി മാറി ലഹരി വിരുദ്ധ പ്രവർത്തനങ്ങളിൽ പങ്കാളികളാകണമെന്ന് അദ്ദേഹം ആഹ്വാനം ചെയ്തു.
