കൊച്ചി: താരസംഘടനയായ ‘അമ്മ’യുടെ ഭരണച്ചുമതല ഇനി അഡ്ഹോക് കമ്മിറ്റിക്ക്. കോൺഗ്രസ് എംഎൽഎയും നടനുമായ രമേശ് പിഷാരടിയുടെ നേതൃത്വത്തിലുള്ള കമ്മിറ്റിക്കാണ് സംഘടനയുടെ താത്കാലിക ചുമതല കൈമാറിയത്. മുൻ എംഎൽഎയും നടനുമായ കെ ബി ഗണേഷ് കുമാറിനെയും അഡ്ഹോക് കമ്മിറ്റിയിൽ അംഗമാക്കി.
ശ്വേതാ മേനോന്റെ നേതൃത്വത്തിലുള്ള ഭരണസമിതി ഒന്നടങ്കം രാജിവെച്ച സാഹചര്യത്തിലാണ് പുതിയ ക്രമീകരണം. അഡ്ഹോക് കമ്മിറ്റിയുടെ കാലാവധി നാല് മാസമാണ്. ഈ കാലയളവിനുള്ളിൽ തിരഞ്ഞെടുപ്പ് നടത്തി പുതിയ ഭരണസമിതിയെ തിരഞ്ഞെടുക്കും.
സംഘടനയുടെ പ്രതിച്ഛായ പുനഃസ്ഥാപിക്കുമെന്ന പ്രതീക്ഷയിലായിരുന്നു വനിതാ നേതൃത്വത്തിലുള്ള ഭരണസമിതി അധികാരത്തിലെത്തിയത്. എന്നാൽ ആഭ്യന്തര ഭിന്നതകളും ആരോപണപ്രതിയോഗങ്ങളും ഭരണസമിതിയെ പ്രതിസന്ധിയിലാക്കി.
പ്രസിഡന്റ് സ്ഥാനത്ത് നിന്ന് രാജിവെച്ച ശ്വേത, സംഘടനയിൽ ചില കുറ്റാരോപിതർ വീണ്ടും സ്വാധീനം സ്ഥാപിക്കാൻ ശ്രമിക്കുന്നുവെന്ന ഗുരുതര ആരോപണം ഉന്നയിച്ചു. ചിലരെ സമ്മർദപ്പെടുത്തി അവിശ്വാസ പ്രമേയത്തിൽ ഒപ്പിടിച്ചതായും, മുൻകൂട്ടി തയ്യാറാക്കിയ അജണ്ടയുടെ ഭാഗമായാണ് ഭരണസമിതിയെ പുറത്താക്കാൻ ശ്രമിച്ചതെന്നും അവർ ആരോപിച്ചു.
വാർഷിക ജനറൽ ബോഡി യോഗത്തിൽ വാർഷിക റിപ്പോർട്ടും കണക്കുകളും അംഗീകരിക്കപ്പെടാതിരുന്നതോടെയാണ് പ്രതിസന്ധി രൂക്ഷമായത്. അംഗങ്ങൾ ചൂണ്ടിക്കാട്ടിയ വീഴ്ചകൾ ചർച്ചകൾക്ക് വഴിവെച്ചു. യോഗത്തിനിടെ ആദ്യം രാജി പ്രഖ്യാപിച്ച ശ്വേത മേനോനെ സഹപ്രവർത്തകർ അനുനയിപ്പിച്ചെങ്കിലും, പിന്നീട് 17 അംഗ എക്സിക്യൂട്ടീവ് കമ്മിറ്റിയും ഒരുമിച്ച് രാജിവെക്കുകയായിരുന്നു.
സംഘടനയുടെ അടുത്ത നാല് മാസം നിർണായകമാണെന്നാണ് വിലയിരുത്തൽ. പുതിയ നേതൃത്വം ‘അമ്മ’യിലെ വിശ്വാസ പ്രതിസന്ധി മറികടക്കുമോ എന്നതാണ് ഇപ്പോൾ ഉയരുന്ന പ്രധാന ചോദ്യം.
