ന്യൂഡല്ഹി: മെഡിക്കല് പ്രവേശനത്തിനായുള്ള നീറ്റ് യുജി പരീക്ഷയുടെ നടത്തിപ്പില് നിര്ണായക മാറ്റത്തിന് തയ്യാറെടുക്കുകയാണ് നാഷണല് ടെസ്റ്റിംഗ് ഏജന്സി (എന്ടിഎ). നിലവില് പേപ്പര് അടിസ്ഥാനത്തില് നടത്തുന്ന പരീക്ഷ അടുത്ത വര്ഷം മുതല് കമ്പ്യൂട്ടര് അധിഷ്ഠിത ഓണ്ലൈന് രീതിയിലേക്ക് മാറ്റുന്നതിനുള്ള നടപടികള് ആരംഭിച്ചതായി എന്ടിഎ ഡയറക്ടര് ജനറല് അഭിഷേക് സിംഗ് അറിയിച്ചു. ഇതുസംബന്ധിച്ച ഉന്നതതല സമിതിയുടെ ശുപാര്ശ കേന്ദ്രസര്ക്കാര് അംഗീകരിച്ചതോടെയാണ് നടപടികള് വേഗത്തിലായത്.
ഈ വര്ഷം മേയ് മൂന്നിന് നടന്ന നീറ്റ് പരീക്ഷയെ ചുറ്റിപ്പറ്റി ചോദ്യപ്പേപ്പര് ചോര്ച്ച ആരോപണങ്ങള് ഉയര്ന്ന പശ്ചാത്തലത്തിലാണ് പരീക്ഷാ സംവിധാനത്തില് സമഗ്ര മാറ്റം കൊണ്ടുവരാന് തീരുമാനിച്ചത്. രാജസ്ഥാനിലെ സികാര് മേഖലയില് പരീക്ഷയ്ക്ക് മുന്പേ പ്രചരിച്ച ചോദ്യാവലിയിലെ ചില ഭാഗങ്ങള് യഥാര്ഥ ചോദ്യപ്പേപ്പറുമായി സാമ്യമുള്ളതായി കണ്ടെത്തിയതോടെ സുരക്ഷാ സംവിധാനങ്ങള് ശക്തിപ്പെടുത്തേണ്ടതിന്റെ ആവശ്യകത ചര്ച്ചയായിരുന്നു.
അതേസമയം, പുനഃപരീക്ഷയുടെ ചോദ്യപ്പേപ്പര് ടെലിഗ്രാം വഴി ചോര്ന്നെന്ന തരത്തില് സമൂഹമാധ്യമങ്ങളില് പ്രചരിക്കുന്ന വീഡിയോയും സന്ദേശങ്ങളും വ്യാജമാണെന്ന് എന്ടിഎയും കേന്ദ്രസര്ക്കാരും വ്യക്തമാക്കി. വിദ്യാര്ഥികളില് ആശങ്കയും ആശയക്കുഴപ്പവും സൃഷ്ടിക്കാനുള്ള ഉദ്ദേശ്യത്തോടെയാണ് ഇത്തരം വ്യാജ പ്രചാരണങ്ങള് നടത്തുന്നതെന്ന് അധികൃതര് മുന്നറിയിപ്പ് നല്കി.
തെറ്റായ വിവരങ്ങള് മനപ്പൂര്വം പ്രചരിപ്പിക്കുന്നവര്ക്കെതിരെ സൈബര് ക്രൈം വിരുദ്ധ ഏജന്സിയായ ഐ4സി, പൊലീസ് എന്നിവയുടെ സഹായത്തോടെ കര്ശന നിയമനടപടികള് സ്വീകരിക്കുമെന്നും എന്ടിഎ അറിയിച്ചു. പരീക്ഷയുമായി ബന്ധപ്പെട്ട വിവരങ്ങള് ഔദ്യോഗിക വെബ്സൈറ്റുകളിലും അംഗീകൃത സാമൂഹ്യമാധ്യമ അക്കൗണ്ടുകളിലും നിന്ന് മാത്രമേ വിശ്വസിക്കാവൂ എന്നും വിദ്യാര്ഥികളോടും രക്ഷിതാക്കളോടും അഭ്യര്ഥിച്ചു.
ഇതിനിടെ, രാജസ്ഥാന് സ്പെഷ്യല് ഓപ്പറേഷന്സ് ഗ്രൂപ്പ് നടത്തിയ അന്വേഷണത്തില് പ്രചരിച്ച ചോദ്യാവലിയില് ഉള്പ്പെട്ട 720 ചോദ്യങ്ങളില് 600 എണ്ണം യഥാര്ഥ പരീക്ഷയിലെ ചോദ്യങ്ങളുമായി സാമ്യമുള്ളതായി കണ്ടെത്തിയിട്ടുണ്ട്. പരീക്ഷയ്ക്ക് രണ്ട് ദിവസം മുമ്പാണ് സികാറില് ചോദ്യാവലി വ്യാപകമായി പ്രചരിച്ചതെന്നും 20,000 രൂപ മുതല് രണ്ട് ലക്ഷം രൂപ വരെ ഈടാക്കി അത് വിറ്റഴിച്ചിരുന്നുവെന്നുമാണ് അന്വേഷണത്തില് വ്യക്തമായത്.
അന്വേഷണ റിപ്പോര്ട്ടുകള് പ്രകാരം പരീക്ഷയ്ക്ക് മുന്പ് ഏകദേശം 30,000 ചോദ്യാവലികള് വിവിധ മാര്ഗങ്ങളിലൂടെ കൈമാറപ്പെട്ടതായി സംശയിക്കുന്നു. ഇതോടെ ഭാവിയില് പരീക്ഷയുടെ വിശ്വാസ്യതയും സുരക്ഷയും ഉറപ്പാക്കാന് ഡിജിറ്റല് സംവിധാനങ്ങളിലേക്ക് മാറുന്നത് നിര്ണായക ചുവടുവയ്പ്പായിരിക്കുമെന്ന് വിലയിരുത്തപ്പെടുന്നു.
