കണ്ണൂർ: ഉംറ തീർഥാടകരുമായി കണ്ണൂർ വിമാനത്താവളത്തിലേക്ക് പോയ ബസിന് തീപിടിച്ച് കത്തി നശിച്ചു. മട്ടന്നൂർ ശിവപുരത്താണ് സംഭവം. വയനാട്ടിൽ നിന്ന് കണ്ണൂർ വിമാനത്താവളത്തിലേക്ക് യാത്രതിരിച്ച ബസിനാണ് തീപിടിച്ചത്.
തിങ്കളാഴ്ച രാത്രിയാണ് ബസ് വയനാട്ടിൽ നിന്ന് പുറപ്പെട്ടത്. ശിവപുരത്ത് എത്തിയപ്പോഴാണ് ബസിന്റെ പിറകുവശത്ത് നിന്ന് തീ പടരുന്നത് ശ്രദ്ധയിൽപ്പെട്ടത്. ബസിൽ 42 യാത്രക്കാരാണ് ഉണ്ടായിരുന്നത്.
സംഭവത്തെ തുടർന്ന് ബസ് ഉടൻ നിർത്തി ഉറങ്ങിക്കിടന്നിരുന്ന യാത്രക്കാരെ മുഴുവൻ പുറത്തേക്ക് മാറ്റി. അപകടത്തിൽ ആർക്കും പരിക്കേറ്റിട്ടില്ലെന്നാണ് ലഭിക്കുന്ന വിവരം.
നാട്ടുകാരും മട്ടന്നൂർ, കൂത്തുപറമ്പ് എന്നിവിടങ്ങളിൽ നിന്നെത്തിയ അഗ്നിശമന സേനയും ചേർന്നാണ് തീ അണച്ചത്. സമയോചിതമായ ഇടപെടലാണ് വൻ ദുരന്തം ഒഴിവാക്കാൻ കാരണമായത്.
