ടര്‍ഫ് ക്രിക്കറ്റിന് പുതിയ വേദി; കെസിഎല്‍ ഫാന്‍ ലീഗ് പ്രഖ്യാപിച്ച് കേരള ക്രിക്കറ്റ് അസോസിയേഷന്‍; രജിട്രേഷന്‍ ആരംഭിച്ചു

തിരുവനന്തപുരം: കേരളത്തിലെ ടര്‍ഫ് ക്രിക്കറ്റിനെ മുഖ്യധാരയിലേക്ക് ഉയര്‍ത്താനുള്ള നിര്‍ണായക ചുവടുവെപ്പുമായി കേരള ക്രിക്കറ്റ് അസോസിയേഷന്‍ (KCA). കേരള ക്രിക്കറ്റ് ലീഗിന്റെ (KCL) വന്‍ ജനപ്രീതിക്ക് പിന്നാലെ ആരാധകര്‍ക്കും അമേച്വര്‍ ക്രിക്കറ്റ് ടീമുകള്‍ക്കുമായി ‘കെസിഎല്‍ ഫാന്‍ ലീഗ്’ പ്രഖ്യാപിച്ചു. ടര്‍ഫ് ക്രിക്കറ്റിന് കൂടുതല്‍ അംഗീകാരവും മത്സരവേദിയും ഒരുക്കുകയെന്ന ലക്ഷ്യത്തോടെയാണ് പുതിയ ടൂര്‍ണമെന്റ് സംഘടിപ്പിക്കുന്നത്.

അത്യാധുനിക ക്രിക്കറ്റ് ടര്‍ഫുകളിലായി നടക്കുന്ന ടൂര്‍ണമെന്റ് സംസ്ഥാനത്തെ ക്രിക്കറ്റ് സംസ്‌കാരത്തിന് പുതിയ ദിശ നല്‍കുമെന്നാണ് കെസിഎയുടെ പ്രതീക്ഷ. നിലവില്‍ കെസിഎല്‍ ടീമുകളുള്ള തിരുവനന്തപുരം, കൊല്ലം, ആലപ്പുഴ, കൊച്ചി, തൃശൂര്‍, കോഴിക്കോട് ജില്ലകളിലാണ് ഫാന്‍ ലീഗ് അരങ്ങേറുക. ഓരോ ജില്ലയില്‍ നിന്നും 32 ടീമുകള്‍ക്ക് പങ്കെടുക്കാന്‍ അവസരമുണ്ട്.

11 അംഗങ്ങളുള്ള ടീമുകളാണ് രജിസ്റ്റര്‍ ചെയ്യേണ്ടത്. സോഫ്റ്റ് ടെന്നീസ് ബോള്‍ ഉപയോഗിച്ച് നോക്കൗട്ട് ഫോര്‍മാറ്റിലാണ് മത്സരങ്ങള്‍ നടക്കുക. ജൂലൈ 4, 5 – തിരുവനന്തപുരം, ജൂലൈ 11, 12 – കോഴിക്കോട്, ജൂലൈ 18, 19 – തൃശൂര്‍, ജൂലൈ 25, 26 – കൊച്ചി, ഓഗസ്റ്റ് 1, 2 – ആലപ്പുഴ, ഓഗസ്റ്റ് 8, 9 – കൊല്ലം എന്നിങ്ങനെയാണ് മത്സരക്രമം.

ജില്ലാതല ചാമ്പ്യന്മാരായ ആറു ടീമുകള്‍ പിന്നീട് ചാമ്പ്യന്‍സ് റൗണ്ടില്‍ ഏറ്റുമുട്ടും. പോയിന്റ് പട്ടികയില്‍ ആദ്യ രണ്ട് സ്ഥാനങ്ങളിലെത്തുന്ന ടീമുകളാണ് ഗ്രാന്‍ഡ് ഫൈനലില്‍ കെസിഎല്‍ ഫാന്‍ ലീഗ് കിരീടത്തിനായി പോരാടുക.

ജില്ലാതല മത്സരങ്ങളില്‍ ഒന്നാം സമ്മാനം: 25,000 + ട്രോഫി, രണ്ടാം സമ്മാനം: 15,000, രൂപയുമാണ്. സംസ്ഥാന ഫൈനലില്‍ ചാമ്പ്യന്‍മാര്‍ക്ക്: 30,000 + കെസിഎല്‍ ഫാന്‍ ലീഗ് ചാമ്പ്യന്‍സ് ട്രോഫി കൂടാതെ മത്സരത്തില്‍ പങ്കെടുക്കുന്ന എല്ലാ താരങ്ങള്‍ക്കും കേരള ക്രിക്കറ്റ് അസോസിയേഷന്റെ സര്‍ട്ടിഫിക്കറ്റും നല്‍കും. ഫാന്‍ ലീഗിലേക്കുള്ള രജിസ്‌ട്രേഷന്‍ പൂര്‍ണമായും സൗജന്യമാണ്.

പങ്കെടുക്കാന്‍ ആഗ്രഹിക്കുന്ന ടീമുകള്‍ തങ്ങളുടെ ടീമിനെ പരിചയപ്പെടുത്തുന്ന ഒരു മിനിറ്റ് ദൈര്‍ഘ്യമുള്ള വീഡിയോ തയ്യാറാക്കി സ്വന്തം സോഷ്യല്‍ മീഡിയ അക്കൗണ്ടില്‍ പോസ്റ്റ് ചെയ്യണം. വീഡിയോയുടെ അവതരണം, എഡിറ്റിങ് നിലവാരം, സോഷ്യല്‍ മീഡിയയിലെ സ്വീകാര്യത എന്നിവ വിലയിരുത്തിയാണ് ടീമുകളെ തിരഞ്ഞെടുക്കുക.

പോസ്റ്റ് ചെയ്യുമ്പോള്‍ @KeralaCricketAossciation , @kcl_t20 എന്നീ ഔദ്യോഗിക പേജുകള്‍ ടാഗ് ചെയ്യണം. തുടര്‍ന്ന് പോസ്റ്റിന്റെ ലിങ്ക് ബന്ധപ്പെട്ട ജില്ലയുടെ വാട്‌സ്ആപ്പ് നമ്പറിലേക്ക് അയച്ചാല്‍ രജിസ്‌ട്രേഷന്‍ പൂര്‍ത്തിയാകും.

ഐപിഎല്ലിന്റെ മാതൃകയില്‍ ആരംഭിച്ച കേരള ക്രിക്കറ്റ് ലീഗ് സംസ്ഥാന ക്രിക്കറ്റിന് നല്‍കിയ ജനപ്രീതിയുടെ തുടര്‍ച്ചയായാണ് കെസിഎല്‍ ഫാന്‍ ലീഗും വിലയിരുത്തപ്പെടുന്നത്. ടര്‍ഫ് ക്രിക്കറ്റില്‍ കഴിവ് തെളിയിക്കുന്ന ആയിരക്കണക്കിന് യുവാക്കള്‍ക്ക് വലിയ വേദിയും ഭാവിയില്‍ സംസ്ഥാന ക്രിക്കറ്റിലേക്കുള്ള സാധ്യതകളും തുറന്നുകൊടുക്കുന്ന പദ്ധതിയായിരിക്കും ഇതെന്നാണ് കായികലോകത്തിന്റെ പ്രതീക്ഷ.