ന്യൂഡല്ഹി: ഗര്ഭിണികള് മുതല് 18 വയസ്സ് വരെയുള്ള കുട്ടികളുടെ ആരോഗ്യവും പോഷകാഹാരവും വിദ്യാഭ്യാസവും ഒരൊറ്റ ഡിജിറ്റല് പ്ലാറ്റ്ഫോമിലൂടെ നിരീക്ഷിക്കാന് കേന്ദ്ര ആഭ്യന്തര-സഹകരണ മന്ത്രി അമിത് ഷാ ‘PM Family Care Tracker’ പദ്ധതിയുടെ പൈലറ്റ് പതിപ്പിന് തുടക്കമിട്ടു. ഗുജറാത്തിലെ ഗാന്ധിനഗറിലായിരുന്നു പദ്ധതിയുടെ ഉദ്ഘാടനം.
ജനന രജിസ്ട്രേഷന് നമ്പറോ (Birth Registration Number) ABHA IDയോ അടിസ്ഥാനമാക്കിയുള്ള പ്രത്യേക ഐഡിയിലൂടെ ഗര്ഭകാലം മുതല് കുട്ടി 18 വയസ്സ് തികയുന്നതുവരെയുള്ള വിവരങ്ങള് സമഗ്രമായി രേഖപ്പെടുത്തുന്നതാണ് പദ്ധതിയുടെ പ്രധാന സവിശേഷത. വിവിധ സര്ക്കാര് ഡാറ്റാബേസുകളെ ഏകോപിപ്പിക്കുന്ന സംവിധാനത്തിലൂടെ വാക്സിനേഷന്, പോഷകാഹാരക്കുറവ്, സ്കൂള് പ്രവേശനം, പഠനം നിര്ത്തല് തുടങ്ങിയ നിര്ണായക വിവരങ്ങള് തത്സമയം വിലയിരുത്താനും അപകടസാധ്യതകള് മുന്കൂട്ടി തിരിച്ചറിയാനും സംവിധാനത്തിന് കഴിയും.
പരിപാടിയെ അഭിസംബോധന ചെയ്ത് സംസാരിച്ച അമിത് ഷാ, കഴിഞ്ഞ 12 വര്ഷത്തിനിടെ രാജ്യത്തെ ആരോഗ്യരംഗത്ത് വലിയ മാറ്റങ്ങളാണ് ഉണ്ടായതെന്ന് പറഞ്ഞു. പദ്ധതികള് പ്രഖ്യാപിക്കുന്നതില് മാത്രമല്ല, അവയുടെ ആനുകൂല്യം അര്ഹരായ ഓരോരുത്തരിലേക്കും ഉറപ്പായും എത്തിക്കുന്നതിലാണ് കേന്ദ്ര സര്ക്കാരിന്റെ ശ്രദ്ധയെന്നും അദ്ദേഹം വ്യക്തമാക്കി.
‘PM Family Care Tracker’ ഡാഷ്ബോര്ഡിലൂടെ ഗര്ഭിണികള്ക്കും കുട്ടികള്ക്കും ലഭിക്കേണ്ട എല്ലാ ക്ഷേമപദ്ധതികളുടെയും ആനുകൂല്യങ്ങള് കൃത്യമായി തിരിച്ചറിഞ്ഞ് എത്തിക്കാനാകുമെന്നും അദ്ദേഹം പറഞ്ഞു.
പരിപാടിക്കിടെ കുട്ടികള്ക്കായുള്ള ‘ഹെല്ത്ത് പാസ്പോര്ട്ട്’ അമിത് ഷാ പ്രകാശനം ചെയ്തു. തുടര്ന്ന് പ്രധാനമന്ത്രി ഇ-ബസ് സേവന പദ്ധതിയുടെ ആദ്യഘട്ടത്തില് ഉള്പ്പെടുത്തിയ ഇലക്ട്രിക് ബസുകളുടെ ഫ്ലാഗ് ഓഫ് ചടങ്ങും അദ്ദേഹം നിര്വഹിച്ചു.
ആരോഗ്യം, വിദ്യാഭ്യാസം, പോഷകാഹാരം എന്നിവയെ ഒരൊറ്റ ഡിജിറ്റല് സംവിധാനത്തിലൂടെ ഏകോപിപ്പിച്ച് കുട്ടികളുടെ സമഗ്ര വികസനം ഉറപ്പാക്കുകയെന്ന ലക്ഷ്യത്തോടെയാണ് PM Family Care Tracker നടപ്പാക്കുന്നത്.
