കണ്ണൂർ: കണ്ണൂർ സെൻട്രൽ ജയിലിൽ തടവുകാർ തമ്മിലുണ്ടായ ഏറ്റുമുട്ടലിൽ സംഘർഷം. സംഘർഷം തടയാനെത്തിയ ജയിൽ ഉദ്യോഗസ്ഥരെയും തടവുകാർ ആക്രമിച്ചു. സംഭവത്തിൽ ഉദ്യോഗസ്ഥരും തടവുകാരും ഉൾപ്പെടെ 11 പേർക്ക് പരുക്കേറ്റു.
സെൻട്രൽ ജയിലിലെ ഒന്നാം ബ്ലോക്കിലായിരുന്നു ഇന്നലെ സംഘർഷം ഉണ്ടായത്. മലപ്പുറം സ്വദേശി ജലാലുദ്ദീൻ സെല്ലിനുള്ളിൽ ബ്ലേഡ് ഉപയോഗിച്ച് സ്വയം മുറിവേൽപ്പിച്ചതോടെയാണ് സംഭവങ്ങളുടെ തുടക്കം.
സംഭവം അറിഞ്ഞ് ജയിൽ ഉദ്യോഗസ്ഥർ സ്ഥലത്തെത്തിയതിനു പിന്നാലെ കാപ്പ കേസ് പ്രതികളായ ചില തടവുകാർ ഉദ്യോഗസ്ഥർക്കെതിരെ ആക്രമണം നടത്തുകയായിരുന്നു. ഇതോടെയാണ് സ്ഥിതി കൂടുതൽ സംഘർഷഭരിതമായത്.
സംഘർഷത്തിൽ 11 പേർക്ക് പരുക്കേറ്റെങ്കിലും ആരുടെയും പരുക്ക് ഗുരുതരമല്ലെന്നാണ് ലഭിക്കുന്ന വിവരം. സംഭവത്തെ തുടർന്ന് ജയിലിൽ സുരക്ഷ ശക്തമാക്കി.
