സേവാഭാരതി എടക്കരയ്ക്ക് 10 സെന്റ് ഭൂമി ദാനമായി നൽകി സേവനത്തിന്റെയും കാരുണ്യത്തിന്റെയും ഉജ്ജ്വല മാതൃകയായി അജിത് കുമാറും കുടുംബവും. ഒറ്റപ്ലാവ് സ്വദേശി അജിത് കുമാർ ഓട്ടോറിക്ഷ ഓടിച്ചാണ് കുടുംബം പോറ്റുന്നത്.
നാട്ടുകാരും വീട്ടുകാരും രാധേട്ടൻ എന്നാണ് അജിത് കുമാറിനെ വിളിക്കുന്നത്. തന്റെ അധ്വാനഫലത്തിൽ നിന്ന് ഒരു വിഹിതമാണ് അദ്ദേഹം സ്വന്തമായി വീടില്ലാത്തവരുടെ ജീവിതത്തിലേക്ക് പ്രത്യാശ പകരാൻ മാറ്റിവെച്ചത്. അത് ഒരു ഭൂമിദാനം മാത്രമായിരുന്നില്ല. മനുഷ്യസ്നേഹത്തിന്റെയും സാമൂഹിക ഉത്തരവാദിത്വത്തിന്റെയും മഹത്തായ സന്ദേശമായിരുന്നു.
ഈ ഭൂമിയിൽ ഭൂരഹിതരായ അർഹരായ രണ്ട് കുടുംബങ്ങൾക്ക് സുരക്ഷിതമായൊരു ഭവനം ഉയരും. വർഷങ്ങളായുള്ള അവരുടെ കാത്തിരിപ്പിനും കണ്ണീരിനും ആശ്വാസമായി മാറുന്ന ഈ മഹാദാനം, അനേകം ഹൃദയങ്ങളിൽ പ്രത്യാശയുടെ വെളിച്ചം തെളിയിക്കുകയും ചെയ്യും.
ഭൂമിയുടെ ആധാരം സേവാഭാരതി എടക്കര പ്രസിഡന്റ് സഹദേവനും ദേശീയ സേവാഭാരതി സംസ്ഥാന സെക്രട്ടറി സി. സത്യഭാമ ടീച്ചറും ചേർന്ന് ഔദ്യോഗികമായി ഏറ്റുവാങ്ങി. തുടർന്ന് സേവാഭാരതി എടക്കരയുടെ സ്നേഹോപഹാരമായ മംഗളപത്രം നൽകി രാധേട്ടനെയും കുടുംബത്തെയും ആദരിച്ചു.
