തിരുവനന്തപുരം: സംസ്ഥാനത്ത് വെള്ളിയാഴ്ച ആറുപേര്ക്ക് കൂടി ഷിഗെല്ല രോഗബാധ സ്ഥിരീകരിച്ചു. തിരുവനന്തപുരം, തൃശൂര്, മലപ്പുറം, കോഴിക്കോട്, വയനാട്, കണ്ണൂര് ജില്ലകളില് ഒരാള്ക്ക് വീതമാണ് രോഗം സ്ഥിരീകരിച്ചത്. ജൂണ് മാസം മുതല് സംസ്ഥാനത്ത് ആകെ 224 പേര്ക്കാണ് ഷിഗെല്ല ബാധ സ്ഥിരീകരിച്ചത്. ഇതില് ആറു പേര് മരിച്ചു. ഈ വര്ഷം ഇതുവരെ രോഗം സ്ഥിരീകരിച്ചവരുടെ എണ്ണം 300 ആയി.
ജൂണ് മുതല് ഏറ്റവും കൂടുതല് രോഗബാധ റിപ്പോര്ട്ട് ചെയ്തത് കോഴിക്കോട്, മലപ്പുറം, വയനാട് ജില്ലകളിലാണ്. മലപ്പുറത്ത് 37 പേര്ക്കും, തിരുവനന്തപുരത്ത് 20 പേര്ക്കും, കൊല്ലത്ത് 15 പേര്ക്കും, കണ്ണൂരില് 14 പേര്ക്കും രോഗം സ്ഥിരീകരിച്ചു. ഇതുകൂടാതെ പാലക്കാട് ആറ്, എറണാകുളം നാല്, ഇടുക്കി മൂന്ന്, പത്തനംതിട്ടയില് ഒരാള് എന്നിവര്ക്കും ജൂണ്-ജൂലൈ മാസങ്ങളില് ഷിഗെല്ല രോഗബാധ സ്ഥിരീകരിച്ചതായി ആരോഗ്യവകുപ്പ് അറിയിച്ചു.
ഷിഗെല്ല വ്യാപനത്തിന്റെ പശ്ചാത്തലത്തില് ശുചിത്വം പാലിക്കണമെന്നും, തിളപ്പിച്ചാറിയ വെള്ളം മാത്രം കുടിക്കണമെന്നും, രോഗലക്ഷണങ്ങള് പ്രകടമായാല് ഉടന് ചികിത്സ തേടണമെന്നും ആരോഗ്യവിദഗ്ധര് നിര്ദേശിക്കുന്നു.