ന്യൂഡല്‍ഹി: ഇ-റിക്ഷകളുടെയും മറ്റ് ഇലക്ട്രിക് വാഹനങ്ങളുടെയും ബാറ്ററി വിദൂര നിയന്ത്രണത്തിലൂടെ പ്രവര്‍ത്തനരഹിതമാക്കാന്‍ കഴിയുമെന്ന ആശങ്കയെ തുടര്‍ന്ന് ഏഴ് മൊബൈല്‍ ആപ്പുകള്‍ നീക്കം ചെയ്യാന്‍ കേന്ദ്ര സര്‍ക്കാര്‍ ഗൂഗിളിനും ആപ്പിളിനും നിര്‍ദേശം നല്‍കി. വാഹനസുരക്ഷയ്‌ക്കും യാത്രക്കാരുടെ സുരക്ഷയ്‌ക്കും ഭീഷണിയാകുന്ന സാഹചര്യത്തിലാണ് ഇലക്ട്രോണിക്‌സ് ആന്‍ഡ് ഇന്‍ഫര്‍മേഷന്‍ ടെക്നോളജി മന്ത്രാലയം നടപടി സ്വീകരിച്ചത്.
ഗൂഗിള്‍ പ്ലേ സ്റ്റോറിലും ആപ്പിള്‍ ആപ്പ് സ്റ്റോറിലും ലഭ്യമായ BAT-BMS, SMART BMS, LOSSIGY ഉള്‍പ്പെടെയുള്ള ആപ്പുകളാണ് നീക്കം ചെയ്യാന്‍ നിര്‍ദേശിച്ചിരിക്കുന്നതെന്ന് റിപ്പോര്‍ട്ടുകള്‍ പറയുന്നു. ബാറ്ററി മാനേജ്‌മെന്റ് സിസ്റ്റങ്ങളില്‍ അനധികൃതമായി ഇടപെടാന്‍ ഈ ആപ്പുകള്‍ ഉപയോഗിക്കപ്പെടാനുള്ള സാധ്യതയാണ് സര്‍ക്കാരിന്റെ പ്രധാന ആശങ്ക.
ഡല്‍ഹിയില്‍ ഓടിക്കൊണ്ടിരുന്ന ഇ-റിക്ഷകളുടെ ബാറ്ററി സ്മാര്‍ട്ട്‌ഫോണ്‍ ആപ്പുകള്‍ ഉപയോഗിച്ച് വിദൂരത്തുനിന്ന് ഓഫ് ചെയ്യുന്ന വീഡിയോകള്‍ സമൂഹമാധ്യമങ്ങളില്‍ വ്യാപകമായി പ്രചരിച്ചതോടെയാണ് വിഷയം ശ്രദ്ധയില്‍പ്പെട്ടത്. ബാറ്ററി പെട്ടെന്ന് പ്രവര്‍ത്തനം നിര്‍ത്തിയതോടെ വാഹനങ്ങള്‍ നടുറോഡില്‍ നിലച്ച സംഭവങ്ങള്‍ യാത്രക്കാരുടെയും ഡ്രൈവര്‍മാരുടെയും സുരക്ഷയെക്കുറിച്ചുള്ള ആശങ്ക വര്‍ധിപ്പിച്ചു.
ഈ ആപ്പുകള്‍ ആദ്യം വികസിപ്പിച്ചത് ബാറ്ററിയുടെ ആരോഗ്യം പരിശോധിക്കാനും ചാര്‍ജിങ് നില നിരീക്ഷിക്കാനും ബാറ്ററി ക്രമീകരണങ്ങള്‍ നിയന്ത്രിക്കാനുമാണ്. എന്നാല്‍ ചില ബാറ്ററി മാനേജ്‌മെന്റ് സിസ്റ്റങ്ങളിലെ സുരക്ഷാ വീഴ്ചകള്‍ ഉപയോഗപ്പെടുത്തി ബ്ലൂടൂത്ത് വഴി പാസ്വേഡ് പരിശോധനയില്ലാതെ കണക്ട് ചെയ്ത് ‘Discharge’ സംവിധാനം പ്രവര്‍ത്തിപ്പിച്ച് വാഹനത്തിന്റെ വൈദ്യുതി വിതരണം വിച്ഛേദിക്കാന്‍ സാധിച്ചതായാണ് അന്വേഷണത്തില്‍ കണ്ടെത്തിയത്.
സംഭവങ്ങളെ തുടര്‍ന്ന് നിരവധി ഇ-റിക്ഷകള്‍ നടുറോഡില്‍ നിലച്ചതോടെ ഗതാഗത തടസ്സവും യാത്രക്കാര്‍ക്ക് ബുദ്ധിമുട്ടും ഉണ്ടായി. ചില ഡ്രൈവര്‍മാര്‍ക്ക് വാഹനങ്ങള്‍ തള്ളിക്കൊണ്ട് സര്‍വീസ് സെന്ററുകളിലെത്തിക്കേണ്ട സാഹചര്യം പോലും നേരിട്ടതായി റിപ്പോര്‍ട്ടുകളുണ്ട്. സംഭവത്തില്‍ ഡല്‍ഹി സര്‍ക്കാര്‍ അന്വേഷണം ആരംഭിച്ചിട്ടുണ്ട്. ഇത്തരം സാങ്കേതികവിദ്യ ദുരുപയോഗം ചെയ്യുന്നത് നിയമവിരുദ്ധമാണെന്ന് ഡല്‍ഹി ഗതാഗത മന്ത്രി പങ്കജ് സിങ് വ്യക്തമാക്കി.
സമാന സുരക്ഷാ വീഴ്ചകള്‍ മറ്റ് ബാറ്ററി മാനേജ്‌മെന്റ് ആപ്പുകളിലുമുണ്ടോയെന്നും ഇലക്ട്രിക് വാഹനങ്ങള്‍ക്ക് കൂടുതല്‍ ശക്തമായ സൈബര്‍ സുരക്ഷാ മാനദണ്ഡങ്ങള്‍ വേണമോയെന്നും ബന്ധപ്പെട്ട ഏജന്‍സികള്‍ പരിശോധിച്ചുവരികയാണ്.
