മെല്‍ബണ്‍: ഓസ്‌ട്രേലിയന്‍ സന്ദര്‍ശനത്തിന് ദിവസങ്ങള്‍ മാത്രം ബാക്കി നില്‍ക്കെ പ്രധാനമന്ത്രി നരേന്ദ്ര മോദിക്കെതിരെ വധഭീഷണി. ജൂലൈ എട്ടിന് മെല്‍ബണില്‍ നടക്കുന്ന സന്ദര്‍ശനത്തിന് മുന്നോടിയായാണ് ഓണ്‍ലൈനിലൂടെ ഭീഷണി സന്ദേശം ലഭിച്ചതെന്ന് ഓസ്‌ട്രേലിയന്‍ മാധ്യമങ്ങള്‍ റിപ്പോര്‍ട്ട് ചെയ്തു.
മെല്‍ബണിലെ ഇന്ത്യന്‍ വംശജര്‍ സംഘടിപ്പിക്കുന്ന ‘മെല്‍ബണ്‍ മീറ്റ് മോദി’ പരിപാടിയുമായി ബന്ധപ്പെട്ട ഫേസ്ബുക്ക് പോസ്റ്റിന് താഴെയായിരുന്നു ഭീഷണി സന്ദേശം പ്രത്യക്ഷപ്പെട്ടത്. ‘ഓസ്‌ട്രേലിയയില്‍ വന്നാല്‍ മരണമായിരിക്കും ഫലം’ എന്നും ചടങ്ങ് നടക്കുന്ന സ്റ്റേഡിയം അടച്ചിടുന്നതാണ് നല്ലതെന്നും കമന്റില്‍ പറയുന്നുണ്ട്.
സംഭവത്തെ തുടര്‍ന്ന് ഓസ്‌ട്രേലിയന്‍ ഫെഡറല്‍ പോലീസ് അന്വേഷണം ആരംഭിച്ചു. ഭീഷണി സന്ദേശം പോസ്റ്റ് ചെയ്ത ഐപി അഡ്രസ് പോലീസ് തിരിച്ചറിഞ്ഞതായാണ് റിപ്പോര്‍ട്ട്. ഈ ഐപി അഡ്രസ് മുമ്പ് ഏതെങ്കിലും ക്രിമിനല്‍ കേസുകളുമായി ബന്ധപ്പെട്ടിട്ടുണ്ടോയെന്നും സന്ദേശത്തിന് പിന്നിലെ സാഹചര്യങ്ങളും വിശദമായി പരിശോധിച്ചുവരികയാണ്.
ജൂലൈ എട്ടിന് മെല്‍ബണിലെത്തുന്ന പ്രധാനമന്ത്രി നരേന്ദ്ര മോദി ഇന്ത്യന്‍ വംശജരുമായി കൂടിക്കാഴ്ച നടത്തും. ഇന്ത്യയും ഓസ്‌ട്രേലിയയും തമ്മിലുള്ള കാര്‍ഷിക സഹകരണം ഉള്‍പ്പെടെയുള്ള സുപ്രധാന വിഷയങ്ങളിലും ചര്‍ച്ചകള്‍ നടക്കാനിരിക്കെയാണ് സുരക്ഷാ ഭീഷണി ഉയര്‍ന്നിരിക്കുന്നത്. സംഭവത്തിന്റെ പശ്ചാത്തലത്തില്‍ മെല്‍ബണില്‍ സുരക്ഷാ ക്രമീകരണങ്ങള്‍ കൂടുതല്‍ ശക്തമാക്കിയതായി ഓസ്‌ട്രേലിയന്‍ മാധ്യമങ്ങള്‍ റിപ്പോര്‍ട്ട് ചെയ്തു.
