ഡാലസ്: പോര്ച്ചുഗലിനെ എതിരില്ലാത്ത ഒരു ഗോളിന് കീഴടക്കി ഫിഫ ലോകകപ്പിന്റെ ക്വാര്ട്ടര് ഫൈനലിലെത്തിയ സ്പെയിന്, ചരിത്രത്തിലാദ്യമായി ഒരു ലോകകപ്പില് തുടര്ച്ചയായി ഏറ്റവും കൂടുതല് മത്സരങ്ങളില് ഗോള് വഴങ്ങാത്ത ടീമെന്ന ലോക റെക്കോഡും സ്വന്തമാക്കി.
പോര്ച്ചുഗലിനെതിരായ പ്രീ-ക്വാര്ട്ടര് മത്സരത്തിലെ വിജയത്തോടെ സ്പെയിന് തുടര്ച്ചയായി ആറ് ലോകകപ്പ് മത്സരങ്ങളില് ഒരു ഗോള് പോലും വഴങ്ങാതെ മുന്നേറി. ഇതോടെ 1990-ല് ഇറ്റലിയും 2006 മുതല് 2010 വരെയുള്ള കാലയളവില് സ്വിറ്റ്സര്ലന്ഡും സ്ഥാപിച്ച തുടര്ച്ചയായ അഞ്ച് ക്ലീന് ഷീറ്റ് മത്സരങ്ങളുടെ റെക്കോഡ് സ്പാനിഷ് സംഘം മറികടന്നു.
സ്പാനിഷ് ഗോള്കീപ്പര് ഉനായ് സിമോണിനെ കഴിഞ്ഞ 609 മത്സര മിനിറ്റുകളായി എതിരാളികള്ക്ക് മറികടന്ന് ഗോള് നേടാനായിട്ടില്ല. പ്രതിരോധത്തിലെ അച്ചടക്കവും സിമോണിന്റെ മികച്ച പ്രകടനവുമാണ് ഈ ചരിത്രനേട്ടത്തിന് അടിത്തറയായത്.
2022 ലോകകപ്പില് മൊറോക്കോയ്ക്കെതിരായ മത്സരത്തിലാണ് സ്പെയിന്റെ ക്ലീന് ഷീറ്റ് പരമ്പരയ്ക്ക് തുടക്കമായത്. നിശ്ചിത സമയത്തും അധികസമയത്തും ഗോള്രഹിത സമനിലയില് അവസാനിച്ച മത്സരം പെനാല്റ്റി ഷൂട്ടൗട്ടിലാണ് സ്പെയിന് തോറ്റത്. ഷൂട്ടൗട്ടിലെ ഗോളുകള് ഔദ്യോഗിക മത്സരഫലത്തില് ഉള്പ്പെടാത്തതിനാല് ആ മത്സരവും ക്ലീന് ഷീറ്റായാണ് കണക്കാക്കുന്നത്.
2026 ലോകകപ്പില് കേപ് വെര്ദെയെതിരെ ഗോള്രഹിത സമനിലയോടെയാണ് സ്പെയിന് തുടങ്ങിയത്. തുടര്ന്ന് സൗദി അറേബ്യയെ 4-0നും, ഉറുഗ്വായെ 1-0നും പരാജയപ്പെടുത്തി. റൗണ്ട് ഓഫ് 32-ല് ഓസ്ട്രിയയെ 3-0ന് കീഴടക്കിയതോടെ അഞ്ചാം ക്ലീന് ഷീറ്റ് പൂര്ത്തിയാക്കി. ഒടുവില് പോര്ച്ചുഗലിനെതിരായ 1-0 വിജയത്തോടെ തുടര്ച്ചയായ ആറ് ക്ലീന് ഷീറ്റെന്ന ലോക റെക്കോഡും സ്പെയിന് സ്വന്തമാക്കി.
ഈ നേട്ടത്തോടെ ഒരു ലോകകപ്പിന്റെ ആദ്യ അഞ്ച് മത്സരങ്ങളിലും ക്ലീന് ഷീറ്റ് നിലനിര്ത്തുന്ന ആദ്യ പുരുഷ ടീം എന്ന ചരിത്രനേട്ടവും സ്പെയിന് സ്വന്തമാക്കി. ശക്തമായ പ്രതിരോധവും അച്ചടക്കമുള്ള പ്രകടനവും കാഴ്ചവെച്ച് കിരീടപ്പോരാട്ടത്തില് സ്പാനിഷ് സംഘം കരുത്ത് തെളിയിക്കുകയാണ്.
