കൊച്ചി: നടി മാല പാർവതിയുടെ മലപ്പുറം ജില്ലയെ കുറിച്ചുള്ള പരാമർശത്തെ പരിഹസിച്ച് തള്ളി സോഷ്യൽ മീഡിയ. ഒരു ടെലിവിഷൻ ചർച്ചയ്‌ക്കിടെ നടത്തിയ പരാമർശമാണ് വ്യാപക പരിഹാസത്തിനും വിമർശനത്തിന് ഇടയാക്കിയത്. “നാളെ മലപ്പുറത്തെ ഒരു കാശ്മീരായി മുദ്രകുത്തി അവിടെ പ്രസിഡന്റ് ഭരണം വന്നാൽ തമിഴ്നാടും നമ്മളുമല്ലാതെ ആരും ചോദിക്കില്ല” എന്നായിരുന്നു മാല പാർവതിയുടെ ചാനൽ ചർച്ചയിലെ വാക്കുകൾ.
വിഷയത്തിൽ മാല പാർവതിയെ പരിഹസിച്ച് രാഷ്‌ട്രീയ നിരീക്ഷകൻ ശ്രീജിത്ത് പണിക്കർ പങ്കുവെച്ച കുറിപ്പ് വലിയ കയ്യടി നേടുകയാണ്. രാഷ്ട്രപതി ഭരണം സംബന്ധിച്ച അടിസ്ഥാന ധാരണ പോലും ഇല്ലാതെയാണ് മാല പാർവതി സംസാരിക്കുന്നതെന്ന് ശ്രീജിത്ത് പണിക്കർ ചൂണ്ടിക്കാട്ടി.
“അമ്മ സംഘടനയിലെ പ്രശ്നങ്ങൾക്കുള്ള പരിഹാരം എന്താണെന്ന് എനിക്കറിയില്ല. പക്ഷേ പരസ്യമായി ഇത്തരത്തിലുള്ള വിവരക്കേട് പറയുന്നത് ഒഴിവാക്കാൻ സംഘടനയിൽ പൊതുവിജ്ഞാന ക്ലാസ് വെക്കുന്നത് നന്നായിരിക്കും എന്നാണ് എന്റെയൊരു അഭിപ്രായം. ഒരു ജില്ലയ്ക്ക് മാത്രമായി രാഷ്ട്രപതി ഭരണം നടപ്പാക്കാൻ ഭരണഘടനയിൽ വ്യവസ്ഥയില്ല ചേച്ചീ,” എന്നാണ് ശ്രീജിത്ത് പണിക്കർ ഫേസ്ബുക്കിൽ കുറിച്ചത്.
ഇന്ത്യൻ ഭരണഘടനയുടെ 356-ാം അനുച്ഛേദം പ്രകാരം രാഷ്ട്രപതി ഭരണം ഒരു സംസ്ഥാനത്തിലോ കേന്ദ്രഭരണ പ്രദേശങ്ങളിലോ ഏർപ്പെടുത്താനാണ് വ്യവസ്ഥയുള്ളത്. ഒരു ജില്ലയിൽ മാത്രം രാഷ്ട്രപതി ഭരണം ഏർപ്പെടുത്താൻ ഭരണഘടനയിൽ പ്രത്യേക വ്യവസ്ഥയില്ല.
