മെല്ബണ്: ഓസ്ട്രേലിയയില് നിന്ന് ഇന്ത്യയിലേക്ക് സമാധാനപരമായ ആവശ്യങ്ങള്ക്ക് മാത്രമായി യുറേനിയം കയറ്റുമതി ചെയ്യുന്നതിനുള്ള ഭരണപരമായ നടപടികള് പൂര്ത്തിയായതായി ഇന്ത്യയും ഓസ്ട്രേലിയയും സംയുക്തമായി പ്രഖ്യാപിച്ചു. മെല്ബണില് പ്രധാനമന്ത്രി നരേന്ദ്ര മോദിയും ഓസ്ട്രേലിയന് പ്രധാനമന്ത്രി ആന്റണി അല്ബനീസും നടത്തിയ ഉഭയകക്ഷി ചര്ച്ചകള്ക്കൊടുവിലാണ് നിര്ണായക പ്രഖ്യാപനം.
2015-ല് ഒപ്പുവെച്ച ഇന്ത്യ-ഓസ്ട്രേലിയ ആണവ സഹകരണ കരാറിന്റെ ഭാഗമായി, അന്താരാഷ്ട്ര ആണവോര്ജ ഏജന്സിയുടെ സുരക്ഷാ മാനദണ്ഡങ്ങള് പാലിച്ചുകൊണ്ട് സമാധാനപരമായ ആവശ്യങ്ങള്ക്കായി മാത്രം ഓസ്ട്രേലിയന് യുറേനിയം ഇന്ത്യയിലേക്ക് കയറ്റുമതി ചെയ്യാനാണ് ധാരണയായത്. ഓസ്ട്രേലിയന് യുറേനിയം ഇന്ത്യയുടെ ആണവോര്ജ ഉല്പ്പാദനം വര്ധിപ്പിക്കാനും ഫോസില് ഇന്ധനങ്ങളിലുള്ള ആശ്രയം കുറയ്ക്കാനും സഹായിക്കുമെന്ന് പ്രധാനമന്ത്രി ആന്റണി അല്ബനീസ് പറഞ്ഞു.
ഊര്ജസുരക്ഷ, വിതരണ ശൃംഖലകളുടെ പ്രതിരോധശേഷി, നവീന ഊര്ജ വികസനം, കുറഞ്ഞ കാര്ബണ് ഇന്ധനങ്ങളുടെ ഉപയോഗം എന്നിവയില് സഹകരണം ശക്തിപ്പെടുത്താനും ഇരുരാജ്യങ്ങളും തീരുമാനിച്ചു. തുറന്ന വിപണിയും നിയമാധിഷ്ഠിത വ്യാപാര സംവിധാനവും സാമ്പത്തിക സുരക്ഷയ്ക്ക് അനിവാര്യമാണെന്നും സംയുക്ത പ്രസ്താവനയില് വ്യക്തമാക്കി.
പശ്ചിമേഷ്യയിലെ സംഘര്ഷവും അതിന്റെ പ്രത്യാഘാതങ്ങളും ഊര്ജവിതരണ ശൃംഖലകളെയും ആഗോള വിപണിയെയും ബാധിക്കുന്നതില് ഇന്ത്യയും ഓസ്ട്രേലിയയും ആശങ്ക രേഖപ്പെടുത്തി. ഇത്തരം വെല്ലുവിളികള്ക്കിടയിലും ഊര്ജോല്പ്പന്നങ്ങളുടെ സ്ഥിരവും സുരക്ഷിതവും വിശ്വസനീയവുമായ വിതരണം ഉറപ്പാക്കുന്നതിനുള്ള പ്രതിബദ്ധത ഇരുരാജ്യങ്ങളും ആവര്ത്തിച്ചു.
കല്ക്കരി, പ്രകൃതി വാതകം, ഡീസല് ഉള്പ്പെടെയുള്ള ഊര്ജോല്പ്പന്നങ്ങളുടെ വ്യാപാരം കൂടുതല് ശക്തിപ്പെടുത്താനും പസഫിക് ദ്വീപ് രാജ്യങ്ങളുടെ ഊര്ജസുരക്ഷ ഉറപ്പാക്കുന്നതിനായി സഹകരിക്കാനും ധാരണയായി. ഇന്ത്യയുടെ ഗ്ലോബല് ബയോഫ്യൂവല്സ് അലയന്സ് സംരംഭത്തെയും ഓസ്ട്രേലിയ സ്വാഗതം ചെയ്തു.
പ്രതിരോധ മേഖലയിലും സഹകരണം വിപുലീകരിക്കാന് ഇരുരാജ്യങ്ങളും തീരുമാനിച്ചു. പ്രതിരോധ സാമഗ്രികളും സേവനങ്ങളും സംബന്ധിച്ച ധാരണാപത്രം രൂപീകരിക്കുന്നതിനുള്ള നടപടികള് പുരോഗമിക്കുകയാണെന്ന് നേതാക്കള് അറിയിച്ചു. പ്രതിരോധ വ്യവസായ രംഗത്തെ സ്വകാര്യ പങ്കാളിത്തം വര്ധിപ്പിക്കുന്നതിനും സംയുക്ത നിക്ഷേപങ്ങള് പ്രോത്സാഹിപ്പിക്കുന്നതിനും ഇരുരാജ്യങ്ങളും പ്രതിബദ്ധത അറിയിച്ചു. ഇന്ത്യ-ഓസ്ട്രേലിയ സാമ്പത്തിക സഹകരണ-വ്യാപാര കരാര്, സമഗ്ര സാമ്പത്തിക സഹകരണ കരാര് സംബന്ധിച്ച ചര്ച്ചകള് എന്നിവയിലൂടെ ഉഭയകക്ഷി വ്യാപാരവും നിക്ഷേപവും കൂടുതല് ശക്തിപ്പെടുത്തുമെന്നും സംയുക്ത പ്രസ്താവനയില് വ്യക്തമാക്കി.
