തൃശൂർ: തൃശൂർ തളിക്കുളത്ത് കടലിൽ കുളിക്കാനിറങ്ങിയ തമിഴ്നാട് സ്വദേശി മുങ്ങിമരിച്ചു. തിരുവാണി സ്വദേശിയായ തമിഴഴകൻ (27) ആണ് മരിച്ചത്.
തളിക്കുളം സ്നേഹതീരം ബീച്ചിന് വടക്ക് ചെമ്മീൻകെട്ടിന് സമീപം ഞായറാഴ്ചയാണ് അപകടമുണ്ടായത്. തമിഴഴകനും 13 സുഹൃത്തുക്കളുമടങ്ങുന്ന സംഘം കടലിൽ കുളിക്കാനിറങ്ങിയപ്പോഴാണ് ശക്തമായ ചുഴിയിൽപ്പെട്ടത്.
ചുഴിയിൽപ്പെട്ട മറ്റുള്ളവർ സുരക്ഷിതമായി രക്ഷപ്പെട്ടെങ്കിലും തമിഴഴകനെ കാണാതാവുകയായിരുന്നു. തുടർന്ന് നടത്തിയ തിരച്ചിലിലാണ് യുവാവിനെ കണ്ടെത്തിയത്. ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
സംഭവത്തെ തുടർന്ന് പ്രദേശത്ത് പൊലീസ് ഉൾപ്പെടെയുള്ള രക്ഷാപ്രവർത്തകർ പരിശോധന നടത്തി. അപകടത്തിന്റെ സാഹചര്യങ്ങൾ സംബന്ധിച്ച് അന്വേഷണം പുരോഗമിക്കുകയാണ്.
