ലണ്ടന്: ലോക ഒന്നാം നമ്പര് താരം യാനിക് സിന്നര് വിംബിള്ഡണില് തന്റെ ആധിപത്യം തുടര്ന്നു. ജര്മ്മനിയുടെ അലക്സാണ്ടര് സ്വരേവിനെ ഫൈനലില് തോല്പ്പിച്ച് തുടര്ച്ചയായ രണ്ടാം വര്ഷവും പുരുഷ സിംഗിള്സ് കിരീടം സ്വന്തമാക്കിയ സിന്നര്, വിംബിള്ഡണ് കിരീടം വിജയകരമായി നിലനിര്ത്തുന്ന ഓപ്പണ് എറയിലെ ഒമ്പതാമത്തെ താരമായി ചരിത്രത്തില് ഇടം നേടി. ഇതോടെ വിംബിള്ഡണ് കിരീടം തുടര്ച്ചയായി നേടുന്ന ആദ്യ ഇറ്റാലിയന് താരമെന്ന അപൂര്വ നേട്ടവും 24-കാരന് സ്വന്തമാക്കി.
2025ല് ആദ്യമായി വിംബിള്ഡണ് കിരീടം നേടി ഇറ്റലിക്ക് ചരിത്രവിജയം സമ്മാനിച്ച സിന്നര്, ഇത്തവണ ഫൈനലില് ആദ്യ സെറ്റ് നഷ്ടപ്പെട്ട ശേഷമാണ് ശക്തമായ തിരിച്ചുവരവ് നടത്തിയത്. സ്വരേവ് ആദ്യ സെറ്റ് 7-6ന് സ്വന്തമാക്കിയെങ്കിലും, രണ്ടാം സെറ്റിലെ ടൈബ്രേക്കില് വിജയിച്ച സിന്നര് പിന്നീട് മത്സരം പൂര്ണമായും നിയന്ത്രണത്തിലാക്കി. മൂന്നും നാലും സെറ്റുകള് 6-3, 6-4ന് നേടി കിരീടം നിലനിര്ത്തുകയായിരുന്നു.
ഓപ്പണ് എറയില് വിംബിള്ഡണ് കിരീടം തുടര്ച്ചയായി നിലനിര്ത്തിയ താരങ്ങളുടെ പട്ടികയില് റോഡ് ലേവര്, ജോണ് ന്യൂകോംബ്, ബ്യോണ് ബോര്ഗ്, ജോണ് മക്കെന്റോ, ബോറിസ് ബെക്കര്, പീറ്റ് സാംപ്രസ്, റോജര് ഫെഡറര്, കാര്ലോസ് അല്ക്കാരസ് എന്നിവര്ക്കൊപ്പമാണ് ഇനി സിന്നറിന്റെ സ്ഥാനം.
2024ല് ഓസ്ട്രേലിയന് ഓപ്പണും യുഎസ് ഓപ്പണും നേടിയ സിന്നര് അതേ വര്ഷം എടിപി ഫൈനല്സും മൂന്ന് മാസ്റ്റേഴ്സ് 1000 കിരീടങ്ങളും സ്വന്തമാക്കി വര്ഷാവസാനം ലോക ഒന്നാം നമ്പറിലെത്തി. 2025ല് ഓസ്ട്രേലിയന് ഓപ്പണ് നിലനിര്ത്തിയ താരം വിംബിള്ഡണ് ഉള്പ്പെടെ നിരവധി കിരീടങ്ങള് കൂടി നേടി അഞ്ചു തുടര്ച്ചയായ ഗ്രാന്ഡ്സ്ലാം ഫൈനലിലെത്തി.
2026ല് ഇന്ത്യന് വെല്സ്, മയാമി, മോണ്ടെ കാര്ലോ, മാഡ്രിഡ്, റോം എന്നീ അഞ്ച് തുടര്ച്ചയായ മാസ്റ്റേഴ്സ് 1000 കിരീടങ്ങള് നേടി കരിയര് ഗോള്ഡന് മാസ്റ്റേഴ്സ് പൂര്ത്തിയാക്കിയ ഏറ്റവും പ്രായം കുറഞ്ഞ താരമായും സിന്നര് മാറി. സെമിയില് 24 ഗ്രാന്ഡ്സ്ലാം കിരീട ജേതാവായ നോവാക് ജോക്കോവിച്ചിനെ 6-4, 6-4, 6-4 എന്ന സ്കോറിന് തകര്ത്താണ് ഫൈനലിലെത്തിയത്. ഇതോടെ ജോക്കോവിച്ചിന്റെ റെക്കോര്ഡ് 25-ാം ഗ്രാന്ഡ്സ്ലാം കിരീട സ്വപ്നത്തിനും വിരാമമായി.
