തിരുവനന്തപുരം: വരാനിരിക്കുന്ന ആഭ്യന്തര ക്രിക്കറ്റ് സീസണിനുള്ള തയ്യാറെടുപ്പുകളുടെ ഭാഗമായി കേരള ക്രിക്കറ്റ് അസോസിയേഷന് (കെസിഎ) സീനിയര് പുരുഷ ടീമിനെ ജമ്മു കശ്മീരിലേക്ക് അയയ്ക്കുന്നു. ശ്രീനഗറില് നടക്കുന്ന പരിശീലന പര്യടനത്തില് ജമ്മു കശ്മീര് സീനിയര് പുരുഷ ടീമിനെതിരെ രണ്ട് മള്ട്ടി-ഡേ പരിശീലന മത്സരങ്ങളാണ് കേരളം കളിക്കുക.
ഈ മാസം 23 മുതല് 29 വരെ നടക്കുന്ന മത്സരങ്ങള്ക്കായി 14 അംഗ ടീമിനെ കെസിഎ പ്രഖ്യാപിച്ചു. വിഷ്ണു വിനോദ് ടീമിനെ നയിക്കും. കഴിഞ്ഞ സീസണിലെ രഞ്ജി ട്രോഫി ചാമ്പ്യന്മാരായ ജമ്മു കശ്മീരിനെതിരെയാണ് കേരളത്തിന്റെ പരിശീലന മത്സരങ്ങള് നടക്കുന്നത്. ആഭ്യന്തര സീസണിന് മുമ്പ് വ്യത്യസ്ത കാലാവസ്ഥയിലും കഠിന പിച്ച് സാഹചര്യങ്ങളിലും കളിച്ച് താരങ്ങള്ക്ക് മികച്ച മത്സരപരിചയം നേടിക്കൊടുക്കുക എന്ന ലക്ഷ്യത്തോടെയാണ് പര്യടനം സംഘടിപ്പിച്ചിരിക്കുന്നത്.
രഞ്ജി ട്രോഫി ഉള്പ്പെടെയുള്ള ആഭ്യന്തര ടൂര്ണമെന്റുകള്ക്ക് മുന്നോടിയായി താരങ്ങളുടെ ഫോമും ടീം കോമ്പിനേഷനും വിലയിരുത്താന് ഈ പര്യടനം കേരള ടീമിന് നിര്ണായകമാകും.
കേരള ടീം:
വിഷ്ണു വിനോദ് (ക്യാപ്റ്റന്), രോഹന് എസ്. കുന്നുമ്മല്, അഭിഷേക് പി. നായര്, അഹമ്മദ് ഇമ്രാന്, ഷോണ് റോജര്, മുഹമ്മദ് അസ്ഹറുദ്ദീന്, അഭിജിത്ത് പ്രവീണ് വി, കൃഷ്ണ പ്രസാദ്, ആദിത്യ ആനന്ദ് സര്വതെ, അനുരാജ് ജെ.എസ്, നിധീഷ് എം.ഡി, ആസിഫ് കെ.എം, പവന് രാജ്, വിശ്വേശ്വര് സുരേഷ്.
