മലപ്പുറം: സമസ്ത കേരള ജംഇയ്യത്തുല്‍ ഉലമ ജനറല്‍ സെക്രട്ടറി പ്രൊഫ്. കെ. ആലിക്കുട്ടി മുസ്ലിയാര്‍ (81) അന്തരിച്ചു. വാര്‍ധക്യസഹജമായ അസുഖങ്ങളെ തുടര്‍ന്ന് പെരിന്തല്‍മണ്ണയിലെ സ്വകാര്യ ആശുപത്രിയില്‍ ചികിത്സയിലിരിക്കെയായിരുന്നു അന്ത്യം. 1945-ല്‍ മലപ്പുറം ഇരുമ്പുഴി തെക്കുംമുറിയിലാണ് ജനനം. 2016-ലാണ് സമസ്തയുടെ ജനറല്‍ സെക്രട്ടറിയായി ചുമതലയേറ്റത്. നിരവധി മഹല്ലുകളുടെ ഖാസിയായും അദ്ദേഹം സേവനമനുഷ്ഠിച്ചു.
2003 മുതല്‍ പട്ടിക്കാട് ജാമിഅ നൂരിയ അറബിക് കോളേജിന്റെ പ്രിന്‍സിപ്പലായിരുന്നു. 2014 മുതല്‍ സുപ്രഭാതം ദിനപത്രത്തിന്റെ ചെയര്‍മാനായും പ്രവര്‍ത്തിച്ചു. 2003 മുതല്‍ 2006 വരെ കേരള ഹജ്ജ് കമ്മിറ്റി ചെയര്‍മാനായും, 2006 മുതല്‍ 2009 വരെ ഇന്ത്യ ഹജ്ജ് കമ്മിറ്റി ചെയര്‍മാനായും സേവനമനുഷ്ഠിച്ചു. കാസര്‍ഗോഡ് സംയുക്ത മുസ്ലിം ജമാഅത്ത് ഖാസി, അഖിലേന്ത്യാ മുസ്ലിം വ്യക്തിനിയമ ബോര്‍ഡ് ദേശീയ സമിതി അംഗം തുടങ്ങിയ നിലകളിലും അദ്ദേഹം പ്രവര്‍ത്തിച്ചിരുന്നു.
മലപ്പുറം തിരൂര്‍ക്കാട് ജുമാമസ്ജിദ് ഖബര്‍സ്ഥാനിലാണ് ഖബറടക്കം നടക്കുക. അദ്ദേഹത്തിന്റെ നിര്യാണത്തില്‍ മത, സാമൂഹിക, രാഷ്‌ട്രീയ മേഖലകളിലെ നിരവധി പേര്‍ അനുശോചനം രേഖപ്പെടുത്തി.
