കോഴിക്കോട്: കോയിലാണ്ടിയിൽ മാലിന്യം തരംതിരിക്കുന്നതിനിടെ കവറിനുള്ളിൽ നിന്ന് പെരുമ്പാമ്പ് പുറത്തുചാടിയ സംഭവത്തിൽ കുറ്റക്കാർക്കെതിരെ കർശന നടപടി വേണമെന്ന് ഹരിതകർമ്മസേനാംഗങ്ങൾ ആവശ്യപ്പെട്ടു. ഭാഗ്യം ഒന്നുകൊണ്ട് മാത്രമാണ് പാമ്പ് കടിക്കാതെ രക്ഷപ്പെട്ടതെന്നും ഇവർ പറയുന്നു.
ശേഖരിക്കുന്ന പ്ലാസ്റ്റിക് മാലിന്യങ്ങൾ സാധാരണയായി റോഡരികിലാണ് സൂക്ഷിക്കുന്നത്. അതിനിടയിലാണ് കമ്പി ഉപയോഗിച്ച് കെട്ടിയ നിലയിൽ ഒരു ചാക്ക് കണ്ടെത്തിയത്. ചെറിയ കെട്ടായിരുന്നതിനാൽ കരാർ കമ്പനി അത് ശേഖരിച്ചിരുന്നില്ല. തുടർന്ന് ഹരിതകർമ്മസേനാംഗങ്ങൾ ചാക്കിന്റെ കമ്പിക്കെട്ട് അഴിച്ച് പരിശോധിച്ചപ്പോഴാണ് അതിനുള്ളിൽ പെരുമ്പാമ്പിനെ കണ്ടത്. ചാക്ക് താഴെയിട്ടതിനാൽ വലിയ അപകടമാണ് ഒഴിവായത്. സംഭവത്തിൽ നഗരസഭയ്ക്ക് പരാതി നൽകിയതായി ഹരിതകർമ്മസേനാംഗങ്ങൾ അറിയിച്ചു. ചാക്കിനുള്ളിൽ ജീവനുള്ള പെരുമ്പാമ്പിനെ ഉപേക്ഷിച്ചവരെ കണ്ടെത്തി മാതൃകാപരമായ നടപടി സ്വീകരിക്കണമെന്ന് അവർ ആവശ്യപ്പെട്ടു.
എല്ലാവരുടെയും വീടുകളിൽ നിന്ന് മാലിന്യം ശേഖരിച്ച് നഗരത്തെ ശുചിയായി നിലനിർത്താൻ പ്രവർത്തിക്കുന്നവരാണ് ഹരിതകർമ്മസേനാംഗങ്ങളെന്നും, തങ്ങളുടെ സുരക്ഷയും പൊതുജനങ്ങൾ പരിഗണിക്കണമെന്നും അവർ ഓർമ്മിപ്പിച്ചു.