കൊച്ചി: നടൻ സൂര്യയുടെ ജന്മദിനത്തോടനുബന്ധിച്ച് വെങ്കി അറ്റ്ലൂരി സംവിധാനം ചെയ്യുന്ന ‘വിശ്വനാഥ് ആൻഡ് സൺസ്’ ചിത്രത്തിലെ രണ്ടാം ഗാനത്തിന്റെ പ്രൊമോ വീഡിയോ പുറത്തിറങ്ങി. സൂര്യ തന്നെ ആലപിച്ചിരിക്കുന്ന ഗാനത്തിന്റെ പ്രൊമോ ഇതിനകം ആരാധകർക്കിടയിൽ ശ്രദ്ധ നേടിക്കഴിഞ്ഞു.
സൂര്യയും മലയാളി താരം മമിത ബൈജുവും പ്രധാന കഥാപാത്രങ്ങളാകുന്ന ചിത്രം 2026 ഓഗസ്റ്റ് 14-ന് ലോകമെമ്പാടും റിലീസ് ചെയ്യും. കേരളത്തിൽ ചിത്രം പ്രദർശനത്തിനെത്തിക്കുന്നത് ന്യൂ സൂര്യ ഫിലിംസ് ആണ്.
ഫോർച്യൂൺ ഫോർ സിനിമാസുമായി സഹകരിച്ച് സിതാര എന്റർടെയ്ൻമെന്റ്സ് ബാനറിൽ സൂര്യദേവര നാഗ വംശിയും സായ് സൗജന്യയും ചേർന്നാണ് ചിത്രം നിർമ്മിക്കുന്നത്. ശ്രീകര സ്റ്റുഡിയോസ് ചിത്രം അവതരിപ്പിക്കുന്നു.
ചിത്രത്തിന് സംഗീതം ഒരുക്കുന്നത് ജി.വി. പ്രകാശ് കുമാർ ആണ്. നേരത്തെ പുറത്തിറങ്ങിയ ‘പട്ടാമ്പൂച്ചി’ എന്ന ആദ്യഗാനം മികച്ച സ്വീകാര്യത നേടിയിരുന്നു. റിലീസിന് മുമ്പ് തന്നെ ഏകദേശം 300 കോടി രൂപയുടെ പ്രീ-റിലീസ് ബിസിനസ് നേടി സൂര്യയുടെ കരിയറിലെ ഏറ്റവും വലിയ പ്രീ-റിലീസ് നേട്ടമായി ചിത്രം മാറിയതായും റിപ്പോർട്ടുകളുണ്ട്.
ചിത്രത്തിന്റെ ഒടിടി അവകാശം നെറ്റ്ഫ്ലിക്സ് സ്വന്തമാക്കിയിട്ടുണ്ട്. ഏകദേശം 85 കോടി രൂപയ്ക്കാണ് ഒടിടി അവകാശം കൈമാറിയതെന്നാണ് റിപ്പോർട്ടുകൾ.
‘ലക്കി ഭാസ്കർ’ എന്ന ബ്ലോക്ക്ബസ്റ്ററിന് ശേഷം വെങ്കി അറ്റ്ലൂരി സംവിധാനം ചെയ്യുന്ന ചിത്രമാണിത്. ചിത്രത്തിന്റെ തിരക്കഥയും അദ്ദേഹം തന്നെയാണ് ഒരുക്കിയിരിക്കുന്നത്. രവീണ ടണ്ടൻ, രാധിക ശരത്കുമാർ, ഭവാനി ശ്രീ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
ഒരു സമ്പൂർണ കുടുംബചിത്രമായാണ് ‘വിശ്വനാഥ് ആൻഡ് സൺസ്’ ഒരുക്കിയിരിക്കുന്നതെന്ന് ടീസറും പോസ്റ്ററുകളും ഗാനങ്ങളും ഇതിനോടകം തന്നെ സൂചന നൽകിയിട്ടുണ്ട്.
