ലഖ്‌നൗ: ട്രാന്‍സ്പോര്‍ട്ട് കരാര്‍ വാഗ്ദാനം ചെയ്ത് ലക്ഷങ്ങള്‍ തട്ടിയെടുത്തെന്ന പരാതിയില്‍ മുന്‍ ഇന്ത്യന്‍ ക്രിക്കറ്റ് താരം രാജേഷ് ചൗഹാനെതിരെ പൊലീസ് എഫ്ഐആര്‍ രജിസ്റ്റര്‍ ചെയ്തു. ഗാസിയാബാദിലെ മോഹന്‍ നഗര്‍ പൊലീസ് സ്റ്റേഷനിലാണ് കേസ് രജിസ്റ്റര്‍ ചെയ്തിരിക്കുന്നത്. പ്രാദേശിക കോടതിയുടെ നിര്‍ദേശത്തെ തുടര്‍ന്നാണ് പൊലീസ് നടപടി സ്വീകരിച്ചത്. ഭാരതീയ ന്യായ സംഹിത സെക്ഷന്‍ 316(2) പ്രകാരമാണ് വിശ്വാസവഞ്ചന കുറ്റം ചുമത്തി കേസെടുത്തിരിക്കുന്നത്. സംഭവത്തില്‍ അന്വേഷണം പുരോഗമിക്കുകയാണെന്നും ആവശ്യമായ തുടര്‍നടപടികള്‍ സ്വീകരിക്കുമെന്നും പൊലീസ് അറിയിച്ചു.
ദിന്‍കര്‍ വിശ്വാമിത്ര എന്നയാളാണ് രാജേഷ് ചൗഹാനെതിരെ കോടതിയെ സമീപിച്ചത്. ഒഡിഷയിലെ ജിന്‍ഡാല്‍ സ്റ്റീലില്‍ നിന്നുള്ള ഇരുമ്പയിരും സ്റ്റീല്‍ ഉല്‍പ്പന്നങ്ങളും കൊണ്ടുപോകുന്നതിനുള്ള ട്രാന്‍സ്പോര്‍ട്ട് കരാര്‍ ലഭിച്ചിട്ടുണ്ടെന്നും, അതില്‍ പങ്കാളിയാകുകയാണെങ്കില്‍ വലിയ ലാഭം ലഭിക്കുമെന്നും പറഞ്ഞ് 15 ലക്ഷത്തിലധികം രൂപ നിക്ഷേപിപ്പിച്ചെന്നാണ് പരാതിയില്‍ പറയുന്നത്. ഗോവിന്ദ് ട്രാന്‍സ്പോര്‍ട്ട് കമ്പനിയുടെ പേരില്‍ ജിന്‍ഡാല്‍ സ്റ്റീല്‍ നല്‍കിയതാണെന്ന് അവകാശപ്പെട്ട വര്‍ക്ക് ഓര്‍ഡറുകളും മറ്റ് രേഖകളും രാജേഷ് ചൗഹാന്‍ കാണിച്ചുവെന്നും, അവ യഥാര്‍ത്ഥമാണെന്ന് വിശ്വസിച്ചാണ് 2021 ജൂലൈ 30-ന് കരാര്‍ ഒപ്പുവെച്ച് ആദ്യം ചെക്ക് വഴി 2.51 ലക്ഷം നല്‍കുകയും പിന്നീട് രണ്ട് ഘട്ടങ്ങളിലായി ആകെ 15.01 ലക്ഷം കമ്പനിയുടെ അക്കൗണ്ടിലേക്ക് കൈമാറുകയും ചെയ്തതായി പരാതിക്കാരന് കോടതിയെ അറിയിച്ചു.
തുടര്‍ന്ന് കരാര്‍ സംബന്ധിച്ച് വ്യക്തമായ വിവരങ്ങള്‍ ലഭിക്കാതെ വന്നതോടെ പരാതിക്കാരന് നേരിട്ട് ജിന്‍ഡാല്‍ സ്റ്റീലുമായി ബന്ധപ്പെട്ടപ്പോഴാണ് രാജേഷ് ചൗഹാനോ അദ്ദേഹത്തിന്റെ കമ്പനിയോ സ്ഥാപനവുമായി യാതൊരു കരാറും നടത്തിയിട്ടില്ലെന്ന വിവരം അറിയുന്നതെന്ന് പരാതിയില്‍ പറയുന്നു. ചൗഹാന്‍ കാണിച്ച രേഖകള്‍ വ്യാജമാണെന്നും പരാതിക്കാരന് ആരോപിക്കുന്നു. അതേസമയം, വിഷയത്തില്‍ പ്രതികരിച്ച രാജേഷ് ചൗഹാന്‍ ഇത് തികച്ചും ഒരു ബിസിനസ് തര്‍ക്കം മാത്രമാണെന്നാണ് വിശദീകരിച്ചത്. പരാതിക്കാരന് നല്‍കേണ്ട തുകയില്‍ ഒരു ഭാഗം തിരികെ നല്‍കിയിട്ടുണ്ടെന്നും, വ്യക്തിപരമായ സാമ്പത്തിക ബുദ്ധിമുട്ടുകള്‍ കാരണം ബാക്കി തുക നല്‍കാന്‍ കഴിഞ്ഞിട്ടില്ലെന്നുമാണ് അദ്ദേഹത്തിന്റെ നിലപാട്.
പരാതിയുമായി ആദ്യം മോഹന്‍ നഗര്‍ പൊലീസ് സ്റ്റേഷനെയും പിന്നീട് ബന്ധപ്പെട്ട ഉന്നത പൊലീസ് ഉദ്യോഗസ്ഥരെയും സമീപിച്ചെങ്കിലും കേസ് രജിസ്റ്റര്‍ ചെയ്തില്ലെന്നാണ് പരാതിക്കാരന്റെ വാദം. ഇതോടെയാണ് കോടതിയെ സമീപിച്ചത്. ഹര്‍ജിയും സമര്‍പ്പിച്ച രേഖകളും പരിശോധിച്ച കോടതി, പ്രാഥമികമായി അന്വേഷണം ആവശ്യമായ സാഹചര്യമാണ് നിലവിലുള്ളതെന്ന് വിലയിരുത്തി പൊലീസ് കേസ് രജിസ്റ്റര്‍ ചെയ്യാന്‍ നിര്‍ദേശിക്കുകയായിരുന്നു.
