സിംഗപ്പൂർ: ഭീകരസംഘടനയായ ഐഎസ്ഐഎസിന്റെ ആശയങ്ങളിൽ ആകൃഷ്ടരായ മൂന്ന് വിദ്യാർഥികൾ സ്കൂളിൽ കൂട്ടക്കൊല നടത്താൻ പദ്ധതിയിട്ടതായി കണ്ടെത്തി. 14 മുതൽ 19 വയസ്സ് വരെയുള്ള മൂന്ന് വിദ്യാർഥികളെയാണ് സിംഗപ്പൂർ അധികൃതർ ആഭ്യന്തര സുരക്ഷാ നിയമം പ്രകാരം കസ്റ്റഡിയിലെടുത്തത്.
ഈ വർഷം മേയിൽ 14 വയസ്സുള്ള ഒരു വിദ്യാർഥിയെ സുരക്ഷാ ഏജൻസികൾ കസ്റ്റഡിയിലെടുത്തിരുന്നു. തുടർന്ന് നടത്തിയ അന്വേഷണത്തിലാണ് ജൂൺ, ജൂലൈ മാസങ്ങളിൽ സ്കൂളിൽ വൻ ആക്രമണം നടത്താനുള്ള ഗൂഢാലോചന പുറത്തുവന്നത്. പദ്ധതിയെക്കുറിച്ച് അറിഞ്ഞ മറ്റൊരു വിദ്യാർഥി അധികൃതരെ വിവരം അറിയിച്ചതോടെയാണ് ആക്രമണശ്രമം തടയാനായത്.
അന്വേഷണത്തിൽ, ആക്രമണം നടപ്പാക്കുന്നതിനായി 21 പേജുള്ള വിശദമായ പദ്ധതിരേഖ വിദ്യാർഥികൾ തയ്യാറാക്കിയതായി കണ്ടെത്തി. ആക്രമണത്തിന് ഉപയോഗിക്കേണ്ട ആയുധങ്ങൾ, ലക്ഷ്യമിടേണ്ട വ്യക്തികൾ, ആക്രമണം എങ്ങനെ നടപ്പാക്കണം തുടങ്ങിയ കാര്യങ്ങൾ ഈ രേഖയിൽ ഉൾപ്പെടുത്തിയിരുന്നതായി അധികൃതർ അറിയിച്ചു.
മുസ്ലിംകളല്ലാത്ത അധ്യാപകരുടെയും വിദ്യാർഥികളുടെയും പ്രത്യേക പട്ടികയും ഇവർ തയ്യാറാക്കിയിരുന്നതായി അന്വേഷണത്തിൽ വ്യക്തമായി. ഐഎസ്ഐഎസ് ഉൾപ്പെടെയുള്ള ഭീകരസംഘടനകളോടും മുൻകാല കൂട്ടക്കൊലകൾ നടത്തിയ ഭീകരരോടും പ്രതികൾക്ക് കടുത്ത ആരാധന ഉണ്ടായിരുന്നുവെന്നും സുരക്ഷാ ഏജൻസികൾ കണ്ടെത്തി.
പദ്ധതി നടപ്പാക്കുന്നതിന്റെ അവസാനഘട്ടത്തിലായിരുന്നു പ്രതികളെന്ന് സിംഗപ്പൂർ ദേശീയ സുരക്ഷാ മന്ത്രി കെ. ഷൺമുഖം വാർത്താസമ്മേളനത്തിൽ അറിയിച്ചു. സമൂഹമാധ്യമങ്ങളിലൂടെയും ഓൺലൈൻ തീവ്രവാദ പ്രചാരണങ്ങളിലൂടെയും യുവാക്കളിൽ തീവ്രവാദ ആശയങ്ങൾ വ്യാപിക്കുന്നത് ആശങ്കാജനകമാണെന്നും അദ്ദേഹം പറഞ്ഞു. സംഭവത്തിൽ കൂടുതൽ അന്വേഷണം തുടരുകയാണെന്ന് സിംഗപ്പൂർ അധികൃതർ അറിയിച്ചു.
