ന്യൂഡൽഹി: രാജ്യത്തെ മത്സരപരീക്ഷകളിലെ ചോദ്യപേപ്പർ ചോർച്ചയും ക്രമക്കേടുകളും തടയുന്നതിനുള്ള വ്യവസ്ഥകൾ കൂടുതൽ കർശനമാക്കുന്ന പൊതു പരീക്ഷാ ക്രമക്കേട് തടയൽ (ഭേദഗതി) ബിൽ പാർലമെന്റ് പാസാക്കിയതിനെ അഭിനന്ദിച്ച് സാമൂഹ്യപ്രവർത്തകൻ സോനം വാങ്ചുക്. ഭാരതത്തിന്റെ പരീക്ഷാ സമ്പ്രദായത്തെ കൂടുതൽ വിശ്വസനീയവും സുതാര്യവുമാക്കാനുള്ള മികച്ച ചുവടുവെപ്പാണ് ഈ നിയമനിർമാണമെന്ന് അദ്ദേഹം പറഞ്ഞു.
എക്സിൽ പങ്കുവെച്ച വീഡിയോയിലൂടെയായിരുന്നു വാങ്ചുക്കിന്റെ പ്രതികരണം. വിദ്യാഭ്യാസരംഗത്ത് സമഗ്രമായ പരിഷ്കാരങ്ങൾക്ക് ഈ ബിൽ വഴിയൊരുക്കുമെന്നും യുവതലമുറയ്ക്ക് കൂടുതൽ നീതിയുക്തമായ പരീക്ഷാ സംവിധാനം ഉറപ്പാക്കാൻ ഇതിലൂടെ സാധിക്കുമെന്ന പ്രത്യാശയും അദ്ദേഹം പ്രകടിപ്പിച്ചു.
അതേസമയം, ബിൽ പാർലമെന്റ് പാസാക്കിയതിന് പിന്നാലെ പ്രധാനമന്ത്രി നരേന്ദ്ര മോദിയും സമൂഹമാധ്യമമായ എക്സിലൂടെ വീഡിയോ സന്ദേശം പങ്കുവച്ചു. രാജ്യത്തിന്റെ പരീക്ഷാ സംവിധാനത്തെ കൂടുതൽ ശക്തവും വിശ്വസനീയവുമാക്കുന്ന നിർണായക നടപടിയാണ് പാർലമെന്റ് സ്വീകരിച്ചതെന്ന് അദ്ദേഹം പറഞ്ഞു.
പരീക്ഷാ ക്രമക്കേടുകൾ തടയുന്നതിനുള്ള പ്രവർത്തനങ്ങൾ കേന്ദ്രസർക്കാർ തുടർന്നും ശക്തമായി മുന്നോട്ടുകൊണ്ടുപോകുമെന്നും ഇത്തരം അനീതികൾ ദീർഘകാലം തുടരാൻ അനുവദിക്കില്ലെന്നും പ്രധാനമന്ത്രി വ്യക്തമാക്കി. വികസിത ഭാരതം എന്ന ലക്ഷ്യം സാക്ഷാത്കരിക്കാൻ എല്ലാവരും ഒരുമിച്ച് മുന്നേറണമെന്നും രാജ്യവാസികൾക്ക് ഹൃദയം നിറഞ്ഞ നന്ദിയും അദ്ദേഹം രേഖപ്പെടുത്തി.
