തിരുവനന്തപുരം: ശബരിമല നെയ് ക്രമക്കേട് വിവാദത്തില്‍ മില്മയ്ക്ക് യാതൊരു പങ്കുമില്ലെന്ന് വ്യക്തമാക്കി മില്‍മ ചെയര്‍മാന്‍ കെ.എസ്. മണി. മില്‍മ വിതരണം ചെയ്ത നെയ്യില്‍ ഗുണനിലവാര പ്രശ്‌നമുണ്ടെന്ന് ദേവസ്വം ബോര്‍ഡ് ഒരിക്കലും ഉന്നയിച്ചിട്ടില്ലെന്നും, മില്‍മയുടെ നെയ് വേണ്ടെന്ന തീരുമാനമെടുത്തുവെന്ന തരത്തിലുള്ള വാര്‍ത്തകള്‍ അടിസ്ഥാനരഹിതമാണെന്നും അദ്ദേഹം പറഞ്ഞു. ഇത്തരം പ്രചാരണങ്ങള്‍ മില്‍മയുടെ ബ്രാന്‍ഡിന് ദോഷം ചെയ്തതായും അദ്ദേഹം കൂട്ടിച്ചേര്‍ത്തു.
ദേവസ്വം ബോര്‍ഡ് കൈമാറിയ നെയ്യുടെ മുഴുവന്‍ തുകയും ഇതിനകം നല്‍കിയിട്ടുണ്ടെന്നും കെ.എസ്. മണി വ്യക്തമാക്കി. മില്‍മയില്‍ നിന്ന് അയച്ച ശുദ്ധ നെയ് മാറ്റി നിലവാരം കുറഞ്ഞ നെയ് നിറച്ചിട്ടുണ്ടോ എന്നത് അന്വേഷണത്തിലൂടെ കണ്ടെത്തേണ്ട വിഷയമാണെന്നും അദ്ദേഹം പറഞ്ഞു.
‘ടിന്‍ തുറന്ന് നിലവാരം കുറഞ്ഞ നെയ് നിറച്ചോ എന്നത് അന്വേഷണത്തില്‍ തെളിയണം. അയച്ച എല്ലാ നെയ്യും മില്‍മയുടെ ഗുണനിലവാര പരിശോധനയ്‌ക്ക് ശേഷമാണ് കൈമാറിയത്. ദേവസ്വം വിജിലന്‍സിന്റെയും ക്രൈംബ്രാഞ്ചിന്റെയും അന്വേഷണത്തെ സ്വാഗതം ചെയ്യുന്നു. അന്വേഷണത്തില്‍ ആരുടെയെങ്കിലും ഭാഗത്ത് വീഴ്ച കണ്ടെത്തിയാല്‍ നിയമനടപടി സ്വീകരിക്കും,’ അദ്ദേഹം വ്യക്തമാക്കി.
ക്ഷീരകര്‍ഷകര്‍ക്ക് സഹായമാകുമെന്ന നിലയിലാണ് മില്‍മയുടെ നെയ് വാങ്ങണമെന്ന് ദേവസ്വം ബോര്‍ഡിനോട് ആവശ്യപ്പെട്ടതെന്നും കെ.എസ്. മണി പറഞ്ഞു. എന്നാല്‍ ഭക്തര്‍ സമര്‍പ്പിക്കുന്ന നെയ് തന്നെ ദൈനംദിന ആവശ്യങ്ങള്‍ക്ക് മതിയെന്ന നിലപാടാണ് ദേവസ്വം ബോര്‍ഡ് സ്വീകരിച്ചതെന്നും, മില്‍മയുടെ നെയ് ഒഴിവാക്കിയെന്ന പ്രചാരണം ചില കേന്ദ്രങ്ങള്‍ മനഃപൂര്‍വം നടത്തുന്നതാണെന്നും അദ്ദേഹം ആരോപിച്ചു.
മില്‍മയില്‍ നിന്ന് കയറ്റിയ ശുദ്ധ നെയ് മാറ്റി തമിഴ്‌നാട്ടില്‍ നിന്നുള്ള വിലകുറഞ്ഞതും നിലവാരം കുറഞ്ഞതുമായ നെയ് ശബരിമലയില്‍ എത്തിച്ചെന്ന ആരോപണമാണ് വിവാദത്തിന് ആധാരം. മുന്‍ സീസണിലാണ് സംഭവം നടന്നതെന്ന് ദേവസ്വം ബോര്‍ഡ് പ്രസിഡന്റ് കെ. ജയകുമാര്‍ നേരത്തെ വ്യക്തമാക്കിയിരുന്നു. ഏകദേശം 1.67 ലക്ഷം ലിറ്റര്‍ നിലവാരമില്ലാത്ത നെയ് സന്നിധാനത്ത് എത്തിയതായും ഇതിലൂടെ 85 ലക്ഷം രൂപയ്‌ക്കുമേല്‍ നഷ്ടം ഉണ്ടായതായും റിപ്പോര്‍ട്ടുകളുണ്ട്.
ഈ വര്‍ഷം അരവണ നിര്‍മ്മാണത്തിനായി പുറത്തുനിന്ന് നെയ് വാങ്ങേണ്ടതില്ലെന്ന് ദേവസ്വം ബോര്‍ഡ് തീരുമാനിച്ചിട്ടുണ്ട്. ഭക്തര്‍ സമര്‍പ്പിക്കുന്ന നെയ് ആവശ്യത്തിന് ലഭിക്കുന്ന സാഹചര്യത്തിലാണ് ഈ തീരുമാനമെന്ന് ദേവസ്വം ബോര്‍ഡ് അറിയിച്ചു.
