കല്ലടിക്കോട്: വീടിനുള്ളിലേക്ക് കാട്ടുപന്നിക്കൂട്ടം ഓടിക്കയറിയത് പ്രദേശത്ത് പരിഭ്രാന്തി പരത്തി. കിടപ്പുമുറിയിലുണ്ടായിരുന്ന എട്ടുവയസ്സുകാരന്‍ തലനാരിഴയ്‌ക്കാണ് രക്ഷപ്പെട്ടത്. പാലക്കാട് കല്ലടിക്കോട് പറക്കാട് നാരായണന്‍കുട്ടിയുടെ വീട്ടിലാണ് സംഭവം. ഇന്നലെ ഉച്ചയ്‌ക്ക് 12.45ഓടെയായിരുന്നു സംഭവം. വീടിന് എതിര്‍വശത്തുള്ള റബ്ബര്‍ തോട്ടത്തില്‍ നിന്നെത്തിയ ഒരു വലിയ കാട്ടുപന്നിയും രണ്ട് കുട്ടിപ്പന്നികളും വീടിന്റെ മുന്‍വാതില്‍ തുറന്നുകിടന്നതിനാല്‍ അതിവേഗത്തില്‍ അകത്തേക്ക് പാഞ്ഞുകയറുകയായിരുന്നു.
സംഭവസമയത്ത് വീട്ടില്‍ നാലുപേര്‍ ഉണ്ടായിരുന്നു. വീട്ടില്‍ വിരുന്നിനെത്തിയ അദ്വൈത് എന്ന എട്ടുവയസ്സുകാരന്‍ കിടപ്പുമുറിയില്‍ ഇരിക്കുകയായിരുന്നു. കുട്ടി ഇരുന്ന കസേരയ്‌ക്ക് തൊട്ടരികിലൂടെ കാട്ടുപന്നികള്‍ ഓടിക്കടന്നെങ്കിലും ആക്രമണമൊന്നും ഉണ്ടായില്ല. ഇതോടെയാണ് കുട്ടി അത്ഭുതകരമായി രക്ഷപ്പെട്ടത്. കാട്ടുപന്നികള്‍ വീടിനുള്ളില്‍ കയറിയതോടെ വീട്ടുകാര്‍ ഭയന്ന് മുകളിലത്തെ നിലയിലേക്ക് മാറി. സമീപവാസികളും വീടിന് പുറത്തേക്ക് ഇറങ്ങി.
ഏകദേശം അരമണിക്കൂറോളം വീടിനുള്ളില്‍ ഓടിനടന്ന പന്നിക്കൂട്ടം പിന്നീട് മുന്‍വാതിലിലൂടെത്തന്നെ പുറത്തേക്കിറങ്ങി മതില്‍ ചാടിക്കടന്ന് സമീപപ്രദേശത്തേക്ക് രക്ഷപ്പെട്ടു. സംഭവത്തെ തുടര്‍ന്ന് വനംവകുപ്പിനെ വിവരം അറിയിക്കുകയായിരുന്നു. വെടിവെക്കാനുള്ള സജ്ജീകരണങ്ങളുമായി ഉദ്യോഗസ്ഥര്‍ സ്ഥലത്തെത്തിയെങ്കിലും അതിന് മുമ്പേ കാട്ടുപന്നികള്‍ പ്രദേശം വിട്ടിരുന്നു. സംഭവത്തില്‍ നാട്ടുകാര്‍ കടുത്ത ആശങ്ക പ്രകടിപ്പിച്ചിരിക്കുകയാണ്.
