കണ്ണൂർ: എകെജിയുടെ പേരിലുള്ള വായനശാലയുടെ ആഭിമുഖ്യത്തിൽ നാലമ്പല യാത്ര സംഘടിപ്പിക്കാനുള്ള തീരുമാനം വിവാദമായതോടെ യാത്ര റദ്ദാക്കി. സിപിഎം നേതൃത്വത്തിലുള്ള കണ്ണൂർ കാളാന്തോട് വായനശാലയാണ് ഓഗസ്റ്റ് 8, 9 തീയതികളിലായി നാലമ്പല യാത്ര സംഘടിപ്പിക്കാൻ തീരുമാനിച്ചിരുന്നത്. ഇതിന്റെ പോസ്റ്ററും നേരത്തെ പുറത്തിറക്കിയിരുന്നു.
യാത്രയുടെ പ്രഖ്യാപനത്തിന് പിന്നാലെ വിവിധ കോണുകളിൽ നിന്ന് വിമർശനങ്ങളും പ്രതിഷേധങ്ങളും ഉയർന്നതോടെയാണ് പരിപാടി പിൻവലിക്കാൻ സംഘാടകർ തീരുമാനിച്ചത്. വിവാദം ശക്തമായ സാഹചര്യത്തിലാണ് യാത്ര റദ്ദാക്കിയതെന്ന് വായനശാല ഭാരവാഹികൾ അറിയിച്ചു.
വായനശാലയുടെ ഭരണസമിതിയിൽ സിപിഎം ബ്രാഞ്ച് അംഗങ്ങളും പാർട്ടി അനുഭാവികളും ഉൾപ്പെട്ടിരുന്നുവെന്നും, അവരുടെ നേതൃത്വത്തിലാണ് യാത്ര സംഘടിപ്പിക്കാൻ തീരുമാനിച്ചതെന്നും ഭാരവാഹികൾ വ്യക്തമാക്കി.
അതേസമയം, പ്രദേശത്തെ സ്ത്രീകളുടെ ആവശ്യപ്രകാരമാണ് നാലമ്പല യാത്ര സംഘടിപ്പിക്കാൻ തീരുമാനിച്ചതെന്നും, മതപരമായോ രാഷ്ട്രീയപരമായോ വിവാദം സൃഷ്ടിക്കുകയെന്ന ലക്ഷ്യമുണ്ടായിരുന്നില്ലെന്നും ഭാരവാഹികൾ വിശദീകരിച്ചു.
എന്നാൽ യാത്ര പ്രഖ്യാപിച്ചതിന് പിന്നാലെ വ്യാപക എതിർപ്പ് ഉയർന്ന സാഹചര്യത്തിൽ വിവാദം ഒഴിവാക്കാനാണ് പരിപാടി റദ്ദാക്കാൻ തീരുമാനിച്ചതെന്നും വായനശാല അധികൃതർ അറിയിച്ചു.