വാഷിങ്ടൺ ഡി.സി: തിരുവനന്തപുരം നഗരവും അമേരിക്കയിലെ വിവിധ നഗരങ്ങളും തമ്മിൽ ഐ.ടി, സ്മാർട്ട് സിറ്റി, വിദ്യാഭ്യാസം, സാംസ്കാരിക കൈമാറ്റം, നഗരഭരണം തുടങ്ങിയ മേഖലകളിൽ ദീർഘകാല സഹകരണം ശക്തമാക്കാനുള്ള ശ്രമങ്ങൾക്ക് അമേരിക്കയിലെ ഇന്ത്യൻ എംബസിയുടെ പിന്തുണ. അമേരിക്കൻ സന്ദർശനത്തിന്റെ ഭാഗമായി വാഷിങ്ടണിലെ ഇന്ത്യൻ എംബസി സന്ദർശിച്ച തിരുവനന്തപുരം മേയർ വി.വി. രാജേഷ് എംബസി ഉദ്യോഗസ്ഥരുമായി നടത്തിയ കൂടിക്കാഴ്ചയിലാണ് ഇക്കാര്യത്തിൽ അനുകൂല പ്രതികരണമുണ്ടായത്.
കേരളത്തിന്റെ തനതായ കലാപാരമ്പര്യങ്ങളായ കളരിപ്പയറ്റ്, കഥകളി തുടങ്ങിയ കലാരൂപങ്ങൾ സമഗ്രമായ സാംസ്കാരിക പാക്കേജായി അമേരിക്കയിൽ അവതരിപ്പിക്കാനുള്ള സാധ്യതകളും ചർച്ചയിൽ പ്രധാന വിഷയമായി. ഇത്തരം പരിപാടികൾക്ക് മികച്ച സ്വീകാര്യത ലഭിക്കുമെന്നും ഇന്ത്യൻ എംബസിയുടെ നേതൃത്വത്തിൽ വിവിധ വേദികളിൽ അവതരിപ്പിക്കുന്നതിന് പിന്തുണ നൽകാനാകുമെന്നും എംബസി ഉദ്യോഗസ്ഥർ അറിയിച്ചു.
തിരുവനന്തപുരം കോർപ്പറേഷന്റെ അന്തർദേശീയ വികസന കാഴ്ചപ്പാടും മേയർ ചർച്ചയിൽ അവതരിപ്പിച്ചു. അമേരിക്കൻ നഗരങ്ങളുമായി ഐ.ടി., ഡിജിറ്റൽ നവീകരണം, സ്മാർട്ട് സിറ്റി വികസനം, മാലിന്യ സംസ്കരണം, നഗരാസൂത്രണം, വിദ്യാഭ്യാസം, സാംസ്കാരിക കൈമാറ്റം തുടങ്ങിയ മേഖലകളിൽ ദീർഘകാല പങ്കാളിത്തം സ്ഥാപിക്കാനുള്ള പദ്ധതികളാണ് അദ്ദേഹം വിശദീകരിച്ചത്.
ഇത്തരം സഹകരണ സംരംഭങ്ങൾ വിജയകരമാക്കാൻ ഇന്ത്യയിലെയും അമേരിക്കയിലെയും വിവിധ സർക്കാർ ഏജൻസികളുമായുള്ള ഏകോപനം അനിവാര്യമാണെന്നും, അതിനായി ഇന്ത്യൻ എംബസിയുടെ തുടർച്ചയായ പിന്തുണ നിർണായകമാണെന്നും മേയർ ചൂണ്ടിക്കാട്ടി.
തിരുവനന്തപുരം കോർപ്പറേഷൻ മുന്നോട്ടുവച്ച വികസന നിർദേശങ്ങൾക്കും അമേരിക്കൻ നഗരങ്ങളുമായുള്ള സഹകരണ പദ്ധതികൾക്കും എംബസി ഉദ്യോഗസ്ഥർ അനുകൂലമായ പ്രതികരണമാണ് നൽകിയത്. ഇത് ഭാവിയിൽ സാങ്കേതികവിദ്യ, വിദ്യാഭ്യാസം, സാംസ്കാരിക കൈമാറ്റം, നഗരവികസനം എന്നീ മേഖലകളിൽ കൂടുതൽ ഔദ്യോഗിക സഹകരണത്തിനും സംയുക്ത പദ്ധതികൾക്കും വഴിയൊരുക്കുമെന്ന പ്രതീക്ഷ മേയർ വി.വി. രാജേഷ് പ്രകടിപ്പിച്ചു.
അമേരിക്കൻ സന്ദർശനത്തിനിടെ വിവിധ നഗരങ്ങളിലെ പ്രാദേശിക ഭരണകൂടങ്ങൾ, സർവകലാശാലകൾ, ഗവേഷണ സ്ഥാപനങ്ങൾ, സാങ്കേതിക മേഖലയിലെ വിദഗ്ധർ എന്നിവരുമായും മേയർ കൂടിക്കാഴ്ച നടത്തി. തിരുവനന്തപുരം നഗരത്തിന്റെ വികസനത്തിനായി ആഗോള പങ്കാളിത്തം ഉറപ്പാക്കാനുള്ള ശ്രമങ്ങൾ തുടരുമെന്നും അദ്ദേഹം പറഞ്ഞു.
