ന്യൂഡല്‍ഹി: ശ്രീലങ്കയ്ക്കെതിരായ രണ്ട് മത്സര ടെസ്റ്റ് പരമ്പരയ്‌ക്ക് മുന്നോടിയായി ഇന്ത്യക്ക് തിരിച്ചടി. വലതുകാലിലെ പെരുവിരലിനേറ്റ പരിക്കില്‍ നിന്ന് പൂര്‍ണമായി മോചിതനാകാത്തതിനെ തുടര്‍ന്ന് യുവ ബാറ്റര്‍ സായ് സുദര്‍ശനെ പരമ്പരയില്‍ നിന്ന് ഒഴിവാക്കി. ഇന്ത്യ എ ടീമിനൊപ്പം ശ്രീലങ്കയില്‍ പര്യടനം നടത്തുന്നതിനിടെയാണ് താരത്തിന് പരിക്കേറ്റത്. ശ്രീലങ്ക എയ്‌ക്കെതിരായ രണ്ട് അനൗദ്യോഗിക ടെസ്റ്റുകളിലും സെഞ്ചുറി നേടിയ സായ് സുദര്ശന് രണ്ടാം മത്സരത്തിനിടെയാണ് പരിക്കേറ്റത്.
തുടര്‍ന്ന് ബെംഗളൂരുവിലെ സെന്റര്‍ ഓഫ് എക്സലന്‍സില്‍ താരം പുനരധിവാസത്തിലായിരുന്നു. എന്നാല്‍ ടെസ്റ്റ് ക്രിക്കറ്റിലേക്ക് തിരിച്ചെത്താന്‍ ആവശ്യമായ പൂര്‍ണ ശാരീരികക്ഷമത കൈവരിക്കാന്‍ താരത്തിന് കഴിഞ്ഞിട്ടില്ലെന്നാണ് സ്പോര്‍ട്സ് സയന്‍സ് ടീമിന്റെ വിലയിരുത്തല്‍. കൂടുതല്‍ സമയം ജൈവികമായ രോഗമുക്തിക്ക് ആവശ്യമായതിനാല്‍ ശ്രീലങ്കന്‍ പരമ്പരയില്‍ കളിപ്പിക്കുന്നത് സുരക്ഷിതമല്ലെന്നാണ് മെഡിക്കല്‍ സംഘത്തിന്റെ നിര്‍ദേശം.
”കാര്യമായ പുരോഗതിയുണ്ട്. എന്നാല്‍ ടെസ്റ്റ് ക്രിക്കറ്റിലേക്ക് സുരക്ഷിതമായി തിരിച്ചെത്താന്‍ ആവശ്യമായ നിലയിലേക്ക് ഇതുവരെ എത്തിയിട്ടില്ല”, സ്പോര്‍ട്സ് സയന്‍സ് ടീം അറിയിച്ചു. സായ് സുദര്‍ശന്റെ പുനരധിവാസം, ശക്തിയും ഫിറ്റ്നസും വര്‍ധിപ്പിക്കുന്ന പരിശീലനം, ക്രിക്കറ്റുമായി ബന്ധപ്പെട്ട പരിശീലനഭാരം എന്നിവ ഘട്ടംഘട്ടമായി മാത്രമേ ഉയര്‍ത്താവൂ എന്നും മെഡിക്കല്‍ സംഘം നിര്‍ദേശിച്ചിട്ടുണ്ട്. പരിക്ക് വീണ്ടും സംഭവിക്കാനുള്ള സാധ്യതയും തുടര്‍ സങ്കീര്‍ണതകളും ഒഴിവാക്കുകയാണ് ലക്ഷ്യം.
സായ് സുദര്ശന് പകരം പരിശീലന മത്സരത്തില്‍ സെഞ്ചുറി നേടിയ മലയാളി താരം ദേവ്ദത്ത് പടിക്കലിനാണ് മൂന്നാം നമ്പറില്‍ അവസരം ലഭിക്കുക. ശ്രീലങ്ക ഇലവനെതിരായ സന്നാഹ മത്സരത്തില്‍ മികച്ച പ്രകടനം നടത്തിയ പടിക്കല്‍ സെഞ്ചുറിയോടെ തന്റെ അവകാശവാദം ശക്തമാക്കിയിരുന്നു. ഇതോടെ ഓഗസ്റ്റ് 15ന് ഗാലെയില്‍ ആരംഭിക്കുന്ന ആദ്യ ടെസ്റ്റില്‍ പടിക്കല്‍ ഇന്ത്യയുടെ പ്ലേയിങ് ഇലവനില്‍ ഇടംപിടിക്കാനുള്ള സാധ്യത ഏറെ ശക്തമായി.
അതേസമയം, സായ് സുദര്ശന് പകരം സ്‌ക്വാഡിലേക്ക് ആരെത്തുമെന്നതും ശ്രദ്ധേയമാണ്. മുംബൈ താരം സര്‍ഫറാസ് ഖാന്‍ പരിഗണനയിലുണ്ടാകുമെന്നാണ് സൂചന. എന്നാല്‍ താരത്തിന്റെ സമീപകാല പ്രകടനങ്ങളും ടീം മാനേജ്മെന്റിന്റെ നിലപാടും നിര്‍ണായകമാകും. സായ് സുദര്‍ശന്റെ അഭാവം ഇന്ത്യയുടെ ബാറ്റിങ് നിരയ്‌ക്ക് തിരിച്ചടിയാകുമ്പോള്‍, ലഭിച്ച അവസരം മുതലാക്കാനുള്ള മികച്ച അവസരമാണ് ദേവ്ദത്ത് പടിക്കലിന് മുന്നിലുള്ളത്.
