തിരുവനന്തപുരം: ശബരിമലയിലെ നെയ്യ് വിതരണവുമായി ബന്ധപ്പെട്ട ക്രമക്കേടില്‍ സമഗ്ര അന്വേഷണം ആവശ്യപ്പെട്ട് ദേവസ്വം മന്ത്രി കെ. മുരളീധരന്‍ ആഭ്യന്തര മന്ത്രിക്ക് കത്ത് നല്‍കി. ഹൈക്കോടതി നിര്‍ദ്ദേശപ്രകാരം വിജിലന്‍സിന്റെ പ്രത്യേക സംഘം നിലവില്‍ അന്വേഷണം നടത്തിവരികയാണ്.
ദേവസ്വം വിജിലന്‍സ് എസ്.പി.യും സെക്രട്ടറിയും നടത്തിയ അന്വേഷണത്തില്‍ ഗുരുതരമായ ക്രമക്കേടുകള്‍ കണ്ടെത്തിയതായി മന്ത്രി കത്തില്‍ ചൂണ്ടിക്കാട്ടി. കരിമ്പട്ടികയില്‍പ്പെട്ട കമ്പനിക്ക് നെയ്യ് വിതരണത്തിനുള്ള കരാര്‍ ലഭിച്ചതിന് പിന്നില്‍ ഉന്നതതല ഗൂഢാലോചന നടന്നിട്ടുണ്ടോയെന്നും പരിശോധിക്കണമെന്നാണ് ആവശ്യം.
നിലവിലെ വിജിലന്‍സ് അന്വേഷണത്തിന്റെ പരിധിയില്‍പ്പെടാത്ത വിഷയങ്ങള്‍ പ്രത്യേക അന്വേഷണ സംഘം പരിശോധിക്കണമെന്നും മന്ത്രി ആവശ്യപ്പെട്ടു. നിലവാരമില്ലാത്ത നെയ്യ് വിതരണം ചെയ്തതിലൂടെ കോടിക്കണക്കിന് രൂപയുടെ ക്രമക്കേട് നടന്നതായാണ് ആരോപണം. സംഭവത്തിന് പിന്നിലെ മുഴുവന്‍ ഇടപാടുകളും ഉത്തരവാദികളായവരെയും കണ്ടെത്താന്‍ സമഗ്ര അന്വേഷണം വേണമെന്നാണ് ദേവസ്വം മന്ത്രിയുടെ ആവശ്യം.
