പാരീസ്: സ്പാനിഷ് ലോകകപ്പ് താരം ഫെറാന് ടോറസ് ഇനി പാരീസ് സെയ്ന്റ് ജെര്മെയ്നില്. ബാഴ്സലോണയില്നിന്ന് ചാമ്പ്യന്സ് ലീഗ് ജേതാക്കളായ ഫ്രഞ്ച് ക്ലബിലേക്കുള്ള ട്രാന്സ്ഫര് പൂര്ത്തിയായതായി പിഎസ്ജി സ്ഥിരീകരിച്ചു. 2031 വരെയാണ് 26കാരനായ താരത്തിന്റെ കരാര്. പിഎസ്ജിയുടെ ഒമ്പതാം നമ്പര് ജേഴ്സിയിലാകും ഫെറാന് ടോറസ് കളത്തിലിറങ്ങുക.
”പിഎസ്ജിയെപ്പോലെ വലിയ ലക്ഷ്യങ്ങളുള്ള ക്ലബ്ബില് പുതിയ അധ്യായം ആരംഭിക്കുന്നതില് ഏറെ സന്തോഷമുണ്ട്. എന്നെ ടീമിന്റെ ഭാഗമാക്കാന് അവസരം നല്കിയ മാനേജ്മെന്റിന് നന്ദി. പരമാവധി കിരീടങ്ങള് നേടാന് ടീമിനെ സഹായിക്കാനാകുമെന്ന് പ്രതീക്ഷിക്കുന്നു,” ടോറസ് പറഞ്ഞു.
ഏഴാം വയസ്സില് വലെന്സിയയിലൂടെയാണ് ഫെറാന് ടോറസ് ഫുട്ബോള് കരിയര് ആരംഭിച്ചത്. 2017 ഡിസംബറില് ഈബറിനെതിരായ മത്സരത്തിലൂടെ ലാ ലിഗയില് അരങ്ങേറ്റം കുറിച്ച അദ്ദേഹം, ലീഗില് കളിച്ച 21-ാം നൂറ്റാണ്ടില് ജനിച്ച ആദ്യ താരമായി. വലെന്സിയക്കായി 97 മത്സരങ്ങള് കളിച്ച ടോറസ് 2019ല് കോപ്പ ഡെല് റേ കിരീടം നേടി കരിയറിലെ ആദ്യ പ്രധാന ട്രോഫി സ്വന്തമാക്കി.
2020ല് മാഞ്ചസ്റ്റര് സിറ്റിയിലെത്തിയ ടോറസ് പെപ് ഗ്വാര്ഡിയോളയ്ക്ക് കീഴില് 43 മത്സരങ്ങളില് നിന്ന് 16 ഗോളുകളും നാല് അസിസ്റ്റുകളും നേടി. 2021ലെ പ്രീമിയര് ലീഗ്, ലീഗ് കപ്പ് നേട്ടങ്ങളില് പങ്കാളിയായ താരം ചാമ്പ്യന്സ് ലീഗ് ഫൈനലിലെത്തിയ സിറ്റി ടീമിലും അംഗമായിരുന്നു.
2022ല് ബാഴ്സലോണയിലെത്തിയ ടോറസ് ക്ലബിന്റെ മുന്നേറ്റനിരയിലെ നിര്ണായക താരമായി മാറി. 207 മത്സരങ്ങളില് നിന്ന് 65 ഗോളുകള് നേടിയ താരം ബാഴ്സലോണയ്ക്കൊപ്പം മൂന്ന് ലാ ലിഗ കിരീടങ്ങളും ഒരു കോപ്പ ഡെല് റേയും രണ്ട് സ്പാനിഷ് സൂപ്പര് കപ്പ് കിരീടങ്ങളും സ്വന്തമാക്കി.
സ്പാനിഷ് ദേശീയ ടീമിലും ടോറസ് നിര്ണായക സാന്നിധ്യമാണ്. യൂത്ത് തലത്തില് യൂറോപ്യന് കിരീടങ്ങള് നേടിയ ശേഷമാണ് സീനിയര് ടീമിലെത്തിയത്. 2020ല് ലൂയിസ് എന്റിക്കെയുടെ കീഴില് അരങ്ങേറ്റം കുറിച്ച താരം യൂറോ 2020, 2022 ലോകകപ്പ് എന്നിവയില് പങ്കെടുത്തു. പിന്നീട് സ്പെയിനിനൊപ്പം 2023ല് നേഷന്സ് ലീഗും 2024ല് യൂറോ കപ്പും സ്വന്തമാക്കി.
അമേരിക്കയില് നടന്ന ലോകകപ്പില് സ്പെയിന് കിരീടം നേടിയപ്പോള് അര്ജന്റീനയ്ക്കെതിരായ ഫൈനലിന്റെ എക്സ്ട്രാ ടൈമില് നിര്ണായക ഗോള് നേടി ടോറസ് ടീമിന്റെ വിജയശില്പ്പിയായി. ഫൈനലിലെ മികച്ച താരത്തിനുള്ള പുരസ്കാരവും അദ്ദേഹത്തിനായിരുന്നു.
