ഗാള്‍: ശ്രീലങ്കയ്‌ക്കെതിരായ ആദ്യ ടെസ്റ്റില്‍ ചരിത്രനേട്ടവുമായി ഇന്ത്യന്‍ വിക്കറ്റ് കീപ്പര്‍ ബാറ്റര്‍ ഋഷഭ് പന്ത്. ടെസ്റ്റ് ക്രിക്കറ്റില്‍ 100 സിക്സറുകള്‍ പൂര്‍ത്തിയാക്കുന്ന ആദ്യ ഇന്ത്യന്‍ താരമെന്ന അപൂര്‍വ റെക്കോര്‍ഡാണ് പന്ത് സ്വന്തമാക്കിയത്. ഇതോടെ ടെസ്റ്റ് ചരിത്രത്തില്‍ ഈ നേട്ടത്തിലെത്തുന്ന ലോകത്തിലെ നാലാമത്തെ താരമായും ഋഷഭ് പന്ത് മാറി.
ടെസ്റ്റിന്റെ നാലാം ദിവസം രണ്ടാം സെഷനില്‍ ലഹിരു കുമാരയുടെ പന്ത് സിക്സറിന് പറത്തിയാണ് പന്ത് ചരിത്രനേട്ടം സ്വന്തമാക്കിയത്. ഇംഗ്ലണ്ടിന്റെ ബെന്‍ സ്റ്റോക്സ്, ന്യൂസീലന്‍ഡിന്റെ ബ്രണ്ടന്‍ മക്കല്ലം, ഓസ്ട്രേലിയയുടെ ആദം ഗില്‍ക്രിസ്റ്റ് എന്നിവര്‍ക്ക് പിന്നാലെയാണ് പന്ത് ടെസ്റ്റില്‍ 100 സിക്സറുകള്‍ പൂര്‍ത്തിയാക്കുന്നത്. ടെസ്റ്റില്‍ ഏറ്റവും വേഗത്തില്‍ 100 സിക്സറുകള്‍ നേടുന്ന താരമെന്ന റെക്കോര്‍ഡും ഋഷഭ് പന്ത് സ്വന്തമാക്കി. വെറും 51 മത്സരങ്ങളില്‍ നിന്നാണ് പന്ത് ഈ നേട്ടത്തിലെത്തിയത്. ഇതോടെ 149 വര്‍ഷത്തെ ടെസ്റ്റ് ക്രിക്കറ്റ് ചരിത്രത്തിലെ മറ്റൊരു റെക്കോര്‍ഡാണ് ഇന്ത്യന്‍ താരത്തിന്റെ പേരിലായത്.
82 ടെസ്റ്റ് മത്സരങ്ങളില്‍ നിന്ന് 100 സിക്സറുകള്‍ പൂര്‍ത്തിയാക്കിയ ബെന്‍ സ്റ്റോക്സിന്റെ റെക്കോര്‍ഡാണ് പന്ത് മറികടന്നത്. സ്റ്റോക്സിന്റെ പേരില്‍ നിലവില്‍ 138 ടെസ്റ്റ് സിക്സറുകളുണ്ട്. ആദം ഗില്‍ക്രിസ്റ്റ് 92 മത്സരങ്ങളില്‍ നിന്നാണ് 100 സിക്സറുകള്‍ പൂര്‍ത്തിയാക്കിയത്. ബ്രണ്ടന്‍ മക്കല്ലം 98 മത്സരങ്ങളിലാണ് ഈ നേട്ടത്തിലെത്തിയത്. മക്കല്ലത്തിന്റെ പേരില്‍ 107 ടെസ്റ്റ് സിക്സറുകളാണുള്ളത്. ശ്രീലങ്കയ്‌ക്കെതിരായ ടെസ്റ്റിന് മുമ്പ് 97 സിക്സറുകളായിരുന്നു ഋഷഭ് പന്തിന്റെ പേരിലുണ്ടായിരുന്നത്. അപൂര്‍വ നേട്ടത്തിലെത്താന്‍ മൂന്ന് സിക്സറുകള്‍ മാത്രമായിരുന്നു താരത്തിന് വേണ്ടിയിരുന്നത്.
ആദ്യ ഇന്നിങ്സില്‍ 62 പന്തില്‍ 39 റണ്‍സെടുത്ത പന്ത് ഒരു സിക്സറും നാല് ബൗണ്ടറികളും നേടി. രണ്ടാം ഇന്നിങ്സില്‍ രണ്ട് സിക്സറുകള്‍ കൂടി നേടിയതോടെയാണ് ചരിത്രനേട്ടം പൂര്‍ത്തിയാക്കിയത്. ലഹിരു കുമാരയുടെ പന്തില്‍ പന്ത് അടിച്ച കൂറ്റന്‍ സ്ട്രെയിറ്റ് സിക്സറാണ് 100-ാം സിക്സറായി മാറിയത്. ടെസ്റ്റ് ക്രിക്കറ്റിലെ ആക്രമണാത്മക ബാറ്റിങ്ങിലൂടെ നേരത്തെ തന്നെ ശ്രദ്ധ നേടിയിട്ടുള്ള പന്തിന് റെക്കോര്‍ഡ് നേട്ടം മറ്റൊരു പൊന്‍തൂവലായി.
