തൃശൂർ: ലഹരി കൈമാറ്റത്തിനിടെ റിട്ടയേഡ് എസ്പിയുടെ മകൻ എക്സൈസ് പിടിയിൽ. റിട്ടയേർഡ് എസ്പി ഉണ്ണിരാജ ഐപിഎസിന്റെ മകനടക്കം രണ്ട് പേരാണ് എക്സൈസിന്റെ പിടിയിലായത്. തൃശൂർ ചിയ്യാരത്ത് നിന്നാണ് പ്രതികളെ പിടികൂടിയത്.
റിട്ടയേർഡ് എസ്പി ഉണ്ണിരാജ ഐപിഎസിന്റെ മകൻ അഭിജിത്തും കൂട്ടാളി റോജറുമാണ് എക്സൈസിനറെ കസ്റ്റഡിയിലായത്. രാത്രി 8.30ഓടെയാണ് ചിയ്യാരത്ത് എക്സൈസ് സംഘം പരിശോധന നടത്തിയത്. ബൈക്കിലെത്തി അഞ്ച് ഗ്രാം എംഡിഎംഎ കൈമാറാൻ ശ്രമിക്കുന്നതിനിടെയാണ് ഇരുവരും പിടിയിലായതെന്നാണ് വിവരം. ഇവരുടെ ബൈക്കും കസ്റ്റഡിയിലെടുത്തു.
സംഭവത്തിൽ അഭിജിത്തിനും റോജറിനുമെതിരെ എക്സൈസ് കേസെടുത്തു. ഇരുവരെയും ഇന്ന് കോടതിയിൽ ഹാജരാക്കും. ലഹരി ഇടപാടിൽ കൂടുതൽ പേർക്ക് പങ്കുണ്ടോയെന്നും എക്സൈസ് അന്വേഷിക്കുന്നുണ്ട്.