ന്യൂഡൽഹി: രാജ്യത്തെ സ്വകാര്യ ബഹിരാകാശ മേഖലയ്ക്ക് കൂടുതൽ കരുത്തുപകരുന്ന നിർണായക ഇടപെടലുമായി പ്രധാനമന്ത്രി നരേന്ദ്ര മോദി. ന്യൂഡൽഹിയിലെ സേവാ തീർത്ഥിൽ 20 ഇന്ത്യൻ ബഹിരാകാശ സ്റ്റാർട്ടപ്പുകളുടെ സി.ഇ.ഒമാരുമായും സ്ഥാപകരുമായും പ്രധാനമന്ത്രി കൂടിക്കാഴ്ച നടത്തി. റോക്കറ്റ് നിർമാണം, പുനരുപയോഗിക്കാവുന്ന വിക്ഷേപണ വാഹനങ്ങൾ, ഉപഗ്രഹ സാങ്കേതികവിദ്യ, അഡ്വാൻസ്ഡ് പ്രൊപ്പൽഷൻ, ബഹിരാകാശ-പ്രതിരോധ ഇന്റലിജൻസ്, ബഹിരാകാശ മാലിന്യ നിർമാർജനം, AI അധിഷ്ഠിത കാലാവസ്ഥാ നിരീക്ഷണം തുടങ്ങിയ മേഖലകളിൽ പ്രവർത്തിക്കുന്ന സംരംഭകരാണ് കൂടിക്കാഴ്ചയിൽ പങ്കെടുത്തത്.
പുതിയ മേഖലയിൽ ധൈര്യം കാണിച്ച യുവാക്കൾ രാജ്യത്തിന്റെ അഭിമാനം
ബഹിരാകാശ മേഖലയിൽ വലിയ റിസ്ക് ഏറ്റെടുത്ത് പുതിയ സാങ്കേതികവിദ്യകൾ വികസിപ്പിക്കുന്ന യുവസംരംഭകരെ പ്രധാനമന്ത്രി അഭിനന്ദിച്ചു. ഇന്ത്യയുടെ സ്വകാര്യ ബഹിരാകാശ വ്യവസായം അതിവേഗം വളരുകയാണെന്നും രാജ്യത്തിനകത്ത് തന്നെ നിർണായക സാങ്കേതികവിദ്യകൾ വികസിപ്പിക്കാൻ സ്റ്റാർട്ടപ്പുകൾ നടത്തുന്ന ശ്രമങ്ങൾ ശ്രദ്ധേയമാണെന്നും അദ്ദേഹം പറഞ്ഞു.
സ്വകാര്യ പങ്കാളിത്തത്തിന് ബഹിരാകാശ മേഖല തുറന്നുകൊടുത്തത് നിരവധി പുതിയ അവസരങ്ങൾക്ക് വഴിയൊരുക്കിയതായി സ്റ്റാർട്ടപ്പ് മേധാവികളും ചൂണ്ടിക്കാട്ടി. ഇന്ത്യയിൽ വികസിപ്പിക്കുന്ന സാങ്കേതികവിദ്യകൾ സ്വന്തമാക്കാനും ഉപയോഗപ്പെടുത്താനും ലോകത്തിന്റെ വിവിധ ഭാഗങ്ങളിൽ നിന്ന് താൽപര്യം വർധിക്കുന്നതായും അവർ പ്രധാനമന്ത്രിയെ അറിയിച്ചു.
ഇന്ത്യ ആഗോള സ്പേസ്-ടെക് ഹബ്ബാകും
ലോകം ബഹിരാകാശത്തെക്കുറിച്ച് ചിന്തിക്കുമ്പോൾ ഇന്ത്യയിലേക്ക് നോക്കുന്ന തരത്തിലുള്ള ഒരു അന്തരീക്ഷം സൃഷ്ടിക്കുകയാണ് ലക്ഷ്യമെന്ന് പ്രധാനമന്ത്രി പറഞ്ഞു. ഇന്ത്യയുടെ ബഹിരാകാശ മേഖല ആഗോള പ്രതിഭകളെയും കമ്പനികളെയും നിക്ഷേപങ്ങളെയും ആകർഷിക്കുന്ന കാന്തമായി മാറണം.
കുറഞ്ഞ ചെലവിൽ മികച്ച സാങ്കേതികവിദ്യ വികസിപ്പിക്കാനുള്ള ഇന്ത്യയുടെ ശേഷിയും യുവാക്കളുടെ നവീന ആശയങ്ങളും രാജ്യത്തിന് വലിയ നേട്ടമാണ്. സ്ഥിരതയുള്ള നയപരമായ അന്തരീക്ഷം ഉറപ്പാക്കുന്നതിലൂടെ കൂടുതൽ ആഗോള നിക്ഷേപങ്ങളും പ്രതിഭകളും ഇന്ത്യയിലേക്ക് എത്തിക്കാനാകുമെന്നാണ് പ്രധാനമന്ത്രിയുടെ വിലയിരുത്തൽ.
കൃഷി മുതൽ പരിസ്ഥിതി വരെ; ബഹിരാകാശ സാങ്കേതികവിദ്യ ജനജീവിതത്തിലേക്ക്
റോക്കറ്റുകളും ഉപഗ്രഹങ്ങളും നിർമിക്കുന്നതിൽ മാത്രം ബഹിരാകാശ സാങ്കേതികവിദ്യയുടെ സാധ്യതകൾ ഒതുക്കരുതെന്ന് പ്രധാനമന്ത്രി നിർദേശിച്ചു. കൃഷി, മൃഗസംരക്ഷണം, ക്ഷീരമേഖല, പരിസ്ഥിതി സംരക്ഷണം തുടങ്ങിയ മേഖലകളിലും സ്പേസ് ടെക്നോളജിയുടെ ഉപയോഗം വ്യാപിപ്പിക്കണമെന്ന് അദ്ദേഹം ആവശ്യപ്പെട്ടു.
കർഷകർക്ക് മികച്ച തീരുമാനങ്ങളെടുക്കാൻ സഹായിക്കുന്ന സാങ്കേതികവിദ്യകൾ വികസിപ്പിക്കുന്ന സ്റ്റാർട്ടപ്പുകൾ കാർഷിക സർവകലാശാലകളുമായും സർക്കാർ ഏജൻസികളുമായും സഹകരിക്കണമെന്നും പ്രധാനമന്ത്രി നിർദേശിച്ചു. ബഹിരാകാശ മാലിന്യ നിർമാർജന മേഖലയിൽ പ്രവർത്തിക്കുന്ന കമ്പനികൾ പരിസ്ഥിതി സംഘടനകളുമായി ചേർന്ന് പ്രവർത്തിക്കണമെന്നും അദ്ദേഹം പറഞ്ഞു.
പ്രതിഭകൾക്കായി വാതിലുകൾ തുറന്ന് ഇന്ത്യ
ലോകത്തിന്റെ വിവിധ ഭാഗങ്ങളിലുള്ള വിദഗ്ധരെ ഇന്ത്യയിലേക്ക് ആകർഷിക്കുന്ന സാഹചര്യം സൃഷ്ടിക്കണമെന്നും പ്രധാനമന്ത്രി പറഞ്ഞു. ആഗോള പ്രൊഫഷണലുകൾക്ക് ഇന്ത്യൻ സ്റ്റാർട്ടപ്പുകളിലും ബഹിരാകാശ സ്ഥാപനങ്ങളിലും പ്രവർത്തിക്കാൻ അവസരമൊരുക്കുന്ന തരത്തിൽ രാജ്യത്തെ സ്പേസ് ഇക്കോസിസ്റ്റം വികസിപ്പിക്കണമെന്നാണ് നിർദേശം.
ഇന്ത്യൻ സ്റ്റാർട്ടപ്പുകൾ ആഭ്യന്തര വിപണിയിൽ മാത്രം ഒതുങ്ങാതെ ആഗോള വിപണികളിലേക്ക് കടക്കണമെന്നും പ്രധാനമന്ത്രി ആഹ്വാനം ചെയ്തു. ഇന്ത്യയിൽ വികസിപ്പിക്കുന്ന ബഹിരാകാശ സാങ്കേതികവിദ്യകൾ ലോകത്തിന് മുന്നിൽ എത്തിക്കുന്നതിലൂടെ രാജ്യത്തെ ആഗോള സ്പേസ്-ടെക് ശക്തിയായി ഉയർത്തുകയാണ് ലക്ഷ്യം.
കുട്ടികളിൽ ബഹിരാകാശ താൽപര്യം വളർത്തണം
അടൽ ടിങ്കറിംഗ് ലാബുകളുമായി ബഹിരാകാശ മേഖലയിലെ സ്റ്റാർട്ടപ്പുകൾ കൂടുതൽ സഹകരിക്കണമെന്നും പ്രധാനമന്ത്രി നിർദേശിച്ചു. ചെറുപ്പം മുതൽ തന്നെ വിദ്യാർഥികളിൽ ബഹിരാകാശ ശാസ്ത്രത്തോടും സാങ്കേതികവിദ്യയോടും കൗതുകവും താൽപര്യവും വളർത്താൻ ഇത് സഹായിക്കുമെന്ന് അദ്ദേഹം പറഞ്ഞു.
440-ലേറെ സ്പേസ് സ്റ്റാർട്ടപ്പുകൾ
ഇന്ത്യയിലെ സ്വകാര്യ ബഹിരാകാശ മേഖലയിലെ വളർച്ചയുടെ വേഗം വ്യക്തമാക്കുന്നതാണ് പുതിയ കണക്കുകൾ. DPIITയുടെ Start-up India പോർട്ടൽ പ്രകാരം രാജ്യത്ത് ഏകദേശം 440 സ്പേസ് ടെക്നോളജി സ്റ്റാർട്ടപ്പുകൾ രജിസ്റ്റർ ചെയ്തിട്ടുണ്ട്. IN-SPACe വിവിധ ബഹിരാകാശ പ്രവർത്തനങ്ങൾക്കായി 52 നോൺ-ഗവൺമെന്റ് സ്ഥാപനങ്ങൾക്ക് 113 അനുമതികൾ നൽകിയിട്ടുണ്ട്. ഇതിൽ 18 സ്റ്റാർട്ടപ്പുകളും ഉൾപ്പെടുന്നു.
ISROയും ബഹിരാകാശ വകുപ്പും വികസിപ്പിച്ച സാങ്കേതികവിദ്യകൾ സ്വകാര്യ മേഖലയിലേക്ക് കൈമാറുന്നതിനും നടപടികൾ ശക്തമാക്കിയിട്ടുണ്ട്. NSIL, IN-SPACe എന്നിവയുടെ സഹകരണത്തോടെ ഇന്ത്യൻ വ്യവസായ മേഖലയുമായി നിരവധി ടെക്നോളജി ട്രാൻസ്ഫർ കരാറുകളും ഇതിനകം ഒപ്പുവെച്ചിട്ടുണ്ട്.
ഇന്ത്യയുടെ ബഹിരാകാശ മേഖലയിലെ ഈ വേഗത്തിലുള്ള മാറ്റം രാജ്യത്തിന്റെ ശാസ്ത്ര-സാങ്കേതിക മുന്നേറ്റത്തിന് മാത്രമല്ല, പുതിയ തൊഴിൽ അവസരങ്ങൾക്കും ആഗോള നിക്ഷേപങ്ങൾക്കും വലിയ സാധ്യതകളാണ് തുറക്കുന്നത്.
