തിരുവനന്തപുരം: സംസ്ഥാനത്ത് മഴ ശക്തമാകാന് സാധ്യതയുള്ളതിനാല് ആറ് ജില്ലകളില് ഇന്ന് ഓറഞ്ച് അലര്ട്ട് പ്രഖ്യാപിച്ചു. ഇടുക്കി, എറണാകുളം, തൃശൂര്, മലപ്പുറം, കോഴിക്കോട്, വയനാട് ജില്ലകളിലാണ് കേന്ദ്ര കാലാവസ്ഥ വകുപ്പ് ഓറഞ്ച് അലര്ട്ട് പ്രഖ്യാപിച്ചിരിക്കുന്നത്. മഴ മുന്നറിയിപ്പിന്റെ ഭാഗമായി ഓറഞ്ച് അലര്ട്ട് പ്രഖ്യാപിച്ച ജില്ലകളില് ഇന്ന് വൈകിട്ട് 4 മണിക്കും 4.30നും ഇടയില് ‘കവചം’ മുന്നറിയിപ്പ് സംവിധാനത്തിന്റെ ഭാഗമായുള്ള സൈറണുകള് മുഴങ്ങും. പൊതുജനങ്ങള്ക്ക് ജാഗ്രതാ നിര്ദേശങ്ങള് നല്കുന്നതിന്റെ ഭാഗമായാണ് സൈറണ് സംവിധാനം പ്രവര്ത്തിപ്പിക്കുന്നത്.
28-ാം തീയതി വരെ കേരളത്തില് നേരിയതോ മിതമായതോ ആയ മഴയ്ക്ക് സാധ്യതയുണ്ടെന്നാണ് കാലാവസ്ഥ വകുപ്പിന്റെ പ്രവചനം. ഇന്ന് ഒറ്റപ്പെട്ട സ്ഥലങ്ങളില് അതിശക്തമായ മഴയ്ക്കും, ഇന്നും നാളെയും മറ്റന്നാളും ഒറ്റപ്പെട്ടയിടങ്ങളില് ശക്തമായ മഴയ്ക്കും സാധ്യതയുണ്ട്. ഗംഗാതീര പശ്ചിമ ബംഗാളിനും സമീപ പ്രദേശങ്ങളായ ജാര്ഖണ്ഡ്, വടക്കന് ഒഡീഷ എന്നിവയ്ക്ക് മുകളിലായി ന്യൂനമര്ദം തുടരുന്നതിന്റെ സ്വാധീനവും മഴയ്ക്ക് കാരണമാകുന്നുണ്ട്.
ഓറഞ്ച് അലര്ട്ട് പ്രഖ്യാപിച്ച ജില്ലകളില് ജനങ്ങള് ജാഗ്രത പാലിക്കണമെന്നും മഴ ശക്തമാകുന്ന സാഹചര്യത്തില് അധികൃതരുടെ നിര്ദേശങ്ങള് പാലിക്കണമെന്നും നിര്ദേശമുണ്ട്.
