കോട്ടയം: കേരളത്തിലെ റബർ കർഷകർക്ക് ഓണസമ്മാനമായി കേന്ദ്രസർക്കാരിന്റെ നിർണായക നേട്ടം. കോട്ടയം പുതുപ്പള്ളിയിലെ റബർ റിസർച്ച് ഇൻസ്റ്റിറ്റ്യൂട്ട് ഓഫ് ഇന്ത്യ (RRII) രാജ്യത്തെ റബർ ക്ലോണുകളുടെ നോഡൽ ശാസ്ത്രീയ പരിശോധനാ കേന്ദ്രമായി തെരഞ്ഞെടുക്കപ്പെട്ടു. റബർ മേഖലയിലെ ഗവേഷണത്തിനും പുതിയ ഇനങ്ങളുടെ സംരക്ഷണത്തിനും ഏറെ പ്രാധാന്യമുള്ള നീക്കമാണിത്. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ എംഎൽഎയും റബർ ബോർഡ് ചെയർമാൻ എൻ. ഹരിയും നടത്തിയ ഇടപെടലുകളും പരിശ്രമങ്ങളുമാണ് ഇത്തരം ഒരു നേട്ടത്തിന് പിന്നിൽ.
ഇതോടെ രാജ്യത്തെ റബർ ക്ലോണുകളുടെ അംഗീകൃത DUS (Distinctness, Uniformity and Stability) പരിശോധനാ സംവിധാനം കേരളത്തിൽ തന്നെ ലഭ്യമാകും. പുതിയ റബർ ഇനങ്ങളുടെ തനിമയും പ്രത്യേകതകളും പരിശോധിച്ച് ഉറപ്പാക്കാനും, നിയമപരമായ അംഗീകാരം ലഭ്യമാക്കാനും ഇതുവഴി സാധിക്കും. കർഷകരുടെ പുതിയ ഇനങ്ങൾക്ക് അവകാശ സംരക്ഷണം ഉറപ്പാക്കുന്നതിനും തീരുമാനം സഹായകരമാകും.
കർഷകരും ഗവേഷകരും വികസിപ്പിക്കുന്ന പുതിയ റബർ ഇനങ്ങൾക്ക് ദേശീയതലത്തിൽ അംഗീകാരവും സംരക്ഷണവും ലഭിക്കുന്നതിനുള്ള നടപടികൾ കൂടുതൽ സുഗമമാകുമെന്നാണ് വിലയിരുത്തൽ. റബർ കൃഷിയിൽ പുതിയ ഇനങ്ങളുടെ വികസനത്തിനും ഗവേഷണത്തിനും ഇതോടെ കൂടുതൽ സാധ്യതകൾ തുറക്കും. കേരളം രാജ്യത്തെ പ്രധാന റബർ ഉത്പാദന കേന്ദ്രങ്ങളിലൊന്നായതിനാൽ RRIIക്ക് ലഭിച്ച പുതിയ ഉത്തരവാദിത്വം സംസ്ഥാനത്തെ റബർ മേഖലയ്‌ക്കും വലിയ നേട്ടമാണ്.
