തിരുവനന്തപുരം: മുന് അഡീഷണല് ചീഫ് സെക്രട്ടറി പി.എച്ച്. കുര്യന് (67) അന്തരിച്ചു. അര്ബുദബാധയെ തുടര്ന്ന് സ്വകാര്യ ആശുപത്രിയില് ചികിത്സയിലിരിക്കെയാണ് മരണം. വൈകിട്ട് 5.30ഓടെയാണ് മരണം സ്ഥിരീകരിച്ചത്. ശനിയാഴ്ച കോട്ടയം പാമ്പാടിയിലാണ് സംസ്കാരം.
1986 ബാച്ചിലെ കേരള കേഡര് ഉദ്യോഗസ്ഥനായിരുന്ന പി.എച്ച്. കുര്യന് റവന്യൂ, വ്യവസായ, ഐടി വകുപ്പുകളില് പ്രിന്സിപ്പല് സെക്രട്ടറിയായി പ്രവര്ത്തിച്ചിട്ടുണ്ട്. ഒഡീഷയിലും വിവിധ ഭരണചുമതലകള് വഹിച്ചിരുന്നു.
കേരളത്തില് സ്റ്റാര്ട്ടപ്പ് നയം രൂപവത്കരിക്കുന്നതില് നിര്ണായക പങ്കുവഹിച്ച ഉദ്യോഗസ്ഥനായിരുന്നു പി.എച്ച്. കുര്യന്. ജില്ലാ കളക്ടര്, ലേബര് കമ്മിഷണര്, പ്രോജക്ട് ഡയറക്ടര്, മാനേജിംഗ് ഡയറക്ടര്, സെക്രട്ടറി, പ്രിന്സിപ്പല് സെക്രട്ടറി, അഡീഷണല് ചീഫ് സെക്രട്ടറി, സ്പെഷ്യല് സെക്രട്ടറി തുടങ്ങിയ പദവികളിലും സേവനമനുഷ്ഠിച്ചു.
2018 ഡിസംബര് ഏഴ് മുതല് ശാസ്ത്ര സാങ്കേതിക വകുപ്പില് എക്സിക്യൂട്ടീവ് വൈസ് പ്രസിഡന്റായും പ്രവര്ത്തിച്ചു. 1959 ജനുവരി 20ന് ജനിച്ച പി.എച്ച്. കുര്യന് രസതന്ത്രത്തില് ബിരുദവും ബിരുദാനന്തര ബിരുദവും നേടിയ ശേഷമാണ് സിവില് സര്വീസിലെത്തിയത്. കേരളത്തിന്റെ ഭരണ-വികസന മേഖലകളില് ശ്രദ്ധേയമായ ഇടപെടലുകള് നടത്തിയ ഉദ്യോഗസ്ഥനായിരുന്നു അദ്ദേഹം.
